Raabʋ ˈˈduɛˈˈ ɲʋn muan ˈˈkwiglɔ- jha -ŋmʋanˈ in

Israɛkɔʋn ˈsɔɔn muan ˈˈkwiglɔ- jha -ŋmʋanˈ ɲnian Zeliko ɛ, ʋʋ ˈˈtiɛˈˈ ˈdhe ˈɲnʋnkpaoˈ dhueˈ ɲʋn an ˈdhaa Raabʋ bho ˈˈgbu. Zeliko aˈ ˈbheɔ ˈŋwɩɩn ɛn, ɔ dhbhoɛ ˈsʋlɩˈˈ ˈdhe Raabʋ ˈˈŋwɛn. Ʋn ˈˈduɛˈˈ ɲʋn ˈsɔɔn -ˈnʋn in ˈdhe ʋanˈ ˈˈgbu ˈˈdhru ˈˈdhe ʋn ˈtmʋʋn ˈsʋlɩˈˈ ʋn ˈnaan ʋʋ -muuɛn- -da -dhee -ˈnɔɔn. Ʋn -ghwluɛ- ˈe ɲʋn muan ˈbhlʋa jha -ŋmʋanˈ bho ʋn ˈnaan: ‘ˈMan muɛn aʋ sʋn bho -po dhɛ nɩan ˈo ɛ, ˈɩn jhibhiˈ -ka Zoova -nɩn aʋ -nan ˈˈdhe ɔɔ muɛn aʋ sʋn bho -po aʋ ˈye ˈbhlʋa- nɔn kpʋn. Aʋ -kɔngɩnˈ, aʋ cɛn ghwlu -ka aʋa muan ˈmɔn -e ˈman ˈˈgbuzɔncɛ ˈpʋʋ- ɛ.’

Ʋʋ -ghwluɛ ˈe Raabʋ bho ʋʋ ˈnaan: ‘-Aa cɛn ghwlu da a ˈˈjhibhaˈ, ɲɔn -ɔɔ muan ˈnɔn a bho ˈˈgbu -nɩn ɛn, dhɛ ˈseɔˈ -nʋn in.’ Ʋʋ ˈnaan: ‘A san dhbhuˈˈ -zaan in ˈbho aaˈ ˈˈgbu aˈ fenɛtrɩ ˈˈɩ ˈˈdhe a mɔn -e aaˈ ˈcɛ ˈye ˈpʋ.’

Raabʋ nʋɛn dhbhuˈˈ -wɛeˈ ʋn -jhaa ɲʋn muan glɔ jha -ŋmʋanˈ ˈbho ʋanˈ fenɛtrɩ ˈˈɩ. Ʋʋ muɛn ˈˈmaanˈˈ ˈdhe trɩ ˈˈkpe. Ʋʋ nʋɛn ˈghwɩ taan ˈdhemɔn -wɛeˈ ʋa ye ˈe Zozue bho dhe mun. Israɛkɔʋn cɛn Zudɛn nin ˈmɛn ˈˈdhe ʋʋ poɛ ʋaˈ ˈˈjɛ kpɔ ɔˈˈ -wɛeˈ ʋʋ ˈye ˈbhlʋa- -ˈnɔn kpʋanˈ mun. ˈˈKwiglɔ- kɔan ɲan ʋʋ kpʋan mɔn -nɩn Zeliko. Zoova ˈnaan ʋʋ -nan ʋʋ ˈye ˈˈkwiglɔ- bin kpɔ dhueˈ ˈdhe zɔn ˈdhi, ʋʋ ˈyeɛ nʋn ˈdhe ˈghwɩ -mɛoˈˈ- ˈdhi. ˈGhwɩ aˈ -ˈˈmɛsɔnˈ -zɔn ɔn, ʋʋ -nanˈ ʋʋ ˈye ˈˈkwiglɔ- bin kpɛ -ˈˈmɛsɔnˈ. ˈSraazaʋn- bhla -gaʋn- ˈˈdhe ˈsʋlɩˈˈ ˈˈghwɔɔˈ -dhe ˈjɛɛn-. ˈSʋ ˈˈkwiglɔ ɔˈ -bhleˈ a bhlu! ˈKlaa Raabʋ aˈ ˈˈgbu nɩan ˈo -bhloˈ -gwlɩˈˈ ɛ, ʋn ˈse bhlu. Raabʋ -e ʋanˈ ˈˈgbuzɔncɛ ˈpʋʋ- dhɛ ʋn dea Zoova -gwlɩˈˈ -dhe ɛɛˈ dɩ.