-Ka Ɲɔnsoa a nʋan ɲʋn -anˈ ˈŋwɔan in anˈ dɩ ˈˈdu sʋn ɛn

Ɲʋn -anˈ ˈŋwɔan in da ˈbhlʋa aˈ klɛɛ ˈˈkpe ɛ, ʋʋ nɩɛn ɲʋn anˈ mliɔn ɔnˈ 70 -nɩn dhɛ ˈˈkpe. ˈˈMuumunˈˈ -ˈˈwe aˈ -ghwlu sʋn anˈ kpɛ nɩan 200 ɔn, ɩmɩn- ʋa jhii dhi -wɛeˈ ʋa ghwlu ˈe ɲʋn bho. Dhɛ -ɛ ˈbhlea -ghwɛe bhla -mɛn -nɩn ɲʋn -anˈ ˈŋwɔan in ɛn, ɲʋn anˈ ˈbhle ʋbʋ -kajɔɔnka. Ɛmɛn- dhɩ nɩan da ˈzɔn da a ˈtmʋn:

• “Dhɛ ɲʋn dea ˈˈjhriɛ ˈˈkpe -mɛn -nɩn ɲʋn anˈ ˈjhe ˈˈmuumunˈˈ -e ɲʋn -anˈ ˈŋwɔan in -kajɔɔnka aˈ ˈbhle sʋn anˈ ˈtee ŋwɔn.”—National Association of the Deaf (U.S.)

• “Ɲʋn -anˈ ˈŋwɔan in -ʋʋ nɩan ˈe ˈbhlʋɩ- ˈdhe ˈdhi ɲʋn sea dhɛ ˈbhle ɛ, ʋʋ nɩɛn ˈe -nɩanˈˈ ɲʋn ˈˈklun. Ɛɛ nʋɛnˈ ʋʋ se ˈbhɛɛ- ʋʋ ˈye -klainˈˈ ˈˈkai pa, ʋʋ ˈye dhbho nʋn -aeˈˈ ʋʋ ˈye dhɩ -ɩan- zia ˈo ˈbhlʋa ˈdhi i ˈŋwɔn.”—World Federation of the Deaf.

Ka ɲʋn -anˈ ˈŋwɔan in anˈ dɩ -nɩn ˈbho Ɲɔnsoa -gwlɩˈˈ -ɛ? Dhɛwɛ- Biiblʋ a ˈtmʋn ˈdhe ʋaˈ dɩ ˈdhi -ɛ? ˈˈDhe -kawɛ Zoova aˈ -Bobhlaʋn an nʋn ʋaˈ sʋn bho -po sʋn ˈzɩan -an?

-Ka Ɲɔnsoa a nʋan ʋaˈ ˈjhe sʋn ɛn

Biiblʋ ˈnaan Ɲɔnsoaa Zoova a naan ɲʋn -anˈ ˈŋwɔan in anˈ dɩ tɔˈ i. Ɔɔ ˈbɔn ɲʋn ˈyʋbʋ ˈbhle -kajɔɔnka ˈˈdhe dhɩ ɔ poa kpɔˈˈ -wɛeˈ ɲʋn ˈyea ɲʋn anˈ klɛɛ dhɛ -tɔɔn ɔn, ʋʋ ˈyɩ ˈjɛɛn ˈdhi ˈjhee- -ke.

Biiblʋ aˈ ˈˈjhriɛ-: “-Manˈ -bhlaa ɲʋn -ɔnˈ ˈŋwɔan zoo i -dhe.”—Lévitique 19:14.

Biiblʋ aˈ ˈˈjhriɛ-: “Ɲɔnsoa aˈ ˈcra ɲʋn inˈ.”—Actes 10:34.

Biiblʋ aˈ ˈˈjhriɛ-: “Zezi ɔ jhii ɛ […], ɔɔ yea ˈBheɔglɔ ɔˈ -bɔyaˈˈ bo bhla.”—Matthieu 9:35.

Biiblʋ aˈ ˈˈjhriɛ-: Zezi nʋɛnˈ “ɲʋn -anˈ ˈŋwɔan in ye i ˈŋwɔn ˈˈdhe ɲʋn -anˈ ghwlua ye -ghwlu.”—Marc 7:37.

Biiblʋ aˈ ˈˈjhriɛ-: “Ɲʋn -anˈ ˈŋwɔan in ɛn, ʋaˈ -dheinˈˈ an muɛn ˈgbai-.”—Isaïe 35:5.

Dhɛ ɛ ˈdhaa: Zoova ˈnaan an, ɲʋn -anˈ ˈŋwɔan in ɛn, ʋa muɛn in ˈŋwɔn-.—Isaïe 29:18.

-Ka Zoova aˈ -Bobhlaʋn an nʋan ɲʋn -anˈ ˈŋwɔan in anˈ sʋn bho -po sʋn ˈzɩan an

Zoova aˈ -Bobhlaʋn an bhla Ɲɔnsoa aˈ -bo -ɔɔ ˈˈɲɩanˈˈ ɲʋn -pɛɛɩtbhadhɛ ˈdhe ˈˈmuumunˈˈ bho da ˈbhlʋa aˈ klɛɛ ˈˈkpe. Ka -aa nʋn ɛɛˈ nʋn sʋn -ɛn? -Aa bhla Biiblʋ ˈˈdhe -aa nʋɛn videe -ɩn tbha ˈo Biiblʋ ˈˈkpei ˈdhe ˈˈmuumunˈˈ ghwlua aˈ 100 dhɛ -nɩn ˈo ˈˈkpe. -Aa tɔɔɛn ɲʋn Biiblʋ ˈˈdhe -aa ˈgbooɛ ˈˈdhrui -ke ˈˈdhe ˈˈmuumunˈˈ -ˈˈwe aˈ ghwlu ˈdhi. Dhɩ -ˈnɩn anˈ klɛɛ -aa nʋan an, -bho ɲɔn ɔn sa ˈbɔn ɔ ˈye Ɲɔnsoa aˈ ɲʋnsʋnbhopoɛ- ˈjɛɛn ˈdhi ˈjhee ɛˈ, ɔɔˈ -to ˈo dhɛ. Dhɛɛdɩ- -ɛ? Dhɛbhleɛ Zezi ˈnaan: “Ɲʋn ˈˈɲɩɛnˈˈ -ʋn ˈˈmɛn ˈˈjhai, -mɛnˈ -ˈˈɲɩɛn ɲʋn ˈˈjhai.”—Matthieu 10:8.

You can access these resources online or download them to your device from the following-Bho -ˈyɩ ˈjhe ˈbho ɛntɛɛnɛtɩ ˈˈkpe -aeˈˈ -ˈyɩ ˈmʋn ˈˈdhuo- -ˈyɩ ˈo -manˈ telefɔnɩn -aeˈˈ ɔdinatɛɛ ˈˈkpe po ɛˈ, -mɛnˈ:

-Bho -mun ˈo JW.ORG ˈˈkpe ɛ, -da ghwlu aˈ desɛn nɩan an, -ˈɲɛn ˈo dhi -wɛeˈ ˈˈmuumunˈˈ -ghwlu -man ˈbɔan an, -ˈyʋ ˈo -za.

-Bho -man JW Library Sign Language i -jhii ɛˈ, po ɛɛˈ aplikasiɔn ˈbho -manˈ telefɔnɩn ˈˈkpe -mɔnˈ ke -wɛeˈ -ˈye video ˈmʋn ˈˈdhuo- -aeˈ -ˈyɩ i ˈjhe.

Dhɩwɛ- -a po kpɔˈˈ Biiblʋ ˈcɩan anˈ dɩ -ɛ?

ˈˈMuumunˈˈ ghwlu aˈ Biiblʋ. Traduction du monde nouveau nɩan ˈe Meikɩkɔʋn anˈ ˈˈmuumunˈˈ ghwlu ˈdhi ɛ, ʋmʋn -nɩn Biiblʋ kɔan ɲan ˈdhe ˈˈmuumunˈˈ ghwlu ˈdhi da ˈbhlʋa aˈ klɛɛ ˈˈkpe. ˈZɩan an, Biiblʋ -ˈnʋn anˈ klɛɛ -aeˈˈ ʋanˈ ˈfɛ -zaa ghwlu i ˈdhe ˈˈmuumunˈˈ ghwlui -duuˈˈ ˈdhi. Zʋn ooˈˈ zʋn ˈkamɔn- ɲʋn an zʋ ghwlui ˈdhe ˈˈmuumun ghwlui -ˈnɩɩn ˈdhi. (-Bho -ˈye ghwlu -ɩn ˈdhe ˈdhi ɲʋn zʋ ghwluiˈ ˈjhe -aeˈˈ -ˈye Biiblʋ i ghwluiˈ -zaa i ˈjhe ˈdhe ˈˈmuumunˈˈ ghwlu ˈdhi i ˈjhe ɛˈ, -mɛnˈ zro -ŋmʋn ˈe ˈˈtɛʋn- “Traduction du monde nouveau en langue des signes” ˈdhi.)

• -ˈJhe video La Traduction du monde nouveau en entier est maintenant disponible en langue des signes américaine i -wɛeˈ dhbho -duuˈˈ ʋʋ nʋan ˈbho ˈˈmuumunˈˈ -ˈˈwe aˈ Biiblʋ aˈ ˈzɔn ˈˈsiaˈˈ a, -ˈyɔ jhibho-.

• -Bho -man sa ˈbɔn -ˈye Biiblʋ -ʋanˈ i ˈŋwɔan sea ˈˈɩkman- ˈjhe ɛˈ, -mɛnˈ nʋn JW Library langue des signes ɛnˈ aplikasiɔn telesaaze ˈbho -manˈ telefɔnɩn ˈˈkpe. Ɛɛ nʋɛnˈ Biiblʋ aˈ ˈˈjhri -ɩanˈ video ɲʋn nʋan -man ˈbɔan ˈyea i ˈjhe ˈdhe ˈˈmuumunˈˈ -ˈˈwe aˈ ghwlu ˈdhi ɛ, -ˈyɩ ˈo -za.

• Dimitro -e Vita nɩɛn ˈˈɲnuunbhleʋn -ʋʋ nɩn ˈˈmuumunˈˈ, ˈklaa ʋaˈ ˈˈɲnuun an ˈŋwɔn in ˈmɛn. -Ka ˈˈgbuzɔncɛ- -ˈnʋn an nʋan Biiblʋ ɲʋn za ghwluiˈ ˈdhe ˈˈmuumunˈˈ ghwlu ˈdhi ˈjɛɛn ˈdhi ˈjhee sʋn zɔn ooˈˈ zɔn ɔn, aʋ deɛ ˈˈjhriɛ ˈˈkpe.

Videe -ɩan- poa ɲʋn sʋn bho ɲʋn an ˈŋwɔan Biiblʋ iˈ ɛ. Zoova aˈ -Bobhlaʋn nʋɛn videe -duuˈˈ ˈdhe ˈˈmuumunˈˈ -ˈˈwe aˈ ghwluiˈ ˈdhi -ɩan- po ɲʋn sʋn bho -wɛeˈ ʋa ˈŋwɔn Biiblʋ i ˈˈdhe ʋa ˈŋwɔɛn ˈsrɩn ˈdhɔɛeˈ ˈdhe...

• ˈˈBhlitiiʋn- -e ˈˈgbuzɔncɛ ɛˈ dɩ ˈdhi.

• Ɲʋnjhae aˈ dɩ ˈdhi.

• ˈˈƝnuun -mɩɩnˈˈ anˈ dɩ ˈdhi.

Biiblʋ ˈcɩan-. Nɔnˈˈ -e -da -man ˈbɔan ɲɔn ˈyea -ʋn -jhɛɛ -wɛeˈ aʋ ˈyea Biiblʋ ˈcɩan an, -manˈ ˈˈjɛ -ˈyeɛ ˈo -za. -Ka Biiblʋ ˈcɩan- ˈyea -nʋʋɛn sʋn nʋn ɛn, dee ɲɔn in ɔ ˈye -ʋn -tɔɔn.

Jezɔnɩn Senajonɔn ˈˈtiaˈˈ ˈo Filipinɩn ɛnˈ, -ka -aaˈ ɲʋn Biiblʋ -tɔɔɛn nʋɔn sʋn bho -po sʋn -wɛeˈ jhbhɛɛ- nɩan ˈo ɔmɔn -e Ɲɔnsoa ˈɲnɩn kuai ɛ, ŋmʋɛn jha.

Mario Antunɛzɩ nɩan pliegbu aˈ ˈˈdhrujhei- ˈdhe Ɔndurasɩ ˈjhe dhɩ ɔ deea ɔɔˈ ˈˈjɛ i ˈdhe Biiblʋ ˈdhi aˈ ˈdhe -zaa ˈmɛn, zro ɔˈ bo -aeˈˈ poɔ -dheinˈˈ bho. Ɔɔˈ bo ka: “J’avais plus de questions que de réponses.”

ˈˈDhruigbooɛ- klaeˈˈ -e -mɩɩnˈˈ. ˈDa ˈbhlʋa aˈ klɛɛ ˈˈkpe ɛ, ˈˈmuumunˈˈ -ˈˈwe a ˈgbooɛ ˈˈdhrui ɲɔnsoagbi- -e kpɛ ˈdhii ʋa yea Biiblʋ ˈcɩan ˈˈdhe ʋa yea Ɲɔnsoa ˈˈɲɩn ˈdhɔɔ ooˈˈ ˈdhɔɔ. Zʋn ooˈˈ zʋn -ke ɛ, -aa poɛ ˈˈdhruigbooɛ klaeˈˈ kpɔˈˈ ˈdhe ˈˈmuumunˈˈ ghwlu ˈdhi -wɛeˈ ɲʋn nɩan ˈˈmuumunˈˈ ˈye Ɲɔnsoa aˈ ghwlu ˈcɩan. ˈDhe -aaˈ ˈˈdhruigbooɛ klaeˈˈ -e -mɩɩnˈˈ -ˈnɩn ˈmʋn ɛn, ɲʋn an za ɲʋn ghwluiˈ ˈdhe ˈˈmuumunˈˈ ghwlu ˈdhi ˈˈdhe ɲʋn -ʋaˈ ˈŋwɔan in ˈˈdhe -ʋaˈ ˈjhea i ɛ, -aa za dhɩ ghwluiˈ ʋaˈ dɩ. Aa bhla ɲʋn -ʋʋ ˈdhɔa aˈ ˈsɛɩ- ɲʋn an ˈdhaa Brai ˈˈdhe ɩn -nɩɛn- ˈˈjhai.

• ˈBɔn ɲɔnsoagbu- ˈˈkʋaan mʋn in.

• Dhɩ -ɩan- nʋʋan -aaˈ ˈˈdhruigbooɛ- klaeˈˈ -e -mɩɩnˈˈ ˈmʋn ɛn, ˈbɔn ɩanˈ in ˈŋwɔɔn in.

• Zezi ɔˈ ˈmɛan anˈ -ˈgwlɩinaanzɔn- nɩan -aaˈ ˈˈdhruigbooɛ kɔandɩ ˈdhe zɔn ˈdhi ɛ, muɛn ˈmʋn.

Zoze Lui Ayala nɩan Mɛsikɩ ɛˈ, ɔɔ ˈghwlʋa -mɛnˈ ɔ -nɩɛn- ˈˈmuumunˈˈ. Ɛɛ ˈbhɔɔa ˈbhɔ ɔ ˈˈdhɔ ɔˈ. Dhɛ poɔ sʋn bho -wɛeˈ ɔ kpa ɲʋn biiblʋtɔɔin nmanˈˈ an, ŋmʋɛn jha.