KLETIƐN ƐNˈ ˈKMƲN
“Pɔʋ poɛ Ɲɔnsoa ˈsɛ-, ɔ -kuuɛ- -pɛɛ i”
ˈDhoudhi -ˈˈwe nɩan Wlɔmʋn ˈŋwɩn -ka Pɔʋ ɔ jhia, ʋʋ -za ˈo ɲʋn anˈ ˈpla -ʋʋ -nan kio ɔˈ 64 ˈmʋn ʋʋ ye Pɔʋ ˈˈɩ ˈjhaa-. Ɲʋndɩkmaan- ˈdhoudhi -ˈˈwe -ˈnʋn toa, dhɛwɛ- ɛ nʋn Pɔʋ ˈˈdhrui -ɛ? Pɔʋ ˈjhʋbʋ ɛ, “ɔ poɛ Ɲɔnsoa ˈsɛ-, ɛ -kuuɛ- ɔɔˈ -pɛɛ i.” (Ac 28:15) See -dhe ɛ, ɛ Pɔʋ -ɔɔ jhii Ɲɔnsoagbi ˈdhii -ɔɔ po ɲʋn ˈkpɩ, ˈklaa ˈbho ɛɛˈ -zɔn tu ˈˈkpe -da ɔ nɩan -gazojhei ɛ, ɔmɔn- ɲʋn po ˈkpɩ.—2Co 13:10.
ˈZɩan -ke ɛ, kpɔ ɔˈ ˈˈjhriɛbhoduʋn -duuˈˈ -a jhii Ɲɔnsoagbi ˈdhii -ʋa- po ˈdhoudhi -ɲmai -e ˈdhoudhi -ɲnʋnkpaeˈ ˈkpɩ. -Ka Ɲɔnsoa aˈ ˈcɛ ɛˈ klɛɛ nɩan, ʋa seaˈ -ke, ʋʋ ˈbhle -zɔnˈdɩ ˈmɛn, ˈˈdhe ʋa ˈmɛn ˈkpɩ i ˈmɛn -ke -zɔn -dhee -ˈnɔɔn. -Zɔn kpɔ ɔˈ ˈˈjhriɛbhodui -e ɔɔ ˈɲnɔn ɔn muan ˈe -manˈ ɲɔnsoagbu ˈdhi -jhi ɛ, dhɛwɛ- ˈbhɛɛ -ˈye nʋn -ɛ ˈyʋbʋ ˈkpɩ po ˈˈdhe -ɛ ˈyeɛ nʋn -ke -wɛeˈ “aʋ ˈye bha i -kuu” -ɛ?—Rm 1:11, 12.
Mun -bobhlaa aˈ ˈˈdhruigbooɛ ˈmʋn. -Bho -bobhlaʋn an sa ʋaˈ nɔnˈˈ -e ʋaˈ dhbho -e dhɩ -dhee -ˈnɩɩn kwa i za -wɛeˈ ʋʋ ˈye ˈdhɔɔ -deea ˈfɔ ˈˈɩ -trɔnˈ ˈdhi ˈjhee- ɛˈ, ɛɛ poɛ kpɔ ɔˈ ˈˈjhriɛbhodui ˈkpɩ. (1Th 1:2, 3; 2:20) -ˈBhɛɛˈ ˈcʋ -ʋn ˈdhe ˈdhi ɔɔ jhia -ˈye -jezaʋn anˈ ˈsɔɔnpoi ˈkpa. -ˈBhɛɛˈ -nɩn ɔɔˈ ˈˈjɛ -aeˈˈ ɔɔˈ ˈɲnɔn ˈye -bobhlaaˈ mun? -ˈBhɛɛˈ -ˈye ʋaˈ -dhueˈ ˈmʋn ˈˈdhuo- aʋ ˈye ˈe ɲɔn -nɩn -man ˈcɩan Biiblʋ bho mun -ke? Ʋʋ -kman -nɩn -bobhlaʋn anˈ kpɛ -duuˈˈ bhla bo ɛɛˈ dɩ. -Bho ʋʋ -nɩn -bobhlaʋn- -dhee -e ɲʋn sea ʋaˈ ˈˈjɛ -gwlɩˈˈ de ˈdhe -bobhlaaˈ a sa bo bhla -da -dhueˈ ɛˈ, ɛɛ nʋɛn ʋbʋ ˈtʋn.
-Kpʋʋn ɲʋn sɩn ˈsɔɔn. -ˈBhɛɛˈ -ˈyʋbʋ ˈpɛɩnˈ ˈˈdu -aeˈˈ -ˈyʋbʋ -pii? -Bho nʋɛn ɛnˈ, ɛɛ toɛˈ -ka kman kpɔ ɔˈ ˈˈjhriɛbhodui -e ɔɔˈ ˈɲnɔn ɔnˈ dɩ ɛ. Ʋʋ ˈse dhɩ -duuˈˈ -e dhɩ -ɩn -sɔɔnˈ kman ˈbɔn.—Lc 10:38-42.
Poɔ -dheinˈˈ bho -ˈmɛn ˈˈdu ɔɔˈ ˈsrɩn ˈˈjhriɛ. -Ka -a ˈyea nʋn -wɛeˈ Zoova aˈ dhbho -aa nʋan ˈyea -kajɔɔnka -nɩn ɛn, ɛmɛn- kpɔ ɔˈ ˈˈjhriɛbhodui ɔ tɔɔn -abʋ ˈdhe ɲʋndɩkmaan ˈmʋn. -Zɔn -dhee -ˈnɔɔn ɔ ˈbhɛɛˈ ɔ ˈye -aʋ ˈsrɩn ˈˈdu ɩn ˈye -aʋ dhi ˈkpa. (1Co 5:1-5) -Bho -aa sa ˈsrɩn ɔɔ toa ˈo ŋwɔn ˈjhe ɛˈ, ɛ ˈbhleɛ ɔɔˈ ˈmʋnan-.—Hé 13:17.
Pʋbʋ ˈsɛ. ˈKpɩ Kpɔ ɔˈ ˈˈjhriɛbhodui -e ɔɔˈ ˈɲnɔn ɔn poa ˈe ɛ, dhɛjɛɛn ɩan nʋan ʋn ˈˈdhrui ɛ, ˈtmʋn ɛnˈ dɩ ˈdhe ʋbʋ bho. -ˈBhɛɛˈ -ˈyeɛ ˈtmʋn ˈdhe ʋaˈ ˈˈjɛ bho, -ˈbhɛɛˈ -ˈyeɛ ˈcre -ˈyʋbʋ kpa -ke.—Col 3:15.