ˈKmʋn anˈ ˈdhɔɛeˈ ˈmʋn -nɩɛn- ˈdhe 2024 ˈdhi, dhɛwɛ- Biiblʋ a ˈtmʋn ˈdhe ɛˈ dɩ ˈdhi i -ɛ?

ˈBho ɲʋn anˈ -da -duuˈˈ -gwlɩˈˈ ɛ, ɲʋn ˈse ˈkledɩ- -a muan ˈkpa- ˈdhe 2024 ˈdhi ˈˈdhru ˈjhaa ˈbhɛɛ- i. ˈKlaa, dhɩ -ɩan toɛ -ka ˈkmʋn an muan ˈdhɔɛeˈ ˈmʋn -nɩn ɛn. Da ɩn -nɩn -ɛ?

Biiblʋ a ˈˈɲɩɛnˈˈ -aʋ -pɛɛɩtbhadhɛ

Biiblʋ ˈnaan Ɲɔnsoa cɛn ghwlu ɔ ˈye ˈkledɩ- -ɩan nʋɛn ˈˈdhe ɲʋn ˈsea ˈe ˈkmʋn anˈ ɲan -gwlɩˈˈ de i -za. Nɔnˈˈ -dhɛ ˈˈzaan- -sie- ˈo -wɛeˈ Ɲɔnsoa ˈye ‘[-aʋ] ˈˈmiinin anˈ klɛɛ ˈˈjhrii ˈsran ˈˈdhe ˈmɛan ˈse i -nɩn in -dheeka, ˈkwɛ ˈse i -nɩn in, zrɛ -e ipʋʋa ˈse i -nɩn in..’—Révélation 21:4.

-Bho -ˈye dɩ Biiblʋ a ˈtmʋan ˈdhe ˈkmʋn anˈ ɲan anˈ dɩ ˈdhi jhibho- ɛˈ, zro ˈcɩaandhɛ “Une espérance réelle pour des jours meilleurs” ˈdhii.

-Ka Biiblʋ ˈbhɛa ʋn ˈyea aʋ sʋn bho po zɩanˈ an

Biiblʋ a ˈˈɲɩɛnˈˈ ɲʋn -pɛɛɩtbhadh- -ɛ ˈbhɛɛˈ -ɛ ˈye aʋ sʋn bho po aʋ ˈye dhɩsain- ˈdhe aʋaˈ tɔˈ bho -za ˈˈdhe aʋ ˈye dhɩ ˈdhɔɛeˈ -pɛɛ ˈˈɩ tbha. (Romains 15:13) ˈSrɩn ˈdhɔɛeˈ nɩan ˈe Biiblʋ ˈdhi ˈbhɛɛˈ ɩn ˈye aʋ sʋn bho po -ke aʋ ˈye ˈkledɩ- aʋ ˈbhɛɛ aʋ ˈyea ˈjhe zɩanˈ -ka sedhɛbhleɛ -e dhɩ sea ˈˈɩ ˈsrɛ -e ˈghwɛ nɩan an, aʋ ˈyɩ ˈˈdhru ˈjha.

Aʋ -ŋmʋn -ka Biiblʋ nʋan ˈˈjhu dhueˈ -ɔ ˈbhɔɔa ˈˈɩ ˈdhe sedhɛbhleɛ ˈdhi sʋn bho -po sʋn -wɛeˈ ɔ ˈjhea ˈflɛ -e -bɔyaˈˈ a. Aʋ ˈjhe video nɔn in Juan Pablo Zermeño : Jéhovah m’a donné une vie pleine de sens.
Aʋ -ŋmʋn -ka Biiblʋ ˈbhɛɛa ʋn ˈyea aʋ sʋn bho po -bho aʋaˈ -pɛɛ ɛ sa aʋ dɩ ˈˈbhli kpa, aʋ se ˈmʋnan ˈin -nɩn, aʋa sa -zɔnˈ ˈˈdu ˈˈdhe aʋaˈ ɲɔn ˈmɛn ɛnˈ. Aʋ zro ˈcɩaandhɛ “La Bible peut-elle m’apporter du réconfort ?” ˈdhii.
Aʋ -ŋmʋn -ka ˈɲnʋnkpaoˈ dhueˈ nɩan ˈsʋlai -dhe -ʋan ˈjheaˈ ʋanˈ ˈˈjɛ -dhe -ka ɲɔn -ɔ sea -ghwɛe- ˈdhi -nɩn ˈˈdhe -ɔɔˈ dɩ sea ɲʋn anˈ dɩ -nɩn nʋan -pɛɛɩtbhadhɛ ˈjhe sʋn ˈdhe Biiblʋ ˈdhi ɛ. Aʋ ˈjhe video nɔn in J’ai déposé les armes..

Nʋɛn mɔn -e -manˈ ˈˈgbuzɔncɛ ɛˈ ˈkmʋn ˈye ˈdhɔɛeˈ ˈmʋn -nɩn ˈdhe 2024 zʋn ˈdhi. -Ka Biiblʋ ˈbhɛɛa ʋ ˈyea aʋ sʋn bho -po sʋn nʋn ɛn, aʋ ˈcɩan dhɩ -duuˈˈ ˈdhe ɛɛˈ dɩ ˈdhi. -Ka -a -nɩn ɲʋn an nʋan Biiblʋ ˈcɩan sʋn ˈˈjhai ɛ, aʋ ˈdɩɛn aʋ ˈyeɛ ˈjhe. Aʋ ˈcɩan -ka Ɲɔnsoa ˈbhɛɛa ɔ ˈyea aʋ “ˈflɛ” ˈˈɲɩn ˈzɩanˈ ˈˈdhe ɔ ˈyeɛ nʋn aʋ ˈyea ‘-pɛɛɩtbhadhɛ ˈbhle ˈˈdhe aʋaˈ ˈkmʋn anˈ ɲan ˈyea ˈdhɔɛeˈ ˈmʋn -nɩn.’—Jérémie 29:11.