-Bhlaa bi -vɔɔɛn ˈye i -ɲnan -an?: Dhɛ Biiblʋ a ˈtmʋan

“Nɔnˈˈ ɲnin -wɛ bhla -wɛeˈ ɲʋn ˈye ˈcɛn -e ˈˈkudhbhaa- dhɩ -ˈnɩn -za ˈˈbhlo ˈˈkpe cɛn. Nɔnˈˈ ɲnin -wɛ -a ˈye -aaˈ ˈˈjɛ gla ˈˈkpe de,” Ɛmɛn- ONU anˈ ˈˈdhrujhei- Antonio Guterɛsɩ ˈtmʋn -da Iran -paa Israɛlɩ -bhlʋa bho Samedi 2024 ɛnˈ -Jilecʋ aˈ 13 ˈˈkpe.

Dhɩ -ɩan- nʋʋan ˈdhe Azi -bhlʋa aˈ ˈfɔ -ˈnɔn bho ɛ, ɛ nɩn dhɩ -ɩan- nʋʋan da ˈbhlʋa aˈ klɛɛ ˈˈkpe aˈ kpɔ dhueˈ.

“ˈBho Dhiman tʋ aˈ ˈsɔɔn nʋn ˈdhe ɛ, tʋ -ʋn ˈyea ɲʋn dhbhaˈ -ʋn ˈyea ˈo dhi zi ʋn se -nɩn. Tʋ -ˈnʋn -za ɲʋn anˈ mliaa ˈsɔɔn ˈmɛn.”—Conseil de sécurité des Nations unies, 26 janvier 2023.

ˈBhlʋɩ ˈdhe ˈdhi tʋ zia -jieˈˈ ɩn ka: Israɛlɩ, Gaza, Siri, Azɛɛbaijan, Iklɛnɩn, Sudan, Etiopi, Nizɛɛ, Biimanin -e Aiti.a

-Bhlaa bi -vɔɔɛn ˈye i -ɲnan -an? ˈBhlʋa aˈ jiebhopoʋn- ˈbhɛɛ ˈmɛn ʋʋ ˈyeɛ nʋn ˈflɛ ˈye da ˈbhlʋa ˈˈkpe -nɩn? Dhɛwɛ- Biiblʋ ˈtmʋn -ɛn?

Tʋ ˈˈjhi ˈnɔn ˈkmʋn ˈmɛn

Dhɛ tʋ ˈˈjhia ˈnɔn ˈkmʋn ɛn, ɛɛ toɛˈ -ka tʋ a muan in gwɛanˈ ˈdhe nɔnˈˈ -dhɛ ˈˈzaan ˈdhi ɛ. Dhɛ tʋ a ˈkpa a, ɛɛ toɛˈ -ka ɲanzaadɩ- -ɩan- ˈtmʋan nɔnˈˈ -a nɩan ˈnɔn ˈdhi a ɲnian ˈo ɛ. Biiblʋ a ˈdhaa ɔɔˈ nɔnˈˈ tu: “Nɔnˈˈ -ɔ ˈdhe ˈdhi ˈkmʋn nʋn ˈyea ˈe -gwɛ.”—Matthieu 24:3.

• ˈBhlʋɩ a muɛn ˈbhlʋɩ bho -vɔn ˈˈdhe ˈbheɔglɔ ɔɔ muɛn ˈbheɔglɔ bho -vɔn.”​—Matie 24:6, 7.

Zro ˈcɩaandhɛ- “Quel est le signe des «derniers jours», ou «temps de la fin»?” -wɛeˈ -ka tʋ -a ˈkpaa ˈzɩan an nʋan ˈo Biiblʋ aˈ ɲanzaadɩ ˈbho ɲnian sʋn -ˈyeɛ ˈjhe.

Tʋ -ʋan- muan tʋ aˈ klɛɛ i -za a

-Ka tʋ ɲiɔo aʋ vɔan an muan in -ɲnan an, Biiblʋ -zɛɛ ɲan ʋn ˈyɩ ˈtmʋn. -Kawɛ ɛɛˈ dhɛ tu ˈye ˈo -ɲnin sʋn nʋn -ɛn? Ɛ se ˈdhe ɲiɔo ʋaˈ ˈˈɩkmansʋn ˈmʋn -nɩn, ˈklaa ˈdhe Aamagedɔn ɔnˈ ˈsaa ˈmʋn, “Ɲɔnsoa ˈbhlea ˈˈɩkman anˈ klɛɛ ɛˈ -zɔn -klaaˈˈ aˈ tʋ.” (Révélation 16:14, 16) -Bho tʋ -ˈnʋn zi ɛˈ, Ɲɔnsoa aˈ -glʋˈdɩ -ɩn nɩan ɲiɔo ʋa muɛn ˈkmʋn sea ˈˈtianˈ ˈbhle ɛɛ muɛn ˈo -ɲnin.​—Psaume 37:10, 11, 29.

-Bho -ˈye dhɩ -duuˈˈ i ˈŋwɔn ˈdhe Ɲɔnsoa aˈ tʋ nʋn -ʋn ˈyea tʋ aˈ klɛɛ i -za aˈ dɩ ˈdhi ɛˈ, -mɛnˈ zro ˈcɩaandhɛ- “Qu’est-ce que la bataille d’Armaguédon?” ˈdhii.