-Kawɛ Zoova aˈ -Bobhlaʋn anˈ ˈˈdhruigbooɛ ˈbhɛɛ ɛ ˈye ʋn sʋn bho po -ɛ?

Ɲʋn ˈdha ʋn ˈmɛn -kpɔ dhueˈ -ˈye Zoova aˈ -Bobhlaʋn anˈ ˈˈdhruigbooɛ- ˈmʋn mun? -Bho se ʋaˈ ˈˈdhruigbooɛ ˈmʋn mun -kpɔ dhueˈ ɛˈ, ˈdhe ɔˈ muanˈ ˈbhɛɛˈ ˈye -manˈ -faʋn ˈbhle. -ˈBhɛɛˈ -ˈye ka nʋn: ‘Dhɛwɛ- ʋa nʋn ˈdhe ʋaˈ ˈˈdhruigbooɛ ˈmʋn -ɛn? Dhɛɛdɩ- ɛ -kɔndɩ -ɛ? Dhɛɛdɩ- ˈye ˈe mun -ɛn?’ ˈNɔn ˈcɩaandhɛ- nɛn ˈdhi ɛ, -ka ˈˈdhruigbooɛ- -ˈnɛn ˈbhɛɛ ɛ ˈyeɛ nʋn -ˈyea Ɲɔnsoa i ˈˈkʋaan- ˈˈdhe -ˈyea -manˈ kplɩn -dheeˈ po ɛ, ɛmɛn- -man mun i ˈŋwɔn-.

1. Dhɛɛdɩ- Zoova aˈ -Bobhlaʋn- an ˈgboo ˈˈdhrui -ɛ?

-Ka ˈˈdhruigbooɛ kɔandɩ ɛ, -ŋmʋn -ka Biiblʋ ˈcrei- dhueˈ nʋan ɛɛˈ ˈtmʋn sʋn ɛn: “ˈDhe Ɲɔnsoa aˈ ˈcɛ ˈˈklu ɛ, ˈman muɛn Zoova aˈ ˈɲnɩn ˈˈɩ ˈbhɛɛ-.” (Psaume 26:12) Ɛmɛn- dɩ Zoova aˈ -Bobhlaʋn -kman ʋaˈ ˈˈdhruigbooɛ- ɛˈ dɩ. Da ˈbhlʋa aˈ klɛɛ ˈˈkpe ɛ, ʋa ˈgbooɛ ˈˈdhrui ʋa yea Ɲɔnsoa ˈˈɩ ˈbhɛɛ, ʋa yeɔ bhae, ʋa yea ˈbhle ʋa yeɔ ˈdha. ˈDhe zʋn ˈdhi ɛ, ʋa ˈˈdhuɛ ˈghwɩ -ˈnɩɩn ˈmʋn ʋa yea ˈˈdhruigbooɛ- klaɩˈˈ nʋn.

2. Dhɛwɛ- -man mun ˈcɩan- ˈdhe -aaˈ ˈˈdhruigbooɛ ˈmʋn -ɛn?

Dhɩ -aa ˈcɩan ˈdhe -aaˈ ˈˈdhuigbooɛ ˈmʋn ɛn, ɩanˈ klɛɛ tbha ˈo Ɲɔnsoa aˈ Ghwlu ˈˈkpe, “ʋa poɛ ɲʋn sʋn bho ɲʋn an ˈyʋ i ˈŋwɔn.” (Zro Néhémie 8:8.) ˈDhe -aaˈ ˈˈdhruigbooɛ ˈmʋn ɛn, -man muɛn dhɩ -duuˈˈ jhibho- ˈdhe Zoova -e ɔɔˈ kplɩn anˈ dɩ ˈdhi. -Bho -man sa dhɩ -duuˈˈ jhibho ˈdhe ɔɔˈ ɲʋndɩkman- anˈ dɩ ˈdhi ɛˈ, ɛɛ muɛn -nʋn -kenɛnˈ -ˈyeɔ i ˈˈkʋaan-. -Ka ɔ ˈbhɛɛa ɔ ˈyea ʋn sʋn bho po ˈˈdhe -manˈ ˈkmʋn ˈyea ˈdhɔɛe ˈmʋn -nɩn ɛn, ɛmɛn- -man mun i ˈŋwɔn-.​—Isaïe 48:17, 18.

3. Ɲʋn -nɩn -man muan ˈjhee- ˈdhe -aaˈ ˈˈdhruigbooɛ mʋn ɛn, -kawɛ ʋʋ ˈbhɛɛˈ ʋʋ ˈye ʋn sʋn bho po -ɛ?

Zoova a ˈˈduɛ -aʋ ˈsrɩn ɔ ˈnaan: “-A ˈˈdu bha aˈ dɩ dhueˈ dhueˈ -wɛeˈ -a ˈye bha ˈkpɩ po ˈbho ɲʋndɩkman- -e dhɩ ˈjɛɩn anˈ nʋanˈ, -aaˈ ˈbhɔ -e -aaˈ ˈˈdhruigbooɛ bhoˈ -dhe.” (Hébreux 10:24, 25) ˈDhe -aaˈ ˈˈdhruigbooɛ ˈmʋn ɛn, ɲʋn kman bha aˈ dɩ ˈjɛɛn- ɛn, ʋbʋ- -nɩn -man mun ˈjhee-. Ʋa muɛn -manˈ dɩ -ŋmʋn ˈˈdhe ʋʋ ˈye ʋn sʋn bho po -ˈye dhɩ -duuˈˈ jhibho- ˈdhe Ɲɔnsoa aˈ dɩ ˈdhi. Dɩ ʋa muan ˈtmʋn- ˈdhe mɔn, ʋa muɩn ˈdhe Biiblʋ ˈdhi -za ˈˈdhe ʋʋ ˈye bha ˈkpɩ po. (Zro Romains 1:11, 12.) Ɲʋn -nɩn ɲɔn ˈˈtiia ˈˈbhli -e ɲʋn -nɩn ɲɔn sea ˈˈbhli ˈˈtii- ɛ, ʋbʋ- -nɩn -man mun ˈjhee- ˈˈdhe -man muɛn ˈˈkpe i ˈjhe- -ka ʋa nʋan ˈmʋnan -bho ʋʋ ˈbhle ˈkledɩ mɔn -dhe ɛˈ. Ɛmɛn- dɩ Zoova a ˈbɔn -a ˈye ˈˈdhruigbooɛ ˈmʋn mun jheejhee!

KPA DHƐ I ˈŊWƆƐN ƝAN

4. Zoova aˈ -Bobhlaʋn- anˈ ˈˈdhruigbooɛ-

Kletiɛn -ˈˈwe kɔan ɲan an ˈgbooɛ ˈˈdhrui jheejhee -wɛeˈ ʋʋ ˈye Ɲɔnsoa ˈˈɲɩn. (Romains 16:3-5) Zro Colossiens 3:16, -ˈmɛn aʋ ˈtmʋn ideedɩ- nɩn anˈ dɩ:

• -Kawɛ kletiɛn -ˈˈwe kɔan ɲan an nʋn Zoova ˈˈɲɩn sʋn -dhe -ɛ?

VIDEO: Dhɛ ɲʋn an mun nʋanˈ ˈdhe ˈBheɔglɔ ɔˈ ˈˈgbu ˈdhi -ɛ? (2:12)

• Dhɛwɛ- -ˈjhe ˈdhe ˈˈdruigbooɛ ˈmʋn -ɛ -nɩn dhɛ ˈtmʋan ˈdhe Colossiens 3:16 ˈdhi ˈgʋɔ-?

• ˈDhe video ˈdhi -e foto nɔn ˈˈkpe ɛ, dhɛwɛ- nʋn ʋn ˈtʋn -ɛn?

Zro 2 Corinthiens 9:7, -ˈmɛn aʋ ˈtmʋn ideedɩ- nɩn anˈ dɩ:

• Dhɛɛdɩ- Zoova aˈ -Bobhlaʋn- anˈ ˈjhbhaa- ɲʋn ˈghwɛi ˈdhe ʋaˈ ˈˈdhruigbooɛ ˈmʋn -ɛn?

Dhɛ -ɛɛ muan ˈcɩaan- ˈdhe ˈˈdhruigbooɛ- -ɛɛ jhia ˈmʋn ɛn, ɲɔn -nɩn -man ˈcɩan dhɛ -nɩn -ˈye ɛɛˈ dɩ ˈtmʋn.

• ˈˈDhruigbooɛ ɛˈ ˈfɔ -wɛ -ɛ nʋn ʋn ˈtʋn -ɛn?

Jhibhodɩ-

ˈBho jw.org ˈˈkpe ɛ, -ˈbhɛɛˈ -ˈye -da -aa ˈgbooa ˈˈdhrui -e -bhlaa -aa ˈgbooa ˈˈdhrui ˈjhe.

1. 1. ˈDhe -aaˈ ˈˈdhruigbooɛ ˈmʋn ɛn, ɲʋn an bhla -bo, ɲʋn an toɛ dhɛ, ɲʋn an ˈjheɛ videe i -ke. -Bho ˈˈdhruigbooɛ ˈye -dee -aeˈˈ ɛ ˈye ˈˈdhru -jra aˈ, ɲʋn an ˈbhle -wɛeˈ ɲʋn an bhae.

2. 2. ˈDhe -aaˈ ˈˈdhruigbooɛ- ɛˈ ˈfɛ -ˈnɩɩn ˈdhi ɛ, ɲʋn ˈbhɛɛˈ ɲʋn ˈye sʋn ˈˈjha -to -wɛeˈ ɲʋn ˈye -ghwlu.

3. 3. Ɲʋn anˈ klɛɛ ˈbhɛɛˈ ʋʋ ˈye jhi. ˈˈGbuzɔncɛ oo ɲʋn -nɩn ɲɔn sea ˈˈbhlitii- oo gɩlɩˈˈ oo ˈˈɲnunmɩɩnˈˈ ˈbhɛɛˈ ʋʋ ˈye jhi.

4. 4. ˈDhe -aaˈ ˈˈdhruigbooɛ ˈmʋn ɛn, ɲʋn anˈ -za ˈghwɛi ˈdhe mɔn.

5. ˈˈDhruigbooɛ ˈmʋn -muɛn- ɛn deeɛ ˈkpɩ i

-Naan Zezi ɔˈ ˈcɛ ɛˈ bo tɔˈ ˈˈkpe i. -Bho ʋʋ ˈye ˈˈdhruigbooɛ- -ɛɛ nʋʋan ˈdhe Zelizalɛmʋn ˈdhe zʋn ˈdhi ˈmʋn mun ɛnˈ, ʋa cɛɛn trɩ ˈˈkpe ʋa yea kio ɔˈ 100 ˈmʋn nan. Zro Luc 2:39-42, -ˈmɛn aʋ ˈtmʋn ideedɩ- nɩn anˈ dɩ:

• ˈBhoo- -gwlɩˈˈ ˈdhee, Zelizalɛmʋn ɔnˈ muanˈ an deeɛ ˈkpɩ i?

• Dhɛɛdɩ- -ˈye ˈe ˈkpɩ po ˈˈdhe -ˈye ˈˈdhruigbooɛ ˈmʋn mun -ɛn?

• -Bho ˈˈdhruigbooɛ ˈmʋn -muɛn- ɛn sa ˈkpɩ i dee mɔn -dhe ɛˈ, ˈbhoo- -gwlɩˈˈ ˈdhee, dhɛɛdɩ- ɛ -nɩn dhɛ ˈdhɔɛe -ɛ?

• Dhɛɛdɩ- -a ˈye ˈˈdhruigbooɛ ˈmʋn mun jheejhee -ɛ?

DHƐWƐ- ˈCƖAN-?

-Bho man sa ˈˈdhruigbooɛ ˈmʋn mun ɛnˈ, ɛɛ muɛn ʋn sʋn bho -po -ˈye dhɩ -duuˈˈ jhibho- ˈdhe Zoova aˈ dɩ ˈdhi, -jhbhɛɛ nɩan ˈo ɔmɔn -e mɔn ˈɲnɩn ˈye i ku, ˈˈdhe -nɩn ɲʋn -ˈnʋʋn ˈyeɔ ˈˈɲɩn.

Dhɛwɛ- -ˈŋwɔn in -ɛn?

• Dhɛɛdɩ- Zoova a po -aʋ ˈkpɩ -a ˈye ˈˈdhrui ˈgboo- -ɛ?

• Dhɛwɛ- -man mun ˈcɩan- ˈdhe Zoova aˈ -Bobhlaʋn- anˈ ˈˈdhruigbooɛ ˈmʋn -ɛn?

• ˈDhe dhɩ -ˈnɩɩn -wɛ ˈdhi ˈˈdhruigbooɛ ˈbhɛɛ ɛ ˈye ʋn sʋn bho po -ɛ?

ˈBƆN DHƖ -ˈNƖƖN ANˈ I ˈŊWƆAN IN

-Bho ˈˈdhruigbooɛ ˈmʋn -muɛn- ɛnˈ -faʋn an sa ʋn nʋn ɛnˈ, -ŋmʋn -ka ˈˈjhu dhueˈ ɛɛˈ -faʋn an nʋanˈ -dhe nʋan -wɛeˈ ɔ kman ˈˈdhruigbooɛ ˈmʋn -mun dɩ ɛ.

-Ka ʋʋ nʋan -aʋ sɩn ˈsɔɔn -kpʋʋn sʋn -a ˈseɛ bho ˈˈmae- ˈdhi (4:16)

-Ŋmʋn ˈmʋnan- ɲɔnjhao- dhueˈ ɔ ˈjhea ˈdhe ˈˈdhruigbooɛ ˈmʋn -e dhɛ ɔɔ nʋan -wɛeˈ ɔɔ muan ˈe jheejhee jha.

ˈˈDhruigbooɛ ɛ nʋɛn ˈʋn ˈtʋn ˈjɛɛn-! (4:33)

-Ŋmʋn -ka ɲʋn -ˈnʋʋn an ˈjhea ˈˈdhruigbooɛ ˈmʋn -mun ɛn.

“Pourquoi assister aux réunions tenues à la salle du Royaume?” (Dɩ ˈghwlʋa ˈo ɛntɛɛnɛtɩ ˈˈkpe ɛ)

-Ŋmʋn -ka ˈˈkudhbhai- dhueˈ ɔˈ ˈkmʋn nʋan ˈˈɩ zian- sʋn ˈbho Zoova aˈ -Bobhlaʋn anˈ ˈˈdhruigbooɛ ˈmʋn -mun ɛn ˈdhe ɛ.

“Je ne sortais jamais sans mon arme” (La Tour de Garde, 1er juillet 2014)