Gabliɛ muɛn ˈe Mai bho

ˈDhe Elizabɛtɩ aˈ ˈˈgbuzɔnˈ ɔn, ˈɲnʋnkpaoˈ -jhu ˈˈzaan dhueˈ -nɩn ˈe ɲʋn an ˈdhaa Mai. Ʋn ˈˈtiɛˈˈ ˈe ˈˈkwiglɔ- dhueˈ ɲʋn an ˈdhaa Nazarɛtɩ ˈdhi ˈdhe Galile. Ɲʋn ˈˈɲɩʋnˈˈ Zozɛʋ nɩan tibai- ʋn ˈyeɔ ˈˈbhli ˈˈti. -Da Elizabɛtɩ aˈ ˈˈkwli ˈbhlea ˈcɩ -mɛoˈˈ- ɛ, dhbhoozuu- Gabliɛ -ghwluɛ- ˈe Mai bho ʋn ˈnaan: ‘A ˈsɛ o Mai. Zoova ˈˈɲɩɛnˈˈ aʋn ˈˈɩnmɔɛn- -klaaˈˈ.’ Dhɛ Gabliɛ ɛ ˈbɔan ɔ ˈyea ˈtmʋn ɛn, Mai aˈ ˈŋwɔɛn in. ˈˈDhe dhbhoozuu- de ˈo ʋn ˈnaan: ‘Aa muɛn ˈˈkwli ˈbhle- ˈˈdhe a ˈye ˈˈjhu -ɲmau ˈghwlʋ. A ˈyeɔ Zezi ˈɲnɩn ˈdhaa-. Ɔɔ muɛn ˈBheɔ -nɩn. ˈˈDhe ɔɔˈ ˈbheɔglɔ- ˈse ˈˈtianˈ ˈbhle i.’

Mai -ghwluɛ- ˈe dhbhoozuu- bho ʋn ˈnaan: ‘ˈKlaa ˈɩn -nɩn ɲmau ˈsea i ˈpɛn dhueˈ ˈdhee, -kawɛ ˈye ˈˈjhu ˈghwlʋ sʋn nʋn -ɛn?’ Gabliɛ ˈnaan: ‘Ɛɛˈ nʋanˈ se ˈˈɩkman- ˈdhe Zoova bho. -Zuu gwɛai a muɛn ˈbho a ˈˈkpe -jhi ˈˈdhe a ˈye ˈˈjhu -ɲmau ˈghwlʋ. Elizabɛtɩ nɩan aaˈ ˈdhoudhi ɛ, ʋn ˈbhleɛ ˈˈkwli -ke.’ Mai -ghwluɛ- ˈe dhbhoozuu- bho ʋn ˈnaan: ‘ˈƖn -nɩɛn- Zoova aˈ -kʋɔn-. -Ka nʋan ɛɛˈ ˈtmʋn sʋn ɛn, ɛ -nʋʋɛn -kaˈ ˈdhe ˈman dɩ ˈdhi.’

Mai muɛn ˈe Elizabɛtɩ bho. ˈˈKwiglɔ- -ɔ ˈbho ˈdhi Elizabɛtɩ ˈˈtia -dhe ɛ, ɔ -nɩɛn ˈo trʋ ˈˈkpe. Mai poa Elizabɛtɩ ˈsɛ ɛ, ˈˈjhu nɩan ˈe Elizabɛtɩ ˈdhi zia- i. ˈSʋ -zuu gwɛai ˈˈjhi ˈdhe ʋn ˈmʋn ˈmɛn, ˈˈdhe ʋn ˈnaan: ‘Mai Zoova poa ʋn ˈˈniman. Ɛ nɩn ˈˈɩnmɔɛn- -klaaˈˈ ˈdhee bho, dhɛ ɲʋnpʋʋi ɔˈ ˈdhou jhia ˈnɔn ˈɔn ˈˈŋwɛn ɛn.’ Mai ˈnaan: ‘ˈMan ˈbhɛɛ- Zoova aˈˈ ˈdhe ˈman -pɛɛ ɛˈ klɛɛ ˈmʋn.’ ˈSʋ ʋn -deɛ i ˈbho Elizabɛtɩ bho ʋn ye ˈcɩ taan nʋn -wɛeˈ ʋn mun Nazarɛtɩ dhe.

Zozɛʋ ˈŋwɩn -ka Mai ˈbhlea ˈˈkwli ɛ, ɔɔ ˈbɔn ɔ -nɩn ʋn ˈye ˈˈɩcɩɩɛn-. ˈKlaa dhbhoozuu- -ghwluˈ ˈdhe ɔ bho ˈdhe jha ˈdhi ʋn ˈnaan: ‘-Faʋn anˈ nʋʋn- ˈdhe-, ˈˈdhuʋ ˈmʋn ʋn ˈye -manˈ ˈɲnɔn -nɩn. Ʋn ˈse dhɛsaʋn- nʋn.’ ˈSʋ Zozɛʋ ˈˈdhuo- Mai ˈmʋn ˈmɛn, ʋn yeɔ ˈˈbhli ˈˈti.