Zezi ɔˈ dhebhɔɔ dhiidhɛ-

Zʋn ooˈˈ zʋn ɛn, ˈbho Nizan cʋ aˈ ˈghwɩ aˈ 14 -zɔn ˈˈkpe ɛ, zifʋ -ˈˈwe a -poɛ fɛtɩ ɲʋn an ˈdhaa Pakɩ. -Ka Zoova nʋan ʋaˈ -kʋɔnkwlaˈ -za sʋn ˈdhe Ezipʋ ˈˈdhe ɔ kpʋbʋ ˈdhe ˈbhlʋa- -ɔɔˈ ghwlu ɔ cɛan ˈdhi ɛ, ɛmɛn- fɛtɩ -ˈnɛn ɛn pʋbʋ -glʋˈ bho. ˈDhe 33 zʋn ˈdhi ɛ, Zezi -e ɔɔˈ dhbhoʋn poɛ Pakɩ ˈdhe etazɩ ɛˈ gbu -die dhueˈ ˈdhi ˈbho Zelizalɛmʋn. Ʋʋ gwɛa dhɛ dhiaˈ a, Zezi -ghwluˈ ɔ ˈnaan: ‘Ɲɔn dhueˈ ɔ muɛn ˈʋn bhʋ ˈdhe -za ˈdhe aʋ ˈˈklun.’ Ɛ ˈˈmaan dhbhoʋn taiˈ. Ʋʋ deeɔ i ʋʋ ˈnaan: ‘-Ɔ ˈye ʋn bhʋ ˈdhe -za -a?’ Zezi -ghwluɛ- ˈe ʋbʋ bho ɔ ˈnaan: ‘Ɛ nɩn ɲɔn ˈman ˈˈɲɩanˈˈ dipɛn nɛn ɛnˈ ˈfɔ.’ ˈSʋ ɔ ˈˈɲɩɛnˈˈ Zida Isikariɔtɩ dipɛn ɛnˈ ˈfɔ. Zida ˈˈdooˈ ɔ ye ˈmʋn -sɔn ˈˈdhe ɔ ˈghwlʋ ˈe ˈˈgbu ˈdhi.

ˈBho ɛ dhe ɛ, Zezi bhaeˈ, ɔ -cɛɛn dipɛn in ˈˈdhe ɔ ˈˈɲɩɛnˈˈ dhbhoʋn -sia ˈo. Ɔ -ghwluɛ- ˈe ʋbʋ bho ɔ ˈnaan: ‘Aʋ dhi dipɛn nɛn. Ɛ ˈdha ˈman ku, ˈyea ˈo -to aʋaˈ dɩ.’ ˈˈDhe ɔ bhae- kenɛnˈ -wɛeˈ ɔ ˈˈdhuo- nmɔn ˈmʋn ˈˈdhe ɔ ˈˈɲɩɔnˈˈ ɔɔˈ dhbhoʋn-. Ɔ ˈnaan: ‘Aʋ ˈnan nmɔn nɔn. Ɔ ˈdha ˈman ɲmɔn, ˈyea ˈo -to -wɛeˈ dhɩsaɩn- ˈyea -gwɛ ɛ. ˈMan cɛn ghwlu ˈdhe aʋ bho -ka aʋ -nɩn ˈman muan ˈˈbheɔ ˈkpa ˈdhe jhaʋn ˈdhi ɛ. Aʋ nʋn ɛɛˈ dhɛ tu zʋn ooˈˈ zʋn -wɛeˈ aʋ ˈye ˈman dɩ -glʋˈ bho po.’ Zʋn ooˈˈ zʋn ɛn, Zezi ɔˈ dhɛcɩaʋn an ˈgbooɛ i ˈbho Nizan cʋ aˈ 14 -zɔn ˈˈkpe ˈˈjiejhrʋbho. ˈˈDhruigbooɛ -ˈnɛn -mɛn ɲɔn ɔn ˈdhaa ˈBhlei ɔˈ ˈmɛan anˈ -ˈglʋbhopoozɔn- bhla.

Ʋʋ gwɛa dhɛ dhiaˈ a, dhbhoʋn -kpʋʋɛn- ˈˈŋwɛn -wɛeˈ ʋʋ ˈye ɲɔn nɩan -klaaˈˈ ˈdhe ʋbʋ ˈˈklun jhibho-. ˈKlaa Zezi -ghwluɛ- ˈe ʋbʋ bho ɔ ˈnaan: ‘Ɲɔn nɩan -klaaˈˈ a, ɛ nɩn ɲɔn -ɔɔ ˈjhe ɔɔˈ ˈˈjɛ -ka ˈˈjhu ˈˈzaan- -aeˈˈ ɲɔn sea dhɛ ˈdha nɩan.

‘Aʋ nɩɛn- ˈman ˈdhaiˈˈ -ˈˈwe. Dhɩ aˈ klɛɛ ˈman ˈˈBho ɔ ˈbɔan ˈyea aʋ ˈtmʋʋn ɛn, ɩmɩn- ˈman ˈtmʋn aʋ. ˈMan muɛn ˈe ɔ bho dhe -mun ˈdhe jhaʋn ˈdhi ˈdhe nɔnˈˈ dhɛ ˈˈzaan ˈdhi. Aʋbʋ ɛ, aʋa muɛn da -sie-. Ɲʋn ˈyɩ jhibho- -ka aʋ nɩan ˈman dhɛcɩaʋn -bho ʋa sa ɲʋndɩkman ˈjhe- ˈbho aʋ ˈɲnɩn ɛnˈ. Aʋ ˈye bha aˈ dɩ -kman -ka ˈɩn kman aʋaˈ dɩ ɛ.’

Ɛ ˈyea ˈo ˈbhɔ ɔ, Zezi bhaeɛ- Zoova -wɛeˈ ɔ ˈye dhɛcɩaʋn anˈ klɛɛ ˈdhei -fuo-. Ɔ ˈyʋbʋ sʋn bho po ʋʋ ˈye dhbho nʋn -dadhueˈ ˈdhe ˈflɛ ˈmʋn. Ɔ bhaeˈ -ke -wɛeˈ Ɲɔnsoa aˈ ˈɲnɩn ˈye i -gwɛ. ˈBho ɛ dhe ɛ, Zezi -e ɔɔˈ dhbhoʋn bhleˈ ʋʋ ˈye Zoova ˈˈɩ ˈbhɛɛ- ˈˈdhe ʋʋ ˈˈsiɛ zɔnˈ. Nɔnˈˈ ɲʋn ˈyea Zezi i -ɲnaan- se bho -tɛɛn