Ʋʋ ˈghwlʋɛ ˈˈjhu bhla!

Ablaamʋn -e Sara ˈˈtiia ˈˈbhli ɛ, ɛɛ nʋɛn -zɩn -duuˈˈ. Ʋbʋ aˈ ˈˈgbu nmɔan ˈˈjhrii -ʋn nɩan Uu ɛ, ʋmʋn- ʋʋ ˈghwlʋ ˈo ˈdhi -wɛeˈ ʋʋ ˈˈti -pooˈˈ zɔnˈ in. Sara -ˈmʋn ɛn, ʋn ˈse ˈcɛn ˈkpa dhɛ nɩan ˈo ɛ, ʋn deɛ Zoova -gwlɩˈˈ.

Sara a ˈbɔn ˈjɛɛn- ʋn ˈye ˈˈjhu ˈghwlʋ ɛɛˈ dɩ ʋn -ghwlu ˈdhe Ablaamʋn bho ʋn ˈnaan: ‘-Bho ˈman dhbhonʋn- -ɲnunkpaoˈ Agaa ˈbhle ˈˈjhu -dhe ˈdhe, ɛ se ˈˈjhrii -nmɔn? Ɛɛ muɛn -nʋn -ka ɔɔˈ nɩan ˈman ˈˈjɛ ɛˈ ˈˈjhu ɛ, ɔ ˈye anˈ -nɩn.’ Nɔnˈˈ -ziia- ˈbho ˈsʋ ɛ, Agaa -ŋmaanˈ ʋn ˈghwlʋɛ ˈˈjhu ɲmau-. Ɔɔˈ ˈɲnɩn -mɩn Isimaɛlɩ.

-Zɩn -pla zia, -da Ablaamʋn ˈbhlea zɩn anˈ 99 ˈˈdhe Sara ˈbhlea zɩn anˈ 89 ɛn, ˈdhɩbhʋ- taan jhi ˈbho ʋbʋ ˈˈŋwɛn. Ablaamʋn ˈdhʋbʋ ˈmɛn ʋʋ ˈye -fɔn dhɛzaan ˈbho tu -zɔnˈ -wɛeˈ ɔ jhʋbʋ dhiidhɛ-. Jhibho- ˈdhɩbhʋ- -ˈnʋn ˈmɛn? Ɛ nɩn dhbhoozii-! Ɩn ghwluˈ ˈdhe Ablaamʋn bho ɩn ˈnaan: ‘-Zʋn -an jhia ˈdhe nɔnˈˈ nɩan dhueˈ nɔn ˈdhi -manˈ ˈɲnɔn ɔn muɛn -ŋmaan ʋn ˈye ˈˈjhu ɲmau ˈghwlʋ.’ Sara -ˈmʋn -nɩɛn ˈe -pooˈˈ ˈdhi -dhe ʋan yea dɩ ʋa ˈtmʋan -dheinˈˈ bho po. -Wɛeˈ ʋan ˈkelɛ ˈdhe ʋanˈ -pɛɛ bho ʋn ˈnaan: ‘ˈMɔn ˈbhɛɛˈ ˈjɛɛn- ˈye ˈˈjhu ˈghwlʋ? ˈMɔn- nɩan ˈgɩlaˈˈ a.’

-Zʋn dhueˈ zia, Sara -ŋmaanˈ ʋn ye ˈˈjhu ˈghwlʋ -ka Zoova nʋan ɛɛˈ ˈtmʋn sʋn ɛn. Ablaamʋn ˈdhɔɔ Izaakɩ, dhɛ -ˈmɛn ˈdhaa ɛmɛn- -nɩn “ˈKelɛɲnɩn-.”

Izaakɩ ˈbhlea -zɩn -mmˈˈ ˈsʋ ɛ, Sara deɛ ˈˈjhriɛ ˈˈkpe -ka Isimaɛlɩ ɔ ghwlɔɔ -zɔn -dhee -ˈnɔɔn ɔn. Ʋn ˈsea ˈbɔn dhɛsaʋn- ˈyea ʋanˈ ˈˈjhu ˈjhe ˈsʋ ɛ, ʋn ˈtmʋʋn Ablaamʋn ˈmɛn ɔ ˈye Agaa -e Isimaɛlɩ i nʋn. Ablaamʋn ˈŋwɩn -tɛnˈˈ -dhe ɛ, ɛ ˈseɔ ˈtʋn nʋn. ˈKlaa Zoova -ghwluɛ- ˈe Ablaamʋn bho ɔ ˈnaan: ‘Po dhɛ -manˈ ˈɲnɔn Sara ˈtmʋan -dheinˈˈ bho. ˈMan muɛn ˈˈjhuzaan- Isimaɛlɩ ɔˈ dɩ duˈˈ. ˈKlaa ˈdhe Izaakɩ ˈmʋn -mɔn dhɩ -ɩanˈ ghwlu ˈɩn cɛan ˈye ˈo ɲnin.’