Zezi ɔ nanˈ ˈbho ˈˈnin ˈˈkpe

Zezi ˈbhɛɛˈ -dhe ɔ ˈye ɲʋn -ʋaˈ dhɩ a poa ˈpʋʋ- ˈˈdhe ɔ ˈye ɲʋn ˈmɛan ˈkmʋn dhe -jha. ˈKlaa ɔ ˈbhɛɛ- ˈˈnin -e pʋɔˈ ˈˈŋwɛn -ke -dhe. Ɔ ˈgwɛa bhae -ˈnan bho trʋ ˈˈkpe ɛ, ɔ ˈjheɛ -ka pʋɔˈ -klaaˈˈ dhueˈ ɔ jhia i ˈdhe ˈˈnin ɲʋn an ˈdhaa Galile ɛˈ ˈtɔnin ˈˈkpe ɛ. Ɔɔˈ dhbhoʋn- -nɩɛn- ˈe ʋaˈ bato ˈdhi -dhe ˈˈdhe ʋʋ se ˈbhɛɛ- ʋʋ ˈyeɔ jie bho po pʋɔˈ ɔˈ dɩ. Zezi ˈghwlʋɛ ˈe trʋ ˈˈkpe ɔ ye i ˈˈsi ˈˈdhe ɔ -dee -naanˈ ˈbho ˈˈnin ˈˈkpe ɔɔ yea -da bato nɩan mun. Dhbhoʋn- ˈjhea ɲɔn dhueˈ -ɔɔ nan ˈbho ˈˈnin ˈˈkpe ˈsʋ ɛ, -faʋn an nʋn ʋbʋ ˈmɛn ˈjɛɛn-. ˈKlaa Zezi -ghwluɛ- ˈe ʋbʋ bho ɔˈnaan: ‘Ɛ nɩn ˈmɔn-. -Faʋn anˈ nʋn aʋ -dhe.’

Piɛɛ ˈnaan: ‘ˈBhlei-, -bho ɛ nɩn -mɔn ˈjɛɛn- ɛn, ˈtmʋʋn- ˈmʋn ˈyeˈdhee- bho jhi.’ Zezi -ghwluɛ- ˈe ɔ bho ɔ ˈnaan: ‘Jhi.’ ˈBho ˈˈnin ɛnˈ pʋɔˈ -klaaˈˈ aˈ gwea ˈbhomɔn- Piɛɛ ˈghwlʋ ˈe bato ˈdhi ɔ ˈˈsi i ˈˈdhe ɔ -dee- -naanˈ ɔɔ mun ˈe Zezi bho. ˈKlaa ɔɔ -kʋʋan Zezi dhi ɛ, ɔ -ŋmʋɛn- ˈˈnin ɛnˈ pʋɔˈ -klaaˈˈ ˈjha ˈsʋ -faʋn an nʋɔnˈ. Ɔ ˈjheɛ -ka ɔɔ -deea ˈˈnin ˈzɔn -paaˈ a. Ɔ ˈˈghwɔɔˈ ɔ ˈnaan: ‘ˈBhlei-, ˈpʋʋ- ˈmʋn!’ Zezi kpʋɛn ɔɔˈ sʋn in ˈˈdhe ɔ -ghwlu ˈdhe ɔ bho ɔ ˈnaan: ‘Dhɛɛdɩ- -manˈ -pɛɛ ɛ zee i -ɛ? Da -manˈ dhɛgwlɩdeɛ- -nɩn -ɛn?’

Zezi -e Piɛɛ ˈjha ˈe bato ˈdhi ˈsʋ ˈˈnin ɛnˈ pʋɔˈ ɲnan in. -Naan tɔˈ i, dhɛwɛ- ɛ po ˈbho dhbhoʋn- -gwlɩˈˈ -ɛ? Ʋʋ -ghwluɛ- ˈe Zezi bho ʋʋ ˈnaan: “Nɩɛn- Ɲɔnsoa aˈ ˈˈJhu ˈjɛɛn-.”

Ɛ se ˈbhomɔn ɔnˈ ˈsʋ Zezi toɛ -ka ɔ ˈbhɛɛa ˈˈnin pʋɔˈ -e dhɩ -ˈnɩɩn nɩan ˈkmʋn ˈˈŋwɛn -nɩn. -Zɔn dhueˈ -kenɛnˈ ɛn, Zezi -e ɔɔˈ dhbhoʋn- ˈjha ˈe bato ˈdhi ʋʋ ye ˈdhe Galile ɛˈ ˈtɔnin - ɛnˈ ˈfɔ -ˈnɔɔn bho mun. Ʋa cɛan ˈˈnin ɛn, -ˈmɛn Zezi ɔ ˈmʋʋnˈ ˈdhe bato ɔˈ -gbɔoˈ bho. Ɔɔ ˈmʋan ˈsʋ ɛ, ˈˈnin pʋɔˈ -klaaˈˈ -dee jhiaˈ ˈmɛn. ˈˈNin ɛnˈ ˈplɩ a ˈkpa ˈe bato ˈdhi ˈsʋ ɔɔ ˈˈjhiɛˈˈ ˈˈnin ˈdhi. Dhbhoʋn -za Zezi ˈˈɲɩnɔnˈˈ. Ʋa ˈˈghwɔɔˈ ʋʋ ˈnaan: ‘Ɲʋndhɛtɔɔin-, -aa jheɛ ˈmɛɛanˈ! Po aʋ sʋn bho!’ Zezi -sɔn ˈʋn ˈmɛn ˈˈdhe ɔ -ghwlu ˈdhe ˈˈnin bho ɔ ˈnaan: “Ɛ de ˈtɩɩn!” ˈSʋ, pʋɔˈ -e ˈˈnin jhiɛ jha. Zezi deeɛ- ɔɔˈ dhbhoʋn- dhi ɔ ˈnaan: ‘Da aʋaˈ dhɛgwlɩdeɛ- -nɩn -ɛn?’ Ʋʋ -ghwluɛ- ˈe bha bho ʋʋ ˈnaan: “ˈˈNin -e pʋɔˈ ɔ ˈjheɔ ŋwɔn.” Dhɛ dhbhoʋn ˈŋwɔan in ɛn, ɛmɛn- -nɩn -bho ʋʋ de Zezi -gwlɩˈˈ ɛˈ, dhɛ ooˈˈ dhɛ ˈse ʋaˈ -faʋn- ˈbhlei-.