3 | Apajlẹ Biblu Tọn lẹ Nọ Gọalọna Mí

BIBLU DỌHO GANDO . . . Sunnu po yọnnu nugbonọ lẹ po go he do “numọtolanmẹ taidi mítọn lẹ nkọ.”—JAKỌBU 5:17.

Nuhe E Zẹẹmẹdo

Kandai jọnun sunnu po yọnnu he do numọtolanmẹ voovo lẹ po tọn wẹ gọ́ Biblu mẹ. Dile mí to otàn yetọn lẹ hia, mí gán mọ apajlẹ mẹde tọn he taidi mítọn nkọ.

Lehe Ehe Gán Gọalọ Do

Mímẹpo wẹ nọ jlo dọ mẹlẹ ni mọnukunnujẹ mí go. Amọ́ ehe sọ yin nugbo, titengbe to whenue mí do nuhahun apọ̀nmẹ tọn de. Eyin mí hia numimọ mẹhe go Biblu donù lẹ tọn, mí gán mọdọ gbẹtọ míwlẹ nkọ wẹ yé bo do linlẹn po numọtolanmẹ dopolọ lẹ po taidi mílọsu. Ehe na zọ́n bọ mí na mọdọ mẹdevo lẹ ko pehẹ yajiji mítọn lẹ nkọ pọ́n bọ e ma yin míwlẹ ṣo.

Hodidọ mẹhe mọdọ huhlọn vọ̀ do emi bọ yé sọ jẹflumẹ lẹ tọn susu wẹ to Biblu mẹ. Be a ko lẹn pọ́n dọ ‘Gbẹninọ ṣikọna emi ya’? Mose, Elija po Davidi po lọsu lẹnmọ.—Sọha lẹ 11:14; 1 Ahọlu lẹ 19:4; Salmu lẹ 55:4.
Biblu dọho gando nawe de go he nọ yin Hanna he gọ́ na “awubla sinsinyẹn” na e yin wẹnsinọ bọ asisi etọn nọ yí enẹ do vlẹ ẹ kò po kanyinylan po wutu.—1 Samuẹli 1:6, 10.
Biblu dọho dawe de tọn he nọ yin Jobu he pehẹ ninọmẹ mítọn lẹ nkọ. Dile etlẹ yindọ e do yise he lodo to Jehovah mẹ, e sè awuvẹ susu bo dọ to gbèdopo dọmọ: “Ogbẹ̀ ṣie hiọawu na mi; n’masọ jlo na nọgbẹ̀ ba.”—Jobu 7:16.

Eyin mí plọn lehe omẹ enẹlẹ duto linlẹn agọ̀ yetọn lẹ ji do, mílọsu na mọ huhlọn he mí do hudo etọn nado doakọnna whlepọn mítọn lẹ.

Biblu Gọalọna Kevin

Lehe Apọṣimẹ-Zọ̀n Sinsinyẹn Yinuwado Ji E Do

“To whenue n’ko dibla do owhe kande ao, doto lẹ mọ apọṣimẹ-zọ̀n sinsinyẹn wunmẹ de na mi. To whedelẹnu, n’nọ mọdọ n’gán duto ninọmẹ depope he n’pehẹ to gbẹ̀mẹ ji. Amọ́ to ojlẹ devo lẹ mẹ, gbẹninọ nọ ṣì mi.”

Lehe Biblu Gọalọna Mi Do

“Mẹhe go Biblu donù bọ n’mọdọ e jugbọn ninọmẹ he taidi ṣie nkọ mẹ wẹ apọsteli Pita. E ṣì nususu lẹ wà he zọ́n bọ e mọ ede di nuvọ́nọ. Amọ́ kakati linlẹn enẹlẹ ni gbọṣi ayiha mẹ na ẹn, Pita nọ dogbẹ́ hẹ họntọn he nọ hò etọn pọ́n lẹ. Eyin e wá jọ bọ apọṣimẹ-zọ̀n ṣie to yadona mi, awugbopo ṣie lẹ gán húagbọ́ mi bọ n’na mọ dee di nuvọ́nọ. Taidi Pita, n’ko plọn nado nọ dovivẹnu ma nado nọ dẹn do họntọn vivẹ́ ṣie lẹ, enẹ wẹ mẹhe nọ jlo na gọalọna mi ma nado jogbe lẹ.

“Apajlẹ Biblu tọn devo he nọ miọnhomẹna mi taun wẹ Ahọlu Davidi. Ninọmẹ etọn po nuṣiwa etọn he wayi lẹ po nọ saba hẹn apọṣi i. N’gán mọnukunnujẹ ninọmẹ etọn mẹ na to whedelẹnu, yẹnlọsu nọ wà kavi dọ nudelẹ he nọ wá vẹna mi. Hogbe Davidi tọn he to Salmu lẹ 51tọ mẹ lẹ nọ miọnhomẹna mi. To wefọ 3tọ mẹ, Davidi dọmọ: ‘Yẹn yọ́n sẹ́nhẹngba ṣie lẹ ganji, ylando ṣie sọ nọ gbọṣi nukọn ṣie to whepoponu.’ Wefọ ehe do numọtolanmẹ he n’nọ do nugbonugbo hia to ojlẹ he vẹawuna mi hugan lẹ mẹ, na e ma nọ bọawuna mi nado do linlẹn dagbe lẹ gando dee go wutu. Podọ, n’sọ mọdọ nuhe Davidi dọ to wefọ 10tọ mẹ lẹ yin nugbo, e dọmọ: ‘Jiwheyẹwhe E, dá ahun wiwe-ṣeke de do ohò ṣie mẹ, bosọ yí gbigbọ yọyọ, yèdọ tenọgli tọn de do yẹn mẹ.’ Yẹnlọsu nọ vẹ̀ Jiwheyẹwhe to aliho dopolọ mẹ dọ ni gọalọna mi nado diọ linlẹn he n’nọ do gando dee go. Gbọngodo, wefọ 17tọ nọ miọnhomẹna mi. E dọmọ: ‘Jiwheyẹwhe E, hiẹ ma na gbẹ́ ahun he jẹflumẹ bo to awubla dai.’ Wefọ ehe nọ vọ́ jide na mi dọ Jiwheyẹwhe yiwanna mi.

“Eyin n’ze ayiha do apajlẹ Biblu tọn lẹ po nuhe Jiwheyẹwhe to wiwà na mi to alọnu lẹ po ji, n’nọ hẹn todido ṣie na sọgodo lodo dogọ. Opagbe Biblu tọn lẹ nọ yin nugbo na mi bosọ nọ gọalọna mi taun ma nado jogbe.”