Zoova aˈ ˈsʋlɩˈˈ nɩan nɛn ɛnˈ ˈsʋ

Sirikɔʋn anˈ ˈbheɔ -ɔɔˈ ˈɲnin -nɩan- Bɛnadadɩ ɛ, ɔɔ kpa Israɛkɔʋn tʋ ˈˈbhli -zɔn -nɔɔn-. ˈKlaa ɲʋn an kpʋn Israɛkɔʋn anˈ ˈbheɔ, dhɛ nɩan ˈo ɛ Elize ɔ zelɔ -glʋˈ. ˈSʋ Bɛnadadɩ naan ɔ ˈye Elize kpʋn. Ɔ ˈŋwɩɩn -ka Elize nɩan ˈbho ˈˈkwiglɔ- ɲʋn an ˈdhaa Dotanɩn ˈdhi ɛ, ɔ dhbhoɛ ɔɔˈ ˈsʋlɩˈˈ ʋʋ ˈyeɔ ˈkpʋanˈ mun.

Sirikɔʋn anˈ ˈsʋlɩˈˈ ɲniɛn ˈbho Dotanɩn ˈˈmaʋn. -Glaeˈˈ pɛɛn, Elize ɔˈ dhbhonʋin ɔn sɔan ˈmʋn ˈsʋ, ɔ ˈjheɛ ˈsʋlɩˈˈ -duuˈˈ -ʋʋ bɩn ˈˈkwiglɔ-. -Faʋan nʋɔnˈ ˈsʋ ɔ ˈˈgwɔɔˈ ɔ ˈnaan: ‘Elize, dhɛwɛ- -a ˈye nʋn bhla -a?’ Elize -ghluɛ- ˈe ɔ bho ɔ ˈnaan: ‘Ɲʋn -nɩn -a nan, ʋʋ -diɛˈˈ ʋʋ ye ɲʋn -nɩn ʋʋ nan -zii.’ ˈDhe ɛɛˈ ˈˈnɔn tu dhi ɛ, ˈbhomɔn- Zoova nʋɛnˈ Elize ɔˈ dhbhonʋin- ye -seeˈˈ- -e ˈsʋlɩˈˈ nɩan nɛn ɛnˈ sʋ ˈjhe ˈdhe trʋ ˈˈkpe.

Sirikɔʋn anˈ ˈsʋlɩˈˈ a ˈbɔanˈ ʋʋ ˈyea Elize kpʋn ˈsʋ ɛ, Elize bhaeɛ- Zoova ɔ ˈnaan: ‘-Kɔngɩnˈ nʋɛn ʋaˈ ˈˈjhri ˈye ˈˈdhɔ.’ Ʋʋ nʋan ka dhe- ɛ, -bho ʋʋ ˈbhɛɛˈ ʋʋ ˈye i ˈjhe mɔn -dhe ɛˈ, -da ʋbʋ nɩan ʋʋ se ˈo ˈˈɩjhibho- -dheeka. Elize -ghwluɛ- ˈe ʋbʋ bho ɔ ˈnaan: ‘ˈˈKwiglɔ- aʋa ˈbɔan aʋ ˈyea ˈe ˈdhi mun ɛn, ɛ se ɔmɔn -nɩn da -nɩn. Aʋ bhla ˈo ˈdhe, ˈˈjhu aʋa ˈbɔain ɛn, ˈye aʋ ˈdhe ɔ bho kpa.’ Ʋʋ bhla ˈo Elize ˈdhe ʋʋ ye Samari mun, ˈnɔn- Israɛkɔʋn- anˈ ˈbheɔ ˈˈtia.

-Jɛn Sirikɔʋn anˈ ˈsʋlɩˈˈ a ˈjheɛ ˈˈkpei -ka ʋʋ nɩan ˈo ˈˈkwiglɔ- ɔˈ ghwea a, -mɛnˈ ˈˈnɔn zi. Israɛ ɛ ˈbheɔ deeɛ- Elize i ɔ ˈnaan: ‘ˈƖn ˈdhbhʋbʋ?’ Elize ˈye dɩ -ˈnɩn i -jhii -wɛeˈ dhɛsaʋn- ʋa ˈbɔan ʋʋ ˈyeɔ ˈˈdhrui nʋn -dhe ɛ, ɔ ˈye ɛɛˈ kpa -za? ˈˈƖɩn-. Ɔ -gwluɛ- ˈe ˈbheɔ bho ɔ ˈnaan: ‘-Manˈ ˈdhbhʋbʋ -dhe. ˈˈƝɩn ʋbʋ ˈdhɛ ʋʋ ˈye dhi -ˈmɛn ˈˈtai ʋbʋ i ʋʋ ˈye ˈdhe ʋbʋ ˈˈbhli dhe mun’. ˈSʋ, ˈbheɔ poɛ fɛtɩ -klaaˈˈ ɔ yʋbʋ ˈˈɲɩn ˈˈdhe ɔ ˈˈtai ʋbʋ i ʋʋ mun ˈdhe ʋbʋ ˈˈbhli dhe.