Nikwe ja töi mikadre kwatibe nitre mikakäre ja tötikaka
1. ¿Ñokänti nitre raba nemente nire?
1 Sribibare nuäi Ngöbö kräke kä 2014 yete ye tä mike gare, juta Ngöbökwe tä kukwe kwin Gobran Ngöbökwe yebätä ye driere kä jutobiti aune tätre ja di ngwen nuainkäre (Mat. 24:14). Kukwe drieta ju ju te, täräkwata döräita o täräkwatabiti nitre nübaita aune kukwe drieta nitre nemen kwati yekänti ye köböire ni raba kukwe Bibliabätä ye mike gare nitre kwati krubäte ie. Akwa, niaratre rabadrete nire yekäre, nikwe dimikadre ne kwe rabadre ja tötikaka Jesukwe aune kukwe metre Bibliabätä ye driedre ietre (1 Tim. 2:4).
2. ¿Kukwe meden ngwantarita käkwe ni dimikai ja tötika Bibliabätä ye driere?
2 Nikwe ja tötika Bibliabätä ye driedre. Nitre törba kukwe mada mikai gare jai angwane, ¿nita kä tike täräbätä jai aune nita ja di ngwen ja tötika Bibliabätä ye driekäre ie? ¿Nita nitre tötike ño Bibliabätä ye ñongwane nikwe bämikani mrä nitre ie nikwe blitabare kena bentre ye ngwane? ¿Ñongwane nikwe ja tötika Bibliabätä ye driebare mrä nitre ie nita niken täräkwata Ni Mikaka Mokre ngwena yei? ¿Nikwe video ¿Ñobätä ja tötikadre Bibliabätä? aune ¿Nunta nitre tötike ño Bibliabätä? ye mikanina tuare nitre sribikä nibe o nänkä kwelate nibe, nitre nünanka ni bäre, ni mräkätre aune nitre gare nie yei? Jondron tärä aune täräkwata mikakäre tuadre yebiti nita kukwe driedre ye ngwane, nitre tä niken tärä ja tötikakäre ye ngwena jai. ¿Nitre ye tötika raba Bibliabätä arato ye nita ja di ngwen niere ietre?
3. ¿Nita dre ribere kukwe metre ye driekäre bäri kwin nitre madai?
3 Jehová aune Jesús tä ni dimike. Nikwe nitre mikadre ja tötikaka niebare Jesukwe ye ngwane, kukwe ne niebare kwe “mun nän”. Nebiti bämikani kwe nikwe ja di ngwandre aune nikwe nuaindre käne. Ne madakäre, ñaka ni tuanimetre kaibe kwe. Ñakare aune niara täi nibe käbämikani kwe (Mat. 28:19, 20, Kukwe Kuin Ngöbökwe). Ne madakäre, Jehová ñan tä üai deme kwe ye aibe bien nie, ñakare aune tä tärä keta kabre bien nie aune tä ni tötike kwin ne kwe nikwe kukwe metre driedre nitre madai (Zac. 4:6; 2 Cor. 4:7). Ngöbökwe ni töi mikadre aune ni dimikadre sribi ütiäte ye nuainkäre ye nikwe ribedre ie (Filip. 2:13).
4. ¿Ñobätä nikwe ja töi mikadre kwatibe nitre mikakäre ja tötike?
4 Nita kukwe kwin driere ye tä kämike juto nibätä. Akwa nikwe kukwe metre ye driedre nitre ie aune nikwe dimikadre näin nibe “ji krä chi tibien ja nire kräke” yebiti angwane, kä rabai bäri juto nibätä (Mat. 7:14; 1 Tes. 2:19, 20). Akwa kukwe ne bäri ütiäte, nikwe ja töi mikai kwatibe nitre mikakäre ja tötike angwane, nikwe kä mikai juto Jehovabätä, niara “ñan tö tärä ni ño kwa tuai nete, akwa niara tö ni jökrä tuai ja töi kwite” (2 Ped. 3:9, Ngöbö Täräe, tärä okwä ükaninte).