Aʋ ˈbhɔ ˈˈɲɩnsʋn- -saʋn, aʋ ˈbhle ˈˈɲɩnsʋn ˈjɛʋn

1. ˈDhe ˈˈɲɩnsʋn anˈ dɩ ˈdhi ɛ, dhɛ dhueˈ -wɛ ɲʋn anˈ klɛɛ ˈye ˈo -za ˈzɩan -an?

ZEZI ˈnaan: “Nyɔ -ɔ ˈˈmaa- e -a sea na a, ɔ ˈnyɛ ˈˈʋn ˈwɛn.” (Matie 12:30) Ɲɔn sea ˈe Zoova ˈdhe nɩn- ɛn, ɔ -nɩɛn- ˈe Satan ˈdhe. ˈBho ɲʋn anˈ -da -duuˈˈ -gwlɩˈˈ ɛ, ʋa nʋɛn Ɲɔnsoa aˈ dhbho -kajɔɔnka, ˈklaa Biiblʋ ˈnaan Satan an “ˈˈbhii[ɛ] ˈbhlʋa-kɩnnyʋa ˈˈdhru i.” (Gbɔˈwlʋdhɩ- 12:9) Ɛmɛn- dɩ -bho ɲʋn -duuˈˈ a sea ˈjhe ɛˈ, ʋʋ ˈnaan ʋa ˈˈɲɩɛn Ɲɔnsoa, ˈklaa ʋʋ sɩ jhibho- -ka ɛ nɩan Ɲɔnsaʋn Satan anˈ ˈˈjɛˈkpa ʋa ˈˈɲɩn ɛn! -Kaan bhla ɲʋn anˈ klɛɛ ˈye ˈo dhɛ dhueˈ -za: Ʋʋ ˈye Zoova nɩan “tɔˈdɩ- Ɲɔnsoa ˈˈɲɩn”, bhɛ seɛ nɩn- ɛnˈ, -ˈmɛn Satan nɩan “sɩ ˈtmʋɛɛ- bhaˈ” a, ɔmɔn- ʋʋ ˈye ˈˈɲɩn.—Psaume 31:5; Zan 8:44.

Aʋ ˈghlʋ ˈe ˈˈɲɩnsʋn- -saʋn- anˈ -kʋɔn- kwlaˈ

2. Ɲʋn -an ˈbɔan -ʋʋ -ˈyea Zoova ˈˈɲɩn ɛn, ka Satan an nʋbʋ je -kaan sʋn -ɛn?

² -Bho aʋ -za ˈo Zoova ˈa ˈˈɲɩan anˈ, ɛ dhɛ ˈjɛɛn-. Ɛɛ muɛn -nʋn aʋ ˈye ˈe ɔ ˈˈjhri ˈdhe i-nmɔn. ˈKlaa ɛɛˈ dhɛ tu ɛ ɲaan Satan in. Ɛɛˈ dɩ ɲʋn -an ˈbɔan -ʋʋ -ˈyea Ɲɔnsoa aˈ dhbho nʋn ɛn, ɔɔ ˈjhee ʋbʋ ˈkle. Ɔɔ nʋɛnˈ -wɛeˈ ʋaˈ ˈcɛ -e ʋaˈ jhibhoɲʋn an ghwlaa ʋbʋ ˈˈdhe ʋa kaan ʋbʋ je. Zezi -za ɩ ɲan ɔ yɩ ˈtmʋn. -Kɔ ˈdhaa ˈka ka: “-Wɛˈ wwlɔnyiɔɔ ˈˈgbuˈdhinyʋ ɛ, ʋ mɔ -ʋa mu ɔɔ ˈnyɩɛnyʋ nɩ.”—Matie 10:36.

3. -Bho -manˈ ˈcɛ -e -manˈ bhao -ˈˈwe a sea -manˈ Ɲɔnsoa ˈˈɲɩnsʋn bho vɔn ɔnˈ, ka -man mun nʋn- -ɛn?

³ -Bho ɛ nɩn- mɔn ˈdhee, ka -man mun -nʋn -ɛn? -Ka ʋʋ sea ˈe ˈˈɲɩnsʋn- ˈjɛʋn ˈdhi nɩn- ɛn, ɲʋn -duuˈˈ jhibhiˈ. ˈKlaa ʋaˈ -pɛɛ ɛ zeeˈ. Ʋʋ ˈse ˈbɔn ʋʋ ˈye ˈe ˈghlʋ. ˈBho ʋbʋ -gwlɩˈˈ ɛ, -bho ʋʋ nʋɛn ɛnˈ, ɛ ˈse ʋa ˈcɛ ˈtʋn -nʋn in. Ʋaˈ tɔˈi -naan sʋn ˈsrɛ ˈˈɩ ˈmɛn? -Bho -manˈ ɲɔn ɔn sea ˈˈgeji ˈnan -wɛeˈ -ˈyɩ ˈŋwɔn ɔnˈ, -ka ɛɛ ˈkɔɔa ɲʋn ˈan ˈkmʋn ɛn, -ˈseɔ ˈtmʋʋn- in? -Aeˈˈ -ˈyeɔ bho ˈkpa -ke ˈbho ɩanˈ naanˈ?

4. Dhɛ Zozue ˈtmʋʋn- Israɛɲʋn ʋʋ ˈye nʋn ˈdhe ʋaˈ ˈˈɲɩnsʋn anˈ dɩ ˈdhi -ɛ?

⁴ Zozue zea Israɛɲʋn- -glʋˈ ʋʋ ˈye ˈˈɲɩnsʋn -e ʋaˈ ˈˈbhlidhɩ- -saɩn- ʋaˈ ˈˈnan -e bhaˈ nʋan iˈˈtai-. Ɔ ˈnaan: “-Kaan bhla aʋ -plee Zoova, aʋ nʋn ɔɔˈ dhbho -kajɔɔnka ˈdhe tɔˈdɩ ˈmʋn. ˈˈƝɩɩndhɩ- aʋa ˈcɛ ˈbhlea -da ʋʋ nɩan ˈdhe ˈˈnin ˈdhe ˈdhe Ezipʋ -bhlʋaˈ a, aʋ zɩ kwaˈ i, aʋ nʋn Zoova aˈ dhbho.” (Josué 24:14) Zozue ˈsrɛ ˈˈɩ ˈbho Zoova ˈˈjhibhaˈ, ɛmɛn- dɩ Zoova poɔ ˈˈdhiman. -Bho aʋ ˈsrɛ ˈˈɩ ˈbho Zoova ˈˈjhibhaˈ -ke ɛˈ, ɔɔ muɛn aʋ ˈˈdhiman -po.—2 Samuel 22:26.

Aʋ -za ˈˈɲɩnsʋn- -saʋn- anˈ dhɩ aˈ klɛɛ kwaˈ i

5. Dhɛɛdɩ- -kwɛin- -saɩn- anˈ klɛɛ -a ˈbhlea a, -a -ˈyɩ ˈkwla po -ɛ?

⁵ -Bho -aa sea ˈbɔn -a -ˈye ˈe ˈˈɲɩnsʋn- -saʋn- ˈdhi ˈghlʋ ɛˈ, -ˈmɛn -kwɛin- -saɩn- anˈ klɛɛ -a ˈbhlea -ɩn nɩan -jɛˈ -podhɩ- -e sʋnˈ -podhɩ- -e ghlʋ -e dhɩ -ˈnɩɩn ɛn, -a -ˈyɩ ˈkwla po. -Bho -aa sa ˈbɔn -a -ˈyeɛ -to -ka -a dea Zoova -gwlɩˈˈ -kajɔɔnka aˈ, -ˈmɛn ɛɛˈ dhɛ tu ɛˈ nʋanˈ anˈ dɩ -kmanˈ.

6. Ɲʋn nɩan kletiɛn ˈdhe tɛnˈˈ kmʋn ˈdhi ɛ, ʋʋ ˈyea ˈe ˈˈɲɩnsʋn- ˈjɛʋn ˈdhi ˈkpa a, dhɛ ʋʋ -nʋʋn ʋaˈ gu -sɛɩ- -ɛ?

⁶ Ɲʋn nɩan kletiɛn ˈdhe -tɛnˈˈ kmʋn ˈdhi ɛ, ʋʋ ˈyea ˈe ˈˈɲɩnsʋn- ˈjɛʋn ˈdhi ˈkpa a, ʋʋ nʋɛn dhɛ dhueˈ -ɛɛˈ dɩ Biiblʋ a ˈtmʋn. Ʋn ˈnaan: “Nyʋa -da -duuˈˈ -nɩa wwudhiao ke ɛ, ʋa ja ʋa ˈsɛɩ- -wɛˈ ʋa [pʋɩ ˈˈjhri] ˈdho ʋa wwɛɛˈ ˈˈjuei.”—Nʋʋdhɩ- 19:19.

7. -Bho -zii -saɩn- an saʋ seaa aˈ, dhɛ aʋ ˈye nʋn -ɛn?

⁷ Ɲʋn dhia gu tɛnˈˈ -dhe -wɛeˈ -ʋʋ poa ʋaˈ gu -kwɛin- ˈkwla ˈˈdhe -ʋʋ nɩan dheeˈ i ˈdhe Zoova aˈ dhbho ˈdhi ɛ, -zii -saɩn- ˈbhɛɛˈ ɩn ˈyʋbʋ -seaa-. -Bho ɛɛˈ dhɛ tu ɛ sea nʋɛn ˈdhe aʋaˈ ˈkmʋn ˈdhi ɛˈ, -ˈmɛn aʋ ghwee- Zoova, aʋ ˈdha ɔɔˈ ˈɲnɩn ˈdhe aʋaˈ bhaeghlu ˈdhi. Ɔɔ muɛn aʋ sʋn bho -po.—Iiˈˈbhlaadhɩ- 18:10; Zakɩ 4:7.

8. -Baadhɩ -e ɲʋn anˈ -zii ɲʋn -ˈnʋʋn an bhaea a, ka kletiɛn -ˈˈwe a ˈjhɩɩ -ɛ?

⁸ Ɲʋn -ʋa- ˈbɔan -ʋʋ -ˈyea Zoova ˈˈɲɩn ɛn, ʋaˈ ˈbhle ˈˈɲɩɩndhɩ. Ʋaˈ bhae- ˈbho -baadhɩ -e ɲʋn anˈ -zii ˈˈjhibhaˈ. Ɛ nɩn ˈˈɲɩnsʋn- -saʋn-. Kletiɛn ˈjɛʋn- an “naˈ ˈdhe dhɛwwlideɛ ˈdhi, ɛ se ˈdho ɛɛ ˈjeɛ we.” (2 Kolɛntɩ 5:7) Ɲɔnsoa aˈ ˈtee, -ɛ -ˈnaan ɲʋn anˈ ˈbhlee- ˈˈɲɩɩndhɩ ˈdhe- ɛ, ɛmɛn- ʋa ˈjhe ŋwɔn.—ˈZɔnˈˈSiɛɛ- ˈSɛɛ- 20:4, 5.

Aʋ ˈkpaa- Zoova aˈ ˈcɛ i

9. ˈSrɩn -wɛ Biiblʋ a ˈˈdu -aʋ -wɛeˈ -a -ˈye tɔˈ ˈdhi nɩn- -ɛn?

⁹ Biiblʋ ˈnaan: “Nyɔ -ɔɔ naa [tɔˈɲʋn] we ɛ, ɔɔ [nɩɛn- tɔˈ ˈdhi].” (Iiˈˈbhlaadhɩ- 13:20) -Bho -aa sa ˈbɔn -a -ˈye tɔˈ ˈdhi nɩn- ɛnˈ, -ˈmɛn -a -nɩn Zoova aˈ -Bobhlaʋn- ˈye -da dhueˈ ˈkpa -a -ˈye nan-. Ʋaˈ ˈsʋ -ʋa- naan ˈbho -je -ɛɛ kpa ɲʋn ˈdhe ˈpʋa ˈˈkpe.—Matie 7:14.

10. Ka Zoova aˈ -Bobhlaʋn- an nʋn ɲʋn sʋn bho -po sʋn -wɛeˈ ʋʋ ˈye Ɲɔnsoa ˈˈɲɩn -ɛn?

¹⁰ Zoova aˈ -Bobhlaʋn- an naan ɲʋn anˈ dɩ tɔˈ i ˈjɛɛn-. Ɲʋn -ʋaˈ -pɛɛ ˈsrɛa ˈˈɩ ɛ, ʋa pʋbʋ sʋn bho -wɛeˈ ʋʋ ˈye Biiblʋ iˈŋwɔn ˈˈdhe ʋʋ ˈye ˈkmʋn sea ˈˈtian ˈbhle ˈjhe. Ʋʋ ˈbhɛɛˈ ʋʋ ˈye -ʋn sʋn bho po -ˈye Biiblʋ ˈmʋn iˈŋwɔn, ɛ se geiˈˈ -za dhɛ nɩn-. Ʋa muɛn aʋaˈ ideedɩ ˈˈkpe i zela-, ˈsʋ dhɩ aʋa ˈcɩaan ˈdhe Biiblʋ ˈdhi ɛ, aʋ ˈyɩ nʋn ˈdhe aʋaˈ ˈkmʋn anˈ klɛɛ ˈdhi.—Zan 17:3.

11. -Kawɛ kletiɛn -ˈˈwe aˈ ˈˈdhruigboɛ ˈye aʋ sʋn bho -po sʋn nʋn -ɛn?

¹¹ Ʋa ˈgbooɛ ˈˈdhrui ˈdhe ˈBheɔglɔ ɔˈ ˈˈGbu ˈdhi -wɛeˈ ʋa tɔɔn ɲʋn dhɛ ˈdhe Zoova aˈ ghlu ˈdhi ˈˈdhe ɲʋn ˈye ˈkpɩ ˈjhe ʋʋ ˈye Ɲɔnsoa ˈˈɲɩn -kajɔɔnka. -Ka aʋ ˈyea ɲʋn -ˈnuʋn Biiblʋ -tɔɔn sʋn nʋn ɛn, aʋa muɛn ˈcɩan- -ke.—Eble 10:24, 25.

12. ˈKpɩ -wɛ bhaeɛ ɛ ˈˈɲɩn ɲʋn ˈdhe Zoova aˈ ˈˈɲɩan -an?

¹² -Ka -man jhibha Zoova aˈ -glʋˈ dɩ ɛ, ˈkamɔn- ɔɔˈ ˈtee aˈ dɩ -kmaan an mun ˈˈɩdi- ˈdhee- -ˈmʋn. ˈDhe ɔ ˈˈjhri ˈdhe i-nmɔɛn- ɛnˈ ˈtʋn an muɛn -ʋn -nʋn -kajɔɔnka. ˈˈDhe dhɛ -ɛɛˈ nʋɔn ˈtʋn -ke ɛ, -man muɛn -plee. -ˈBhɔ ˈˈmaeɛˈ, -bho -man sea ˈbɔn -ˈye dhɛ ˈˈsrɛa ˈˈɩ ɛˈ nʋanˈ anˈ ˈkpɩ ˈbhle ˈɛ, -ˈbhɛɛˈ -ˈye Zoova bhae-.—1 Kolɛntɩ 6:9, 10.

13. Ka -ˈbhɛɛ- -ˈye nʋn -wɛeˈ -ˈye Zoova aˈ -pɛɛ ˈmʋnanˈ ipo -ɛ?

¹³ -Bho ˈdhe ɲan -manˈ ɲɔnsoadhɛ ku i ɛ, -ka -manˈ ˈkmʋn Ɲɔnsoa kwa -deɛ- -e, -man ˈˈninzɔnjhiiɛ- -e Zoova aˈ -Bobhlai- ˈkpaa ˈdha dhɛ ɛ, -man muɛn ˈjhe-. -Bho -ˈkpa ˈe Zoova aˈ ˈcɛ ˈˈklun ɛnˈ, ɛɛ muɛn ɔɔˈ -pɛɛ ˈmʋnanˈ ipo-. (Iiˈˈbhlaadhɩ- 27:11) -Ka Ɲɔnsoa ˈdhaa a, -man muɛn ˈe ɔɔˈ ˈcɛ nɩan ˈe ˈmʋnan ˈdhi ˈˈklun ˈkpa-. Ɔ ˈnaan: “ˈˈAn mu ˈʋ ˈnynɩ we ˈˈti-, -wɛˈ ˈˈɩn ˈyʋʋ ˈnynɩ we i na-, ˈˈɩn ˈye ʋa Nyɔsoa nɩ- -wɛˈ ʋ ˈye ˈˈan ˈˈbhlinyʋ nɩ-.”—2 Kolɛntɩ 6:16.