Ɲʋnkpaeˈ aˈ ˈdheifuɛ-​—Dhɛ Biiblʋ a ˈtmʋan

“-Da ˈɩn nɩan ˈˈjhu ˈˈzaan an, ˈman ˈdhoudhi -ɲmau ɔɔ bhla ʋnˈ ˈmɛn ˈˈdhe ɔɔ ˈˈjree ˈmʋn ˈmɛn zɔn ooˈˈ zɔn. ˈƖn poa dhɛ -jeɛˈ ɛ, ɛmɛn- ˈman -kʋan ˈdhou a nʋn -ke. Ʋmʋn -e ʋanˈ -kʋan ˈbhle ʋnˈ ˈmɛn -ka ʋaˈ -kʋɔn nɩan. Ɛ nʋɛnˈ ˈman ˈˈjɛ dhbhaaˈ aˈ ˈtʋn ˈˈjhiɛ ˈo -gwlɩˈˈ.”​—Madu,a Ɛndɩ

“ˈBhlʋɩ aˈ klɛɛ ˈdhii ɲʋn an nʋɛn ˈɲnʋnkpaeˈ dhɩsaɩn ˈˈdhrui”, ˈkamɔn- l’Organisation mondiale de la santé ˈdha. Ɛ ˈnaan -bho ɲʋn ˈˈdhuo- ˈɲnʋnkpaeˈ taan ˈmʋn ɛn, ˈdhe ʋbʋ ˈˈklun ɛn, dhueˈ -nɩn ˈe ɲʋn an nʋn ˈˈdruu- ˈˈdhrui, ɲʋn an nʋn bhla -za dhe -aeˈˈ ɲʋn ˈˈkpa ˈˈkpe ˈdhe ʋanˈ ˈkmʋn ˈdhi.

-Bho ɛɛˈ dhɛ tu -jhii aʋbʋ i kpɔ dhueˈ ɛˈ, ɛɛ ˈbhɛɛ- ɛ ˈyeɛ nʋn -da ooˈ-da aʋa muan -mun ɛn, ʋa ˈye -zɔnˈ ˈˈdu dhɛ ɲʋn -seaˈ aʋ bhla -aeˈˈ ɲʋn-seaˈ aʋ ˈˈkpe ˈˈkpa ɛɛˈ dɩ. Ɛɛˈ dhɛ tu ˈbhɛɛ ɛ ˈye nʋn ˈsʋ ˈbho aʋ -gwlɩˈˈ ɛ, dhɛ ɲʋn an bhla ˈɲnʋnkpaeˈ ˈˈdhe ɲʋn an ˈkpʋbʋ ˈˈkpe ɛ, ɛɛˈ dhɛ tu ɛɛˈ ˈdha ɲʋn anˈ -da -duuˈˈ ka aˈˈ.’ ˈKlaa -kawɛ ˈɲnʋnkpaeˈ aˈ dɩ -nɩn ˈdhe Ɲɔnsoa -mɔnˈ ˈˈjhriɛ ˈdhe -ɛ?

-Kawɛ Ɲɔnsoa a ˈjhe ˈɲnʋnkpaeˈ -ɛ?

Biiblʋ aˈ ˈˈjhriɛ-: “Ɔ nʋbʋ ˈmɛn, ɲmau- -e ˈɲnʋnkpaoˈ.”​—Genèse 1:27.

Dhɛ ɛ ˈdhaa: Ɲɔnsoa nʋn- ɲmau -e ˈɲnʋnkpaoˈ. ˈDhe ɔ ˈˈjhriɛ ˈdhe ɛ, ɲʋn ˈye -ka ʋʋ nɩan ˈsɔɔn ŋwɔn ˈjhe. ˈBho -mɛnˈ ˈdhe ɔ ˈtmʋʋn- -kʋan ɔ ˈnaan ɔ “kman ɔɔˈ ˈɲnɔn ɔnˈ dɩ -ka ɔ kman ɔɔˈ ˈˈjɛ ɛˈ dɩ,” ˈˈdhe ɔɔˈ ˈbɔn ʋanˈ ŋwɔn ˈˈdhru -deaˈ i -dhe ˈbho ʋanˈ ghwlu -saʋn i ˈtmʋʋn- -nanˈ -aeˈˈ ˈbho ʋanˈ ˈˈdruun- ˈˈdhrui nʋanˈ. (Efɛsɩ-Kɔʋn 5:33, Kolɔsɩ-Kɔʋn 3:19) Ɲʋn ˈŋwɔɛn in ˈmɛn -ka ˈɲnʋnkpaeˈ kɔandɩ ˈjɛɛn ˈdhe Ɲɔnsoa ˈˈjhriɛ ˈdhe ɛ.

“-Da ˈɩn nɩan ˈˈjhu ˈˈzaan -dhe ɛ, ɲɔn dhueˈ ˈdhe ˈman ˈˈjɛ ɛˈ ˈcɛ ˈˈklun -ɔ ˈkpa ʋnˈ ˈˈkpe. -Da ˈɩn ˈbhlea zɩn anˈ 17 ɔn, ˈman dhbhojhei- ˈnɛn ˈʋn mlanˈˈ ɔ -nɩn ˈye i ˈpɛn. Ɔ ˈnaan -bho ˈɩn se ˈo ˈŋwɔɔn ɔnˈ, -mɛnˈ ɔ ˈye ʋnˈ -jieˈˈ po. ˈƖn ˈkpa ɲɔn ˈjɔɔn ɔn, ˈman -kʋan -e ˈman ˈcɛ -e ɲʋn -nɩn ˈɩn ˈˈkʋaan in ˈdhbhaa ˈmʋn dɩn ˈˈɩ. Ɛɛ ˈbhɔɔa ˈbho ɛ, ˈɩn ˈcɩan Zoovab, -aaˈ -nʋʋin ɔnˈ jhibhɛ- ˈmɛn. ˈƝnʋnkpaeˈ ˈdha dhɛ ˈdhe ɔ ˈˈjhri ˈdhe. Ɛ poɛ ʋnˈ sʋn bho ˈɩn yeɛ -gwlɩˈˈ de -ka ɔ kman ˈman ˈdɩ ˈˈdhe ˈɩn ˈdha dhɛ ˈjɛɛn- ˈdhe ɔ ˈˈjhri ˈdhe ɛ.”​—Maria, Aazantinɩn.

Dhɛwɛ- ˈbhɛɛ -ɛ ˈye aʋ sʋn bho po -wɛeˈ aʋaˈ -pɛɛ ˈye ˈˈghwee- dɩ ˈbhɔ -ɔ?

Biiblʋ aˈ ˈˈjhriɛ-: “Dhaiˈˈ -nɩn ˈo -ɔɔ kpʋn ˈo ɲʋn ˈˈbun -ɔ-zii ɲɔn -nɩn ˈghwlʋa ˈdhou dhueˈ ˈdhi.”​—Proverbes 18:24.

Dhɛ ɛ ˈdhaa: Dhaiˈˈ -ˈˈwe ˈjɛʋn an muɛn ʋa sʋn bho -po. -Bho aʋa sa ˈbɔn ɔnˈ, ɲɔn -ɔ nɩan -gwlɩˈˈ -de ka a, aʋ ˈtmʋʋɔn dɩ nɩan ˈbho aʋ -gwlɩˈˈ.

“Ɛɛ nʋɛn zɩn anˈ 20 ˈɩn ˈse ɲɔn ˈtmʋʋn- kpɔ dhueˈ -ka ɲɔn ˈkpa ʋnˈ ˈˈkpe ɛ. Ɛɛ dhɛ tu ɛ, nʋɛnˈ ˈɩn se ˈmʋnan ˈin -nɩn, ˈman ˈˈzruu ˈˈdhe ˈman sɔlɔˈ. ˈKlaa dɩ nɩan ˈbho -gwlɩˈˈ ˈɩn ˈtmʋan ɩanˈ dɩ ˈdhe ɲɔn dhueˈ -ɔɔ ˈbɔan ˈman -dheinˈˈ bho -poɛ i ɛ, -ka ɲɔn ɔnˈ -za ʋnˈ gbɛˈ ˈˈdhru ɛ, ˈkamɔn- ɛ -nɩn.”​—Elifʋ, Tiikɩ.

Biiblʋ aˈ ˈˈjhriɛ-: “Aʋ ˈˈvile- aʋaˈ -zɔnˈdɩ ˈbho [Ɲɔnsoa] ˈˈkpe, ˈklaa ɔɔ ˈˈduɛ aʋaˈ dɩ.”​—1 Piɛɛ 5:7.

Dhɛ ɛ ˈdhaa: -Bho aʋa sa bhae ɛˈ, Ɲɔnsoa a poɛ aʋaˈ bhaeghwlu -dheinˈˈ bho ˈjɛɛn-. (Psaume 55:22; 65:2) Dhɛ ɔɔ ˈˈduaˈˈ aʋaˈ dɩ ɛ, ɔ ˈbhɛɛˈ ɔ ˈye aʋ sʋn bho po aʋ ˈyeɛ i ˈŋwɔn -ka aʋ kaɔn dɩ ˈdhe ɔ ˈˈjhriɛ ˈdhe ɛ.

“Dhɛ ˈɩn ˈcɩan Zoova aˈ jhibhɛ ɛ, ɛ poɛ ʋnˈ sʋn bho ˈman -pɛɛ ye ˈˈghwee- dɩ ˈbhɔ. -Kaanbhla a, ˈɩn ˈbhɛɛ ˈye dhɩ nɩan ˈo -gwlɩˈˈ Ɲɔnsoa ˈtmʋʋn- ˈdhe bhaeghwlu ˈdhi. Ɔɔˈ dhaiˈˈ -tu ɛ, dhɩ -ɩan- kpʋan ʋnˈ -glʋˈ ɛ, ɔɔ ˈŋwɩɩn ˈmɛn -kajɔɔnka.”​—Ana, Belizɩ.

Ɲɔnsoa a muɛn -nʋn ˈɲʋnkpaeˈ aˈ ˈkle ˈˈduɛ- ˈye i -ɲnan -an?

Biiblʋ aˈ ˈˈjhriɛ-: “Zoova a [ . . . ] muɛn ɲʋn sea ˈcɛ ˈbhle -e ɲʋn, ɲʋn an ˈˈduaˈˈ ˈkle aˈ dɩ ˈˈɩ ˈsrɛɛ-, ˈˈdhe ɲɔn ooˈˈ ɲɔn sʋbʋ -faʋnˈ -poi -dheeˈ ka.”​—Psaume 10:17, 18.

Dhɛ ɛ ˈdhaa: Ɲɔnsoa a muɛn dhɩ sea ˈˈɩ ˈsrɛ i -za. ˈDhe ɩanˈ dhɩ tu ˈˈklun ɛn, dhɩŋwɔɲniɛn- -e dhɩsaɩn ɲʋn an nʋan ˈɲnʋnkpaeˈ ˈˈdhrui -nɩn ˈe ˈmɛn -ke.

“Dhɛ ˈɩn jhibhi bhla -ka Zoova a muan ˈɲnʋnkpaeˈ -e ˈɲnʋnkpaeˈ -mɩɩnˈˈ anˈ ˈkle ˈˈduɛ- i -za a, ɛɛˈ dhɛ tu -bhlua- ˈman -pɛɛ ˈmɛn.”​—Robɛɛta, Mɛsikɩ.

-Bho aʋa sa ˈbɔn aʋ ˈye dhɩ -duuˈˈ i ˈŋwɔn ˈdhe -pɛɛɩtbhadhɛ -ɛɛˈ dɩ Biiblʋ a ˈtmʋan -e dhɛɛdɩ- aʋ ˈyea ɩanˈ dhɩ tu -gwlɩˈˈ de -e -ka Zoova aˈ -Bobhlaʋn ˈbhɛɛa ʋʋ ˈyea aʋ sʋn bho po ˈzɩan ˈdhe Biiblʋ aˈ ˈsaa ˈmʋn i ˈŋwɔn ɔnˈ, aʋ ˈcre -wɛeˈ ɲʋn ˈye aʋ ˈˈɩ dee- -nanˈ jhi.

Aʋ ˈˈdhuo- ˈsɛɛ nɛn ɛnˈ -jɛn ɲʋn ˈbhɛɛa ɲʋn ˈyea jri ˈmʋn.