Zezi ɔ bhla ˈBheɔglɔ ɔˈ -bo

Zezi gwɛa ˈˈnin ˈzɔn -jhiiaˈ a, ɔ -dee -bo -bhlaaˈ ˈmɛn ɔ ˈnaan: ‘Ɲɔnsoa aˈ ˈbheɔglɔ- ˈˈkʋʋan- in.’ Ɔ -jhiiɛ- Galile -e Zide aˈ -gwlɛ -duuˈˈ ˈdhii ˈˈdhe ɔɔˈ dhɛcɩaʋn -ˈnʋʋn an kpɔ -jieˈˈ -dhe. Ɔ muan Nazarɛtɩ dhe ˈnɔn ɔ bhɛɛaˈˈ a, ɔ muɛn ˈe Zifʋ -ˈˈwe aˈ ˈˈdhruigboogbu ˈdhi. Ɔ ɲnian ˈe ɛ, ɔ -kaiɛn Izai ɔˈ ˈsɛɛ ˈˈŋwɛn ˈˈdhe ɔ kpa ghwlu ˈˈjha ɔ zroɛ ˈdhii ɔ ˈnaan: ‘Zoova ˈˈɲɩɛnˈˈ ˈʋn -zuu gwɛai -wɛeˈ ˈye -bɔyaˈˈ -bo bhla.’ Ɲʋn an ˈbɔn ɔ ˈye -jhriiˈ nʋn -dhe. ˈKlaa -bho Ɲɔnsoa ˈˈɲɩɔnˈˈ -zuu gwɛai ɛˈ, ɛ nɩn ɔ ˈye -bɔyaˈˈ -bo bhla ɛɛˈ dɩ. ˈBho ɛ ˈdhe ɛ, ɔ ghwluˈ ɔ ˈnaan: ‘Zɩanˈ an, ɲanzaadɩ- -ˈnɩn ɲnin ˈo ˈmɛn.’

ˈSʋ Zezi muɛn ˈo Galile ɛˈ ˈtɔnin- -gwlɩˈˈ. Ɔ ɲnian ˈo ɛ, ɔ ˈjheɛ ɲʋn ɲiɛn -ʋa- kpʋn zmiin-, ɛɛ ˈbhɔɔa ˈbho -ʋʋ ˈkpa ɔɔˈ dhɛcɩaʋn-. Ʋaˈ ˈɲnɩn -nɩn Piɛɛ -e Andre -e Zakɩ -e Zan. Ɔ -ghwluɛ- ˈe ʋbʋ bho ɔ ˈnaan: ‘Aʋ bhla ˈbhoo ˈdhe. ˈMan muɛn -nʋn aʋ ˈye ɲʋn kpʋn.’ ˈBhomɔn- ʋʋ ˈˈsi ʋʋ ˈˈtai- ʋaˈ dhbho i ˈˈdhe ʋʋ bhla ˈo ɔ ˈdhe. Ʋʋ -jhiiɛ- Galile ɛˈ gwlɛ ɛˈ klɛɛ ˈdhii ʋʋ ye Zoova aˈ ˈbheɔglɔ ɔˈ bo bhla. Ʋa bhla -bo Zifʋ -ˈˈwe aˈ ˈˈdhruigboogbi ˈdhii -e ˈdhɔɔglɔˈ i ɛmɛn- -e jiebhoi. Ɲʋn -duuˈˈ a bhla ˈbho ʋbʋ ˈdhe -da ooˈˈ -da ʋa muan. Ɲʋn an ˈŋwɔn Zezi ɔˈ ˈɲnɩn ˈmɛn dhɩ aˈ klɛɛ ˈmʋin, ɩn mun ɩn ye Siri ɲnin -ke.

Zezi ˈˈɲɩɛnˈˈ ɔɔˈ dhɛcɩaʋn -ˈnʋʋn ˈˈɩkman- -wɛeˈ ʋʋ ˈye ɲʋn ˈghwɛ ɛ nʋan ˈpʋʋ- ˈˈdhe ʋʋ ˈye -ziisaɩn- dhi nʋn. -Da ɔɔ bhla bo ˈˈkwigwlɛ- -e gwlɛ ˈdhii -dhe ɛ, -ˈmɛn ɔɔˈ dhɛcɩaʋn -ˈnʋʋn kpɔ -jieˈˈ. ˈƝnʋnkpaeˈ -ˈnʋʋn kpʋan ˈo Ɲɔnsoa ˈˈbun in, -ɛ nɩan Mai ghwlʋaˈ Madala -e Zanɩn -e Sizanɩn ɛn, ʋʋ ˈˈduɛˈˈ Zezi -e ɔɔˈ dhɛcɩaʋn anˈ dɩ.

Zezi gwɛa ɔɔˈ dhɛcɩaʋn dhbho -tɔɔn anˈ an, ɔ dhbhʋbʋ ˈmɛn ʋʋ ye -bo -bhlaaˈ mun Galile ɛˈ gwlɛ ɛˈ klɛɛ ˈdhii. ˈDhe Galile ɛ, ɲʋn -duuˈˈ ˈkpa Zezi ɔˈ dhɛcɩaʋn- ˈˈdhe -ʋʋ -jhii- ˈˈnin ˈzɔn. Ɲʋn -duuˈˈ -ʋa- ˈbɔn ˈjɛɛn- -ʋʋ ˈye ɔɔˈ dhɛcɩaʋn- ˈkpa ˈsʋ Zezi ˈnaan -ka gle ˈˈvluaˈ ɲʋn yea cɛn nɩan kamɔn- ʋʋ -nɩn -dhe. Ɔ ˈnaan: ‘Aʋ bhae- Zoova -wɛeˈ ɔ ˈye dhbhonʋʋn- -duuˈˈ -jha ʋʋ ˈye dhɩjhɔ cɛn.’ Ɛɛ ˈbhɔɔa ˈbho ɛ, ɔ -za ˈo dhɛcɩaʋn anˈ 70 ˈˈdhe ɔ dhbhʋbʋ ˈmɛn ˈsɔɔn ˈsɔɔn ʋʋ ye -bo -bhlaaˈ mun Zide ɛˈ gwlɛ ɛˈ klɛɛ ˈdhii. Ʋa ˈtmʋɛn ˈBheɔglɔ ɔˈ dɩ ˈdhe ɲʋn anˈ kpɛ ɛˈ klɛɛ bho. Ʋʋ jhia ˈe Zezi bho dhe ɛ, ʋʋ ˈtmʋʋɔn dhɩ -nʋʋan ˈdhe -bobhlaaˈ ˈmɛn ˈdhe ˈmʋnan ˈdhi. Dhɛ Ɲɔnsaʋn ˈyea nʋn -wɛeˈ ɔ ˈyea -bobhladhbho- i -ɲnan an, ɛ se -nɩn.

Zezi ɔ ˈbɔn -bho ɔ mun ˈe jhaʋn ˈdhi dhe ɛˈ, ɔɔˈ dhɛcɩaʋn ˈye dhbho -ˈnɔn kɔandɩ ɲan kpa. Ɔ -ghwluɛ- ˈe ʋbʋ bho ɔ ˈnaan: ‘Aʋ bhla -bɔyaˈˈ bo da ˈbhlʋa aˈ klɛɛ ˈˈkpe. Aʋ -tɔɔn ɲʋn Ɲɔnsoa aˈ ghwlu -ˈmɛn aʋ -jhaa ʋbʋ ˈˈnin ˈzɔn.’