**Mäkwe diri bäri kwin: mäkwe kukwe drie kwin interfono yebiti**

Ñobätä ütiäte. Kä jürä raba nemen nibätä kukwe driekäre interfono yebiti. ¿Nikwe dre nuaindre ne kwe kukwe ye ñaka ni ngwandre di nekä sribi Ngöbökwe ye nuainkäre kä jutobiti? Interfono yebiti kukwe kwin ye mika raba gare nitre ruäre ie ye mäkwe ngwan törö jai (Rom. 10:14). Aune, ruäre ngwane kukwe driebarera kwin krubäte jondron yebiti (mäkwe Anuario 2011, página 65 bätä 66, aune Anuario 2000, página 54, párrafo 3 ye mika ñärärä). Nuaindre ño ye mikata gare ruäre nete.

Nuaindre ño:

Mäkwe kukwe ükate braibe jai niekäre aune mäkwe tika täräbätä jai ne kwe mäkwe ñäkädrebätä interfono yete ta. Ye köböire kä jürä ñaka rabai mäbätä. Käne, ñokäre mätä näin ye mäkwe mika gare ni gwi yei. Ni ye kä tädre tikani interfono yebätä angwane mäkwe kädeka kä kwe yebiti. Mä jämi nikenta ye ngwane, mäkwe täräkwata Ni Mikaka Mokre o ¡Despertad! o täräkwata mada abokänbätä kukwe mikata gare bäri ye drie ie. Mä raba bien ie o mikete jukwebätä kräke mäkwe nie ie.
Mäkwe ja töi mika kwin. Mäkwe ja kukwei mika kötare aune ni ye tä mä ngwärekri ye kwrere mäkwe ja bämika.
Blitata kwin jabe kwärikwäri ye kwrere mäkwe ja kukwei mika. Mä kukwei juruadre näre mäkwe blita aune merebe. Mäkwe ñaka ja kukwei mika nünenkä nünenkä, akwa mäkwe ñaka blita drekebe krubäte.
Mäkwe töbika kwin. Ju krikri yete interfono yete timbre tärä kabre, akwa bäri kwin nikwe ñäkädre cuarto kubu o komä ye aibe te interfono yebiti, aune nikwe kukwe ruäre tikadre jai biti ni rikadre mento. Ni rabaite raire yete ñäke interfono yebiti cuarto kwatire kwatire te angwane, nitre nünanka yete raba töbike blo nibätä.

Mäkwe kukwe ne nuain sö krati:

Ngöbö mikadre täte ni mräkäbe ye mäkwe nuain ngwane munkwe ja kita blitakäre jabe akwa munkwe ñaka ja mika ñärärä ngwärebätä.