Nitre Braibe konkrekasion jökrä Ngübabitikä tärä tikani
Nun mräkätre tare nunkwe:
¡Nitre mil kwä kükü biti bäri tä Jehová mike täte kä jökräbiti tibien yei kä jutobiti nunta tärä tike! ¿Testiko nünanka juta madate tä nemen gare mäi ye ngwane jata nemen ruin ño mäi? Tä nemen tare mäkwe ¿ñan ererea? (Juan 13:34, 35). Ye erere arato, munkwe ñäkäi anuariobätä ye ngwane kä rabai juto munbätä, ne ñan ñobätä aune, ja mräkätre juta jene jene te käkwe tödekani aune ja ngwani kwin metre ye rabai gare mun ie.
Ja tötikadre ni Mräkätre yebe ye mun kwati tä ja di ngwen nuainne ye tä nemen gare nuen. Nitre rüne tä kukwe keta kabre nuainne, ne kwe monsotre kia kwe rabadre ja tötika ye kukwe nuin kwin (Efe. 6:4). Nitre gure metre tätre ja tötike Bibliabätä gwairebe ye köböire tätre ja mäke bäri kwin jabe (Efe. 5:28-33). Nita ja tötike Kukwe Ngöbökwe yebätä kaibe o ni mräkätre ben ye köböire kukwe kwin tä nemen nikwe (Jos. 1:8, 9).
Juta ruäre känti ja mräkätre käkwe ja tuani kukwe tare nakaninkä yebe, ye medenbätä nun rababa töbike niaratre yebätä arato. Mun jökrä käkwe ja töi mikaba sribire gwairebe ja mräkätre dimikäre yebätä nunta debe bien munye (Hech. 11:28-30; Gál. 6:9, 10). Ne madakäre, munta juto biare jondron biankäre ja mräkätre konkrekasionte ye dimikakäre. Dorcas erere munta ja töi mike “jändrän kuin nuene ni mda mdakrä amne käre [...] ni bobre bobre die mike arato” (Hech. 9:36, WBT). Munta ye nuainne ye Jehovata mike ñärärä aune kukwe kwin mikai nemen bare munbätä kwe (Mat. 6:3, 4).
Juta ruäre te sribi Ngöbökwe nuainta ye gobrantre tä ñäkäire, aune tä mun mike tuin ngwarbe jai (Sal. 94:20-22). Jesukwe niebare nikwe ja tare nikadi nitre mada kisete ye gare munye, ye medenbätä munta kä ngwen nüke jai aune ngitie Jehová kokwäre ja kriemikakäre (Juan 15:19, 20). Nunta mun kädekete orasion nuainta nunkwe yete yei munkwe tö ngwan metre, aune “ni mda mda ngämi kite [kukwe] ngwentari munye, känenkri munkwe ja mika juto biare kukwe kakäre ngäbti” ye nunta ribere arato (1 Ped. 3:13-15, WBT).
Satana tö ni tuai nemen ni mada mada ben, akwa kä kwatire kwatire te ja mräkätre kwati krubäte tä ja ngübarebiti kwin ja mika gure yebiti, yebätä nunta kwin niere ietre. Kä nengwane nitre kwati ñaka ja mika gure ye mike tuin ütiäte jai, akwa “ni Dänkien di kri, yebti mun[ta] nüna dite” (Efe. 6:10, WBT). “Jändrän jökrä bianta Ngöbökwe ja ngibiakrä ni rüe ngäniene ye [munta] kite jabätä” aune munta “nünenkä dite jabätä diablu rüere” (Efe. 6:11, 12, WBT). Munta kukwe kwin bämike yebiti Jehová tä mike gare Satana abokän kukwe ngwarbe niekä (Pro. 27:11).
Nunta mike gare kä jutobiti Jesukwe ja nire biani ngwaninta törö jai kä 2011, ye ngwane nitre 19.374.737 nükani gätä yebätä. Munkwe ja töi mikani prekursor ausiliar nuainne abril yebätä ye köböire kukwe ye namani bare. Ni jökrä testiko Jehovakwe käkwe Jehová käikitaninkä ye köböire kukwe kwin namani gare nitre kwati ie käbiti tibien (Rom. 10:18). Sö ye arabebätä nitre 2.657.377 käkwe sribi prekursor ausiliar nuainbare, aune nitre kukwe driekä mada mada käkwe ja di ngwani kukwe driere bäri. Munta juto biare kukwe driekäre kä jutobiti ye tä kä mike juto nunbätä (Sal. 110:3; Col. 3:23).
Jehová ni dimikani ye köböire nitre 263.131 käkwe ja ngökani ñöte kä känente. Nunta debe bien munye munkwe nun dimikani kukwe nieta Revelación 22:17 ye nuainne yebätä. Texto ye tä niere: “Ngöbö Murie Deme, aune meri tä Kordero kräke, kätä niere krörö: ‘¡Jakwre!’ Kukwe juruadre nire ie, käkwe niedre: ‘¡Jakwre!’. Nire ie tömana, jakwre; angwane nire tö tömana ñai, käkwe ñö ja nire kräke ne ña ngwarbe”. Arato, kukwe keta kabre kädriebare Gobran Ngöbökwe yebätä gätä kri köbömä kä 2011 yete, ye medenbätä ni töita kwatibe kukwe ne niekäre: “¡Gobran mäkwe jatadre!”. Apóstol Juan ie Kristo käkwe niebare “¡Ti näinta jötrö kä temenbtä!” Aune apóstol Juan erere nita niere arato “¡Amen! ¡Jakweta ti Dänkien Jesu!” (Rev. 22:20, WBT).
Kukwe rakaikä ja känenkäre ye munta ngübare, akwa ja ngwaitre aune etebatre Jehová tarekä “era metre”, nunta mun itire itire tarere ye munkwe ñaka käi kwitaka jabiti (1 Juan 3:18, WBT).
Mun etebatre,
Nitre Braibe konkrekasion jökrä Testiko Jehovakwe Ngübabitikä