Kukwe driedre jäme jondron rürübäinta yekänti
1. ¿Ni aibe tä nemen grükekä kukwe driekäre jondron rürübäinta yekänti?
1 ¿Mätä nemen grükekä kukwe driekäre jondron rürübäinta yekänti? Ye erere angwane mäkwe ñaka töbika, ja tärä nemen ruin kore ni madai arato. Pablo töi nämene kwatibe kukwe driekäre, akwa niarakwe ja di ribebare Ngöböi ne kwe kä jürä ñaka rabadrebätä sribi mikani kisete ye nuainkäre (1 Tes. 2:2). Nita niken kukwe driere jondron rürübäinta yekänti ye ngwane kukwe meden tä ni töi nike aune dre raba ni dimike ye ani kädriere.
2. ¿Ñobätä nikwe ñaka töbikadre nitre sribikä ye raba nemen rubun ni kräke?
2 ¿Nitre sribikä rabai rubun ni kräke? Nitre tä sribire jondron rürübäinta yekänti tä juto biare nitre jökrä ka ngäbitikäre. Niaratre tä ni kain ngäbiti kwin, ñobätä ñan aune tätre nütüre ni abokän jondron kökaka arato. Nikwe ja ngwä kitai kwin, blitai kwin aune ja töi mikai jäme ye käkwe töi mikai ni mike ütiäte jai.
3. ¿Mä raba dre nuainne ne kwe nitre tä niken jondron kökö ye mäkwe ñaka nikadre?
3 ¿Nitre kwati okwä rabai tibätä? Jondron rürübäinta yekänti nitre ñaka tädre kwati ye ngwane mä raba niken kukwe driere, ñodre, jukwe tikadre dekä ye ngwane. Ni sribi ngübabitikä o ni sribikä yete tädre kaibe angwane blitadre jötrö ngwarbe bentre.
4. ¿Ni raba dre niere kukwe driekäre jondron rürübäinta yekänti?
4 ¿Tikwe dre niedre? Nitre sribikä tädre sribire angwane blitadre ni sribi ngübabitikä yebe. Mä raba niere krörö: “Nitre sribikä kä ne erere känti ye ñan tä kwen gwi nuen, ye medenbätä nun ki nete. Mätä sribire ye gare kwin tie aisete tibike blite jötrö ngwarbe mäbe”. Niaratre ñaka ni ketadre nitre näin jondron rürübäine ji ngrabare yebätä, yekäre täräkwata ye ütiä bianta ja töi jeñebiti ye mäkwe ñaka kädekate ietre, akwa niaratre käkwe ngwantaridre angwane mä raba mike gare ietre. Mä raba blite nitre sribikä mada yebe ye mäkwe ngwantari ni sribi ngübabitikä ie. Mä raba kukwe ye arabe niere nitre sribikä mada yei. Ni sribikä tädre ñaka ngwarbe angwane blitadre jötrö ngwarbe ben aune täräkwata kia biandre ie. Mä ñaka tuanemetre blite nitre sribikä mada yebe angwane täräkwata mikadrete niaratre kräke tätre niken ja düke chi yekänti.
5. ¿Ñobätä ñaka kä jürä ngwandre jabätä kukwe driekäre jondron rürübäinta yekänti?
5 Jesús bätä Pablo käkwe ñaka kä jürä ngwani jabätä kukwe driekäre nitre nämene sribire yekänti, ye erere mä raba nuainne arato (Mat. 4:18-21; 9:9; Hech. 17:17). Mäkwe ja di kärä Jehovai ne kwe mä töi rabadre jäme blitakäre (Hech. 4:29). Kukwe driedre jondron rürübäinta yekänti ye köböire kukwe kwin tä nemen bare, ñobätä ñan aune käre nitre tä niken yete. ¿Mä raba ja di ngwen kukwe driere jondron rürübäinta yekänti?