¿Mä nibira juto kwela yekrä?

1. ¿Mä näin kwelate ye ngwane mä raba dre nuainne?

¹ ¿Mä näin krire kwelate o mä niena näin kwelate? Monsotre kukwebätä jökrä tä ja tuin kukwe keta kabre ben kwelate. Akwa mä raba “kukwe [Ngöbökwe] era erere niere” nitre madai kwelate (Juan 18:​37, KKN). ¿Mäkwe ja ükaninante kukwe yekrä?

2. ¿Mäkwe ja ükaninante ño kwela yekrä?

² Jehová, mä rün bätä nitre sribikä täte metre bätä töbätä tä mä tötike kwin, yebätä mäkwe töbikadre angwane mä ñaka raba ja töibikare krubäte (Pro. 1:8; 6:20; 23:​23-25; Efe. 6:​1-4; 2 Tim. 3:​16, 17). ¿Kukwe meden ben mä raba ja tuin kwelate ye niena gare mäi? Kukwe medenbätä mä raba blite nitre kwelate yebe ye gare mäi angwane, mä tötikani Bibliabätä yebiti mä raba ja ükete kukwe driekäre ietre (Pro. 22:⁠3). Täräkwata ¡Despertad! bätä tärä ketebu Los jóvenes preguntan yebätä kukwe kwin Bibliabätä mikata gare monsotre bati kräke, kukwe yebätä mäkwe ja tötika.

3. ¿Mä raba kukwe bämike ño kwin kwelate?

³ Kwela ye känti mä raba kukwe kwin bämike, ye mäkwe ngwan törö jai. Mätä ja ngwäkite kwin o ja ükete ño, blite ño, ja ngwen ño, sribi bianta mäi kwelate ye mätä nuainne kwin, nitre dirikä kwelate bätä monsotre mada mätä mike tuin ütiäte jai, ye jökrä monsotre mada kätä mike ñärärä aune dreta mä töibätä ye nüke gare ietre. Ñobätä mä ñaka ja ngwen monsotre mada ye erere ye niaratre raba ngwentari mäi, ¿ñan ererea? (Mal. 3:18; Juan 15:19.) Ye köböire mätä dre mike täte ye mä raba mike gare ietre (1 Tim. 2:​9, 10). Ne madakäre, kwelate bieta ruäre bätä jondron mada abokän ñaka nemen kwin Ngöbökrä nuianta, ye ngwane ngwandretari mäi ñobätä mä ñaka kukwe ye nuainne ¿mäkwe dre niedre? Mäkwe niedre jerekäbe, “¿bieta ye ñaka kwin o ti testiko Jehovakwe yebätä?” O ¿ye ngwane mäkwe blitai ni Rün Jehová yebätä? Mäkwe ja tötikai kwin bätä mäkwe ja di käräi Jehovai angwane mä dimikai kwe kukwe driere ni jökrä ie, arato nitre nänkä kwelate mäbe bätä nitre dirikä yei (1 Ped. 3:15).

4. ¿Ñobätä kukwe kwin raba nemen bare mäbätä kwelate?

⁴ Kä jürä raba nemen mäbätä nänkäre kwelate, akwa mäkwe ngwan törö jai nitre kwati tö mä tuai ja tötike kwin kwelate. Ne madakäre, mäkwe kukwe driedre kwelate ye käi rabai juto krubäte nunbätä. Ye medenbätä, ¡mäkwe ñaka ja di ngwan nekä! Mä nibira juto kwela yekrä.