Ablaamʋn -e Sara ˈjheɛ Ɲɔnsoa ŋwɔn

ˈBho Babɛlɩ glɔ ˈˈbun ɛn, ˈˈkwiglɔ- dhueˈ -nɩn ˈo ɔɔˈ ˈɲnɩn -mɩn Uu. Ɲʋn ˈˈtia ˈo ˈˈkwiglɔ- -ˈnɔn ˈdhi ɛ, ʋa gbeeɛ gɩlɩ ˈsrɩ ˈˈjhibhaˈ. Ʋaˈ -gbɛɛ Zoova ˈˈjhibhaˈ. ˈKlaa ˈbho ˈˈkwiglɔ- -ˈnɔn ˈdhi ɛ, ˈˈjhu dhueˈ -nɩn ˈo -ɔɔ gbɛɛ Zoova aˈ ˈsʋ ˈˈjhibhaˈ. Ɔɔˈ ˈɲnɩn -mɩn -nɩn Ablaamʋn.

Zoova ghwluɛ ˈe ɔ bho ɔ ˈnaan: ‘ˈGhwlʋ ˈe -manˈ ˈˈgbuzɔncɛ ˈˈklu, mun ˈdhe ˈbhlʋa- dhueˈ ˈman muan ʋn -tɔɔn ˈdhi.’ ˈBho ɛ ˈdhe ɛ, Ɲɔnsoa cɛn ghwlu ˈdhe ɔ bho ɔ ˈnaan: ‘-Man muɛn ˈcɛ -duuˈˈ ˈkpa- ˈˈdhe ˈdhe -manˈ dɩ ˈmʋn ˈman muɛn ɲʋn -duuˈˈ dhɛjɛɛn ˈˈdhrui -nʋn da ˈbhlʋa ˈˈkpe.’

-Da Zoova a ˈbɔan Ablaamʋn ˈyea mun -dhe ɛ, ɔ se ˈo jhibho- ˈklaa ɔ deɛ Zoova -gwlɩˈˈ. Ablaamʋn -e ɔɔˈ ˈɲnɔn Sara -e ɔɔˈ ˈˈbho Tera -e ɔɔˈ ˈdhoudhi ɔˈ ˈˈjhu Lɔtɩ ˈjheɛ Ɲɔnsoa aˈ ghwlu ŋwɔn. Ʋʋ poɛ ʋaˈ gbɩˈ ˈkpa ʋʋ ye ˈdhebhaˈ mun.

-Da Zoova a ˈbɔan Ablaamʋn ˈyea mun -dhe ɛ, ɔɔ ɲnian ˈo ɛ, -ˈmɛn ɔ ˈbhleɛ zɩn anˈ 75. ˈBhlʋa- ɔ muan ˈo ˈdhi ɛ, ɔɔˈ ˈɲnɩn -mɩn -nɩn Kanaan. ˈBho -mɔn Zoova cɛn ghwlu ˈdhe ɔ bho ɔ ˈnaan: ‘ˈBhlʋa nɔn ɔnˈ klɛɛ -man ˈjhea i ɛ, ˈman muɔn -manˈ ˈˈɲnuun ˈˈɲɩn-.’ Ablaamʋn -e Sara se ˈˈjhu ˈbhle -dhe. -ˈMɛn -kawɛ Zoova ˈye nʋn -wɛeˈ ghwlu ɔ cɛan ˈye ˈo ɲnin -ɛn?