Ɲɔnwɛ- -ˈye ɲʋn zeie- ˈdhe tʋvɔʋn- ˈkwa -a?: Dhɛwɛ- Biiblʋ a ˈtmʋn ˈdhe ɛɛˈ dɩ ˈdhi -ɛ?

Dɩ Onu ˈtmʋanˈ ɩn ka:

• -Ɛ ˈghwlʋa ˈe 2023 ˈzʋn anˈ ˈˈgulacʋ- ˈˈzaan anˈ ˈghwɩ 7 -ɛ -jhɛɛa ˈghwɩ aˈ 23 taan an, tʋ ˈkpa ˈbho Israɛ -e bandɩ de Gaza ˈɲnɩn. Ɲʋn anˈ 6.400 ˈmɛn ˈˈdhe 15 200 -pooa-, ʋaˈ -da -duuˈˈ se tʋvɔʋn- -nɩn. ˈBho -ˈmɛn ˈdhe ɛ, ɲʋn anˈ ˈˈghwlu -ghwluu -ʋʋ ple -ʋʋ ˈghwlʋ ˈo.

• ˈDhe 2023 zʋn anˈ ˈˈgbulacʋ- ˈˈzaan ˈdhi ɛ, ɲʋn anˈ klɛɛ ˈmɛan ˈdhe tʋ -vɔɔan ˈbho Risi -e Iklɛnɩn ˈɲnɩn ˈdhi ɛ, ʋʋ -nɩɛn- ɲʋn anˈ 9.701 ˈˈdhe ɲʋn -pooa- ˈdhe Iklɛnɩn ɛn, ʋʋ -nɩɛn- ɲʋn anˈ 17.748.

Ɲʋn tʋ a nʋɛn -ʋa- ˈjhea ˈkle ɛ, dhɛwɛ- Biiblʋ a ˈtmʋn -ɛɛ ˈˈdubʋ dɩ -ˈgwlɩi -ɛ?

Dhɛ -ɛɛˈ dɩ ɲʋn ˈyea ˈkmʋn anˈ ɲan -pɛɛ ɛˈˈ tbha

Biiblʋ ˈnaan Ɲɔnsoa a muɛn “tʋ i -za da ˈbhlʋa aˈ klɛɛ ˈˈkpe.” (Psaume 46:9) Ɔɔ muɛn ɔɔˈ ˈbheɔglɔ- -ɔ ˈyea ˈo ɲʋnbhleʋn anˈ klɛɛ ɛˈ gɔˈ ˈˈɩ ˈˈsii- i -jhii -wɛeˈ ɔ ˈye ɛɛˈ dhɛ tu nʋn. (Daniel 2:44) Ɲɔnsoa aˈ ˈbheɔglɔ ɔ muɛn -nʋn ɲʋn ˈse ˈkle ˈjhei ˈbhodhe.

Zezi Klisɩ -ɔ nɩan Ɲɔnsoa aˈ ˈbheɔglɔ ɔˈ ˈBheɔ ɔ, dhɛ ɔɔ muan -nʋn ɛ ka:

• “Ɲɔn sea dhɛ ˈbhle -ɔɔ ˈbɔanˈ sʋn bho -poɛ i -e ɲɔn -ɔn sea -e ɲɔn ooˈˈ ɲɔn -ɔ sea sʋnbhopoi- ˈbhle ɔɔ mubʋ zeie-. Ɔɔ muɛn ɲɔn -ɔn sea -e ɲɔn sea dhɛ ˈbhle ɔɔˈ -ghwɛe- ˈjhe- ˈˈdhe ɔɔ muɛn ɲʋn sea dhɛ ˈbhle ˈpʋʋ-. Ɲʋn ɲʋn an ˈˈduaˈˈ ˈkle -e ɲʋn ˈkledɩ a ˈkpai ɛ, ɔɔ mubʋ zeie-.”​—Psaume 72:12-14.

ˈKledɩ- tʋ -e ɲʋn ˈkle ˈˈduɛ ɛɛ jha ɲʋn bho ɛ, ɔɔ muɛn ɔɔˈ ˈbheɔglɔ i -jhii ɔ ˈye ɩanˈ klɛɛ i -za.

• “Ɔɔ muɛn ˈˈmiinin anˈ klɛɛ nɩan ˈdhe ʋbʋ ˈˈjhrii ˈsran-, ˈmɛan ˈse i -nɩn in -dheeka, ˈkwɛ ˈse i -nɩn in, zrɛ -e ipʋʋa- ˈse i -nɩn in. Dhɩ nɩan tɛnˈˈ -dhe ɛ, ɩn se i -nɩn -dheeˈ ka.”​—Révélation 21:4.

ˈDhe nɔnˈˈ -dhɛ ˈˈzaan ˈdhi ɛ, Ɲɔnsoa aˈ ˈbheɔglɔ ɔ muɛn dhɩ ˈˈɩ zian- da ˈbhlʋa ˈˈkpe. Biiblʋ ˈtmʋɩn tɛnˈˈ -dhe ʋn ˈnaan “tʋ a muɛn ˈkpa- ˈˈdhe -aa muɛn tʋ aˈ ˈkpa ˈɲnɩn ˈŋwɔn-”, ɛmɛn- -aa ˈjhe ˈzɩan. (Matthieu 24:6) Dɩ -ˈnɩn -e dhɩ -dhee -ˈnɩɩn an toɛˈ -ka -a nɩan ˈnɔn “ɲʋnbhleʋn anˈ ɲʋnbhleɛ ɛˈ dhebhɔɔ -ghwɩ” ˈdhi..​—2 Timothée 3:1.