Dagbe po Oylan po: Nuhe Nọ Deanana Mẹsusu

Diblayin mẹlẹpo wẹ na kọngbedopọ dọ e họnwun dọ walọyizan delẹ yin dagbe bọ devo lẹ ylan taun. Di apajlẹ, mẹsusu wẹ nọ jẹagọdo hlọnhuhu, zanhẹmẹ gánnugánnu, ovivu lẹ zinzanhẹ, to whenuena mẹsusu nọ dọho dagbe gando dodowiwa, homẹdagbe po awuvẹmẹ po go. Amọ́ to adà gbẹzan tọn devo lẹ mẹ, etlẹ yin to ninọmẹ he gando zanhẹmẹ, nugbodidọ kavi ovi lẹ pinplọn whẹ́n go lẹ mẹ, mẹsusu nọ lẹndọ nujinọtedo dagbe po oylan po tọn de ma tin. Yé nọ lẹndọ diblayin nudide lẹpo wẹ gán yin alọkẹyi. Mẹlẹ nọ saba ze nudide yetọn lẹ sinai do nuhe yelọsu po mẹhe lẹdo yé lẹ po lẹn gando whẹho lọ go ji. Be pọndohlan dejidego de wẹ enẹ nọ yin to whelẹponu ya?

BE MÍ DONA NỌ ZE NUDIDE MÍTỌN LẸ SINAI DO NUMỌTOLANMẸ JI WẸ YA?

Mí nọ saba ze nudide mítọn lẹ sinai do numọtolanmẹ kavi do nujinọtedo mítọn gando dagbe po oylan po go ji, ehe nọ yin yiylọ to paa mẹ dọ ayihadawhẹnamẹnu. (Lomunu lẹ 2:14, 15) Etlẹ yin to whenue ovi lẹ to pẹvi, yé gán yọ́n vogbingbọn to nuhe yin dodo po mawadodo po ṣẹnṣẹn bo tlẹ do numọtolanmẹ whẹhuhu tọn. Dile ojlẹ to yìyì, nujinọtedo he mí plọn sọn hagbẹ whẹndo tọn mítọn, hagbẹ mítọn lẹ, mẹplọntọ mítọn lẹ, mẹhe ṣẹnṣẹn mí nọ nọ̀ lẹ dè lẹ, gọna sinsẹ̀n po aṣa mítọn lẹ po mẹ lẹ wẹ nọ deanana ayihadawhẹnamẹnu mítọn. Eyin mí basi nudide lẹ, ayihadawhẹnamẹnu mítọn nọ dọna mí eyin vlavo nudide mítọn sọgbe hẹ nujinọtedo mítọn lẹ kavi lala.

Pọndohlan mítọn gando dagbe po oylan po go gán whàn mí nado do awuvẹmẹ, pinpẹn-nutọn-yinyọnẹn, dodowiwa po mẹtọnhopọn po hia mẹdevo lẹ. E gán sọ glọnalina mí nado wà nuhe sọgan gbleawuna mẹhe mí yiwanna lẹ kavi he gán hẹn winyan wá na mí bosọ zọ́n bọ mí na do numọtolanmẹ whẹhuhu tọn lẹ.

Be mí gán ganjẹ numọtolanmẹ mítọn lẹ go to whelẹponu ya? To whenue Garrick gbẹ́ yin jọja sunnu de, e de nado zan gbẹzan de, e dọmọ: “Nudepope he jlo mi wẹ n’nọ wà.” Amọ́, e wá mọdọ nado wà nuhe yè lẹndọ e sọgbe ma nọ hẹn kọdetọn dagbe wá. E wá zan gbẹzan de he e basi zẹẹmẹ etọn taidi “aliho zinvlu gọ́ngọ́n tọn de, he gọ́ na fẹnnuwiwa, gee nùnù, ahànnumu po danuwiwa po tọn.”

BE MÍ DONA NỌ BASI NUDIDE SINAI DO NUMỌTOLANMẸ MẸDEVO LẸ TỌN JI YA?

Gbọnvona numọtolanmẹ mítọn titi lẹ, nue mẹdevo lẹ na lẹn gando nudide mítọn lẹ go sọ nọ saba deanana mí ga. Ehe gán zọ́n bọ mí na mọaleyi sọn numimọ po nuyọnẹn yetọn po mẹ. Hagbẹ whẹndo tọn, họntọn po mẹhe lẹdo mí lẹ po nọ na mí sisi eyin mí wà nuhe yé lẹndọ e sọgbe.

Be mí gán nọ ganjẹ numọtolanmẹ mẹdevo lẹ tọn go to whelẹponu ya? Jọja yọnnu de he nọ yin Priscila doalọ to walọyizan he gbayipe to hagbẹ etọn lẹ ṣẹnṣẹn mẹ, bo joawuna zanhẹmẹ jẹnukọnna alọwle. Amọ́, e wá mọdọ nado wà nuhe mẹdevo lẹ nọ lẹndọ e yin dagbe ma hẹn ayajẹ wá na emi. E dọmọ: “Nado wà nuhe mẹlẹpo to wiwà ma wà dagbe na mi. E zọ́n bọ n’wà nuhe yin nulunu bosọ do owù taun lẹ.”

BE ALIHO HE PỌNTE DE TIN YA?

Eyin mí to nudide basi to dagbe po oylan po ṣẹnṣẹn, numọtolanmẹ mítọn po mẹdevo lẹ tọn po nọ yí adà titengbe de wà. Amọ́, pọndohlan enẹ kẹdẹ hihodo ma nọ hẹn kọdetọn dagbe wá to whelẹponu. To whedelẹnu, mí gán gbleawuna mídelẹ kavi mẹdevo lẹ, na mí ma lẹnnupọndo kọdetọn nudide mítọn lẹ tọn ji wutu. (Howhinwhẹn lẹ 14:12) Podọ, jidide depope ma tin dọ nujinọtedo mítọn po mẹhe lẹdo mí lẹ tọn po wẹ yọ́n na mí nugbonugbo, bọ e ma nasọ biọ dọ yé ni yin didiọ. To popolẹpo mẹ, nuhe mẹlẹ nọ pọnhlan wayi taidi nuylankan lẹ wẹ nọ yin alọkẹyi to paa mẹ todin, to whenuena walọyizan he mẹlẹ nọ lẹn to dai dọ yé gán yin alọkẹyi lẹ gán yin pinpọnhlan todin taidi nuhe ma sọgbe.

Be anademẹ dejidego de tin gando nuhe yin dagbe po oylan po go ya? Be nujinọtedo walọyizan tọn de tin he mí gán hodo to egbehe bo ma na wá jẹflumẹ to nukọn mẹ ya?

Mí dopẹ́ dọ asisa dejidego de tin he gán deanana walọyizan mítọn, he nọ wazọ́n na mẹlẹpo podọ to filẹpo. Hosọ he bọdego na dọhodo fie mí gán mọ anademẹ dejidego hugan te nado yọ́n dagbe dovo na oylan ji.