Ɔɔˈ dhɛgwlɩdeɛ- ˈdɩɛn- in

Ablaamʋn poɛ ɔɔˈ ˈˈjhu Izaakɩ sʋn bho ɔ ye Zoova aˈ dɩ -kman ˈˈdhe dhɩ aˈ klɛɛ -ɩanˈ ghwlu ɔ cɛan ɔ yɩ -gwlɩˈˈ de. Izaakɩ ˈbhlea zɩn anˈ 25 ɛn, Zoova ˈnaan Ablaamʋn nʋn dhɛ dhueˈ -ɛɛˈ nʋanˈ -kmanˈˈ ˈjɛɛn-. Dhɛwɛ- ɔ deeɔ i ɔ ˈye nʋn -ɛn?

Ɲɔnsoa -ghwluɛ- ˈe Ablaamʋn bho ɔ ˈnaan: ‘-Kɔngɩnˈ, mun ˈdhe ˈbhlʋa- ɲʋn an ˈdhaa Moria ˈdhi. -Bho ɲnin ˈe ɛˈ, -ˈmɛn -zaa -ˈman ˈˈjhu nɩan dhueˈ gbai ˈsraa ˈdhe trʋ dhueˈ ˈˈkpe.’ Dhɛɛdɩ- Zoova a deea Ablaamʋn ɛɛˈ dhɛ tu i ɛ, ɔ seɛ jhibho- ˈsʋ ɔ yeɔ ŋwɔn ˈjhe.

-ˈGlaepɛɛn, Ablaamʋn ˈˈdhuɛ- Moria aˈ jie ˈmʋn ˈmɛn. Ɔmɔn- -e Izaakɩ -e ɔɔˈ dhbhonʋʋn- ˈsɔɔn -e. Ʋʋ nanˈ ˈghwɩ taan -wɛeˈ ʋa ye trʋ ʋa muan ˈo ˈˈkpe ɲan ˈjhee-. Ablaamʋn ˈtmʋʋn- ɔɔˈ dhbhonʋʋn ˈmɛn ʋʋ ˈyʋbʋ -fuo- -wɛeˈ ɔmɔn -e Izaakɩ ˈye ˈsraa -zaaˈ mun. -Nae- ɔ ˈyea nɛn -dbhaa, ɔ ˈˈɲɩn Izaakɩ ɔ ˈyɩ ˈbhle -wɛeˈ ɔɔˈ ˈˈjɛ ˈbhle -baa kwa. Izaakɩ deeɛ- ɔɔˈ ˈˈbho i ɔ ˈnaan: ‘Nmiin -jɛn -a ˈyea ˈsraa -zaa, dɛ -nɩn -ɛn?’ Ablaamʋn -ghwluɛ ˈe ɔ bho ɔ ˈnaan: ‘Zoova aˈ ˈˈjɛ ɛ muɛn -aʋ nmiin -ˈnɛn ˈˈɲɩn- ˈman ˈˈjhu.’

Ʋʋ ɲnian ˈo trʋ ˈˈkpe ˈsʋ ɛ, ɔ nʋɛn ˈsraakpezaadhɛ-. Ablaamʋn san ɔɔˈ ˈˈjhu Izaakɩ ɔˈ bhɩ -e sɩn in -wɛeˈ ɔ poɔ ˈo ˈsraakpezaadhɛ- ˈˈkpe.

Ablaamʋn ˈˈdhuɛ -baa ˈmʋn. Ɔɔ ˈbɔan ɔ ˈyea ɔɔˈ ˈˈjhu ˈsraa -zaa ˈsʋ ɛ, dhbhoozuu-dhueˈ ˈdhɔɔ ˈdhe jhaʋn ˈdhi ʋn ˈnaan: ‘Ablaamʋn! -ˈMan nʋn -ˈman ˈˈjhu dhɛsaʋn ˈˈdhrui -dhe! Ɩn ˈjheean ˈmɛn bhla -ka dea Ɲɔnsoa -gwlɩˈˈ ɛ, ɛmɛn- dɩ -man ˈbɔn -ˈye -ˈman ˈˈjhu ˈsraa -zaa.’ Ablaamʋn nʋan ka -dhe ɛ, ɔ ˈjheɛ ˈbhlagblɔ- -ɛ -ˈŋmɩn mɔn ˈe ti ˈɲnɩn bho. Ɔ ˈˈdoo ɔ ye Isaakɩ i bɔin- -wɛeˈ ɔ -zaa ˈbhlagblɔ- -ˈnɛn ˈsraa ˈbho ɔɔˈ gɔˈˈ.

-Ɛ ˈghwlʋa ˈo ɛɛˈ -zɔn -tu ˈdhi -dhe ɛ, Zoova ˈnaan Ablaamʋn -nɩɛn- ɔɔˈ dhaiˈˈ. Dhɛɛdɩ- -ɛ? Dhɛ nɩan ˈo ɛ, dhɛ Zoova a deea Ablaamʋn in ɛn, ɛmɛn- ɔɔ nʋn jheejhee -bho dhɛ ɔɔ deeɔ i ɔɔˈ ˈŋwɔɛin -zɔn -dhee -ˈnɔɔn mɔn -dhe ɛˈ.

Ghwlu Zoova cɛan ˈdhe Ablaamʋn bho -dhe ɛ, ɔ zʋ dhe -kenɛnˈ ɔ yeɔ ˈtmʋʋn- ɔ ˈnaan: ‘ˈMan muɛn ʋn ˈˈniman -po, -ˈman ˈˈɲnuun an muɛn ˈˈɩ -di.’ Ɔ cɛn ghwlu -ke ɔ ˈnaan ɔɔ muɛn ɲʋn anˈ klɛɛ -ʋʋ kpʋan ˈbho ɔ ˈˈbuin ˈˈnimanˈ -po Ablaamʋn ɔnˈ ˈˈɲnuun anˈ dɩ.