Zoova toɛˈ -ka ɔ nɩan Ɲɔnsoa

ˈBheɔ -ˈˈwe poa Isrɛakɔʋn anˈ ˈcɛdhri nɩan bue jie bho ɛ, ʋʋ nʋɛn dhɩsaɩn-. Ʋbʋ aˈ dhueˈ mɔn -nɩn Akabʋ. ˈƝnɔnkpaoˈ ɲnian ˈdhi ŋwɔn -ʋan- ˈˈɲɩanˈˈ Baalɩ ɛ, ʋmʋn- -nɩn ɔ ˈˈtii ˈˈbhli. Ʋanˈ ˈɲnɩn -nɩn Zezabɛlɩ. Akabʋ -e Zezabɛlɩ nʋɛnˈ Baalɩ ɛˈ ˈˈɲɩanˈˈ ye i -gbaa ˈbho Israɛ -bhlʋa- ˈdhi. Ʋʋ dhbhaˈ Zoova aˈ ghwlukwajhaaʋn -ˈnʋʋn ˈmɛn. Dhɛwɛ- Zoova nʋn -ɛn? Ɔ ˈtmʋʋɛn- ghwlukwajhaai- Eli ɔ ˈye Akabʋ dɩ ˈtmʋʋn-.

Eli -ghwluɛ- ˈe ˈbheɔ Akabʋ bho ɔ ˈnaan, -manˈ dhiŋwɔɲniɛn- ɛnˈ dɩ ˈˈnin ˈse -dhbhai da Israɛ. ˈDhe -zɩn taan ˈdhi ʋʋ ˈse dhɩ ˈˈdu. ˈMɩɛn ɛn dhbhaˈ Israɛkɔʋn- ˈmɛn. ˈBho ɛ ˈdhe ɛ, Zoova ˈtmʋʋɛn- Eli ɔ ˈye ˈe Akabʋ bho dhe mun. Akabʋ -ghwluɛ- ˈe Eli bho ɔ ˈnaan: ‘Ɛ nɩn -manˈ dɩ -aa ˈjhe ˈkle’. Eli ˈnaan: ‘Ɛ se ˈmɔn- nʋɛn -wɛeˈ ˈˈnin ɛnˈ dhbha -nɩn. Ɛ nɩn dhɛ -man ˈˈɲɩanˈˈ Baalɩ ɛɛˈ dɩ. -A ˈye dhɛ dhueˈ nʋn -wɛeˈ ɲɔn nɩan Ɲɔnsoa, ɲʋn anˈ klɛɛ ˈyeɔ jhibho-. -ˈGboo- ˈcɛ -e Baalɩ aˈ ghwlukwajhaaʋn dhi ˈbho Kaamɛlɩ trʋ ˈˈkpe.’

ˈCɛ ˈgbooɛ i ˈbho trʋ ˈˈdhru. Eli ˈnaan: ‘Aʋ -za ˈo dhɛ aʋ ˈye nʋn. -Bho Baalɩ -nɩn Ɲɔnsoa aˈ, -mɛnˈ aʋ ˈˈɲɩn Baalɩ ˈˈdhe -bho Zoova -nɩn Ɲɔnsoa aˈ, -mɛnˈ aʋ ˈˈɲɩn Zoova. Dhɛ ˈman ˈbɔan -a ˈyea nʋn ɛ ka. Baalɩ aˈ ghwlukwajhaaʋn nɩan 450 ɛn, ʋʋ ˈye ʋaˈ ˈsraa kpɔ ɔˈˈ po -wɛeˈ ʋʋ ˈye Baalɩ ˈdha. ˈMɔn -ke ɛ, ˈye ˈman ˈsraa kpɔ ɔˈˈ po ˈˈdhe ˈye Zoova ˈdha. Ɲɔn -ɔn muɛn -nʋn -wɛeˈ nɛn ˈyea ˈe ˈˈjha ˈghwlʋ ɛ ˈyea ˈsraa -siin ɛn, ɔmɔn -nɩn Ɲɔnsoa.’ ˈCɛ ɛˈ klɛɛ ˈŋwɔɔn- ˈbho ˈmɛn.

Baalɩ aˈ ghwlukwajhaaʋn poɛ ʋaˈ ˈsraa kpɔ ɔˈˈ ˈˈdhe ˈdhe zɔn ɔnˈ klɛɛ ˈdhi ʋa ghwee ʋaˈ gela ʋʋ ˈnaan: ‘Oo Baalɩ, -ˈŋwɔn -aaˈ ghwlu!’ Baalɩ ɛˈ ˈŋwɔan ˈsʋ ɛ, Eli ɔ ghwlaa ʋbʋ ˈmɛn ɔ ˈnaan: ‘Aʋ ˈdhɔɔ ˈdhe aʋaˈ ˈkpɩ aˈ klɛɛ ˈmʋn. Ɛgwɛ ɔ -nɩɛn- ˈmʋanˈ, aʋ zɔ ˈˈɲɩɔnˈˈ.’ Baalɩ aˈ ghwlukwajhaaʋn- -ghwee- Baalɩ ˈmɛn -ghwee- ˈsʋ ɛ ye ˈˈjiejhrʋbho -jhɛɛ. ˈKlaa, ghwlu dhueˈ ka, ʋʋ ˈsʋ ˈŋwɔn.

Eli poɛ ɔɔˈ ˈsraa ˈbho ˈsraakpezaadhɛ ˈˈkpe -wɛeˈ ɔ ˈghwolɛ ˈˈnin -duuˈˈ ˈˈkpei. ˈˈDhe ɔ bhae- ɔ ˈnaan: ‘Oo Zoova, ˈman bhaeɛ ʋn dhi, toɛ -ka nɩan Ɲɔnsoa.’ Zoova nʋɛnˈ nɛn ye ˈe ˈˈjha ˈghwlʋ ɛ ye ˈsraa aˈ klɛɛ -siin. ˈCɛ ɛˈ klɛɛ ˈˈghwɔɔ ʋʋ ˈnaan: ‘Zoova -nɩn Ɲɔnsoa!’ Eli -ghwluɛ ˈe ʋbʋ bho ɔ ˈnaan: ‘Aʋaˈ ˈˈtai- Baalɩ aˈ ghwlukwajhaaʋn anˈ dhueˈ i -dhe ɔɔˈ ple -dhe!’ ˈDhe ɛɛˈ -zɔn tu ˈdhi ɛ, ɲʋn dhbhaˈ Baalɩ aˈ ghwlukwajhaaʋn anˈ 450.

ˈBho ɛ ˈdhe ɛ, ˈˈnin ɛnˈ plɩ ˈˈsi ˈzɔn ˈbho ˈtɔnin ˈˈdhru. ˈSʋ Eli ghwluɛ ˈe Akabʋ bho ɔ ˈnaan: ‘ˈˈNin -duuˈˈ -ɛɛ jhi dhbhaaˈ. Po -manˈ ˈˈkpenaandhɛ- ˈkpa -ˈye ˈdhee- ˈˈŋwɛn ˈdhe mun.’ ˈˈNin ɛn jhiɛ i, pʋʋɔˈ ɔ jhiˈ, ˈˈnin -duuˈˈ -dee dhbhaaˈ ˈmɛn -ke. -Vʋʋɔ- -gwɛ jha. Akabʋ ˈˈdooˈ ɔ ye ɔɔˈ ˈˈkpenaandhɛ- -plee. Zoova poɛ Eli sʋn bho ɔ ye ple ˈˈdoo- ɔ ye Akabʋ ɔˈ ˈˈkpenaandhɛ i zi! Eli ɔˈ ˈkledɩ -gwɛ jha? -Aa muɛn ˈjhe- ˈdhe -bo -ɔɔ jhia ˈdhi.