¿Nitre mrä dimikadre ño kukwe driere?
1. ¿Mäkwe kukwe drieba kena ye ngwane ja rababa ruin ño mäi?
1 ¿Mäkwe kukwe drieba kena ju ju te ye tä törö mäi? Ye ngwane mä nämä nikenkä krubäte. Akwa, ni mä tötikaka Bibliabätä o ni mada kukwe driekä nämä näin mäbe mä dimikakäre, yebätä ja rababa ruin kwin mäi, ¿ñan ererea? Kä nengwane Gobran Ngöbökwe kukwei driedre ye niena gare kwin mäi, aisete mä nibira juto nitre mrä dimikakäre kukwe driere.
2. ¿Kukwe medenbätä nitre mrä rabadre ja kite?
2 Nitre kukwe driekä mrä rabadre ja kite blita kömike ni madabe, kukwe driere Biblia yebiti, nitre tuinbiti bätä nitre tötike Bibliabätä. Akwa, ye ñan aibe ngörä, rabadre kukwe driere ji ngrabare, bätä jondron rürübäinta yekänti arato. ¿Mä raba niaratre dimike ño? Kukwe bämikadre käne aune kukwe niedre ietre dimikakäre.
3. ¿Nita kukwe kwin bämike ye kätä nitre mada dimike ño?
3 Kukwe bämikadre. Jesukwe kukwe bämikani nitre ja tötikaka ben yei kukwe driekäre (Luc. 8:1; 1 Ped. 2:21). Jesús erere, mäkwe kukwe ükadrete kukwe driekäre ni kukwe driekä mrä yebe, ye ngwane mäkwe kukwe nuäre dianka kukwe driekäre ne kwe niara rabadre nuainne, mä raba kukwe denkä täräkwata sribeta yebätä. Mun rabadrera kukwe driere ye ngwane mäkwe blita käne bati bobu, ne kwe niarakwe mä kukwe nuadre biti mun rikadre ju mada kokwäre, angwane mäkwe ngwantari ie tikwe kukwe drieni ye nibi tuin ño mäi. Mäkwe ye nuaindre ne kwe ni kukwe driekä mrä ie rabadre gare ñobätä ütiäte krubäte kukwe driedre ni madabe, aune mäkwe kukwe niedre ie dimikakäre ye ngwane niara rabai mä kukwe nuin.
4. ¿Ni kukwe driekä mrä käkwe blitadre ye bitikäre ni raba dimike ño?
4 Kukwe niedre dimikakäre. Kukwe driedre ño ye Jesukwe driebare nitre ja tötikaka ben yei (Mat. 10:5-14). Mä raba nuainne erere arato. Ni kukwe driekä mrä käkwe blitadre angwane mäkwe kukwe nua kwin. Blitadre ünän kwe angwane niara raba kukwe driere bäri kwin rabadre tuin mäi, akwa mäkwe ñaka niedre bengwairebe ie. Nuaindre ño kwe bobukäreta ju madate ye mäkwe ngüba. Nane tä nikenkä krubäte ye medenbätä, kukwe meden niedre kwin kwe yebätä mäkwe kwin nie ie. Ne madakäre, ni jökrä ñaka tä kukwe driere ja erebe aune nuain raba jene jene ye mäkwe ngwan törö jai (1 Cor. 12:4-7).
5. Ja töimikadre ni mada dimike, ¿ye ngwane ni raba dre niere ietre?
5 Ni kukwe driekä mrä raba ja di kärere mäi, o ñaka nuaindre kwe angwane mä raba ja töimike dimike, akwa mäkwe töbika kwin käne nuainkäre. ¿Nuaindre ño? Nitre ruäre kukwe drie gare kwin tä kukwe ne niere: “¿Ti raba kukwe niere mäi mä dimikakäre?”, o “¿Mäkwe nunien ño nibi ruin mäi?”. Kukwe ne nie raba arato: “Ti jatani kukwe driere angwane kukwe ne nämene nemen ribi tikrä ..., akwa kukwe ne käkwe ti dimikani ...”. Ruäre ngwane kukwe känä raba gwairebe tärä Razonamiento yebätä. Akwa ñaka kukwe niedre krubäte ie. Kukwe meden nuaindre bäri kwin kwe rabadre tuin mäi, akwa mäkwe blita kukwe keteiti aibebätä ben.
6. Hierrobiti hierro mada tutikata, ¿kukwe ye raba ni dimike ño kukwe driere?
6 Hierrobiti hierro mada tutikata. Timoteo ie kukwe drie nämene gare kwin, akwa Pablo käkwe niebare ie niara rabadre kukwe driere bäri kwin aune nirien kukwe ja üaire yebiti (1 Tim. 4:13, 15). Mäkwe kukwe driebare kena ye ngwane kä nikanina krubäte ta, akwa mäkwe ja di ngwan käre nuainne bäri kwin. Nitre kukwe driekä mäbe bätä nitre mrä yebätä mäkwe ja kita kukwe driere. Mä tädre juto biare ja mräkätre dimikakäre ja töi kwinbiti, akwa metrere nitre kukwe driekä mrä ye dimikakäre, ne kwe niaratre rabadre kukwe Ngöbökwe ye driere bäri kwin (Pro. 27:17).