Tärä keta kabre nitre tötikakäre
1. ¿Kukwe medenkänti nitre kristiano ye nitre jondron sribekä ye erere?
1 Nitre jondron sribekä yekwe jondron keta kabre tärä sribikäre. Jondron ruärebiti tätre nane nane sribire akwa jondron mada abokänbiti tätre sribire mantre jetebe. Nitre ie jondron sribe gare yei jondron meden medenbiti sribi gare bäri kwin ye erere tätre niken ngwena jai. Nikwe ja di ngwandre dirikäre bäri kwin nieta Bibliakwe nie. Ñodre, ni Testiko itire itire rabadre “ni sribikä ie jondron ñan tärä kwen ja gaikrä kwrere” nieta (2 Tim. 2:15, Ngöbö Täräe, tärä okwä ükaninte). ¿Tärä medenbiti metrere nikwe diridre? Erametre, Biblia yebiti metrere nita nitre mike ja tötikaka (Mat. 28:19, 20). Yebätä, nikwe ja di ngwandre “kukwe bökän drie[re] [...] metre”. Akwa, tärä o täräkwata mada sribeta yebiti ni kristiano jökrä rabadre dirire kwin kukwe metre ye mikakäre gare ni madai (Prov. 22:29).
2. ¿Tärä o täräkwata meden medenbiti nikwe nitre tötikadre?
2 Tärä o täräkwata nitre tötikakäre. ¿Tärä o täräkwata meden sribebare arato abokänbiti nikwe nitre tötikadre? Tärä ¿Dre drieta erametre Bibliakwe? yebiti bäri nita nitre tötike Bibliabätä. Nita ja tötike tärä ye jökräbätä ni ja tötikaka nibe yebe angwane, nita tötike tärä Munkwe Ngöbö taredre jankunu yebiti ne kwe kukwe nieta Bibliabätä ja jie ngwankäre ye erere nuaindre kwe. Yebätä, tärä kubu yebätä kukwe meden meden kädrieta aune diridre ñobiti ye nikwe mikadre gare kwin jai. Täräkwata ruäre sribeta dirikäre nie arato. Ñodre, täräkwata Ngöböta kukwe kwin mike gare nie yebiti ja tötika Bibliabätä kömika raba. Nita kukwe driere yekänti nitre ruäre ie ñäkä ñaka gare täräbätä o blite kukwe madabiti aune tärä ñaka niaratre ye kukweibiti angwane, ni raba tötike täräkwata Mäkwe Ngöbö mika täte o Mäkwe Ngöbö mika täte aune mäkwe nünain kärekäre yebiti. Täräkwata ¿Nire nire tä kukwe Jehovakwe nuainne ni näire? yebiti ni raba nitre ja tötikaka nibe dimike arato juta Jehovakwe mike gare jai. Video yebiti ni raba nitre mike ja tötikaka arato yebätä nikwe diridrebiti. Ruäre kädekata ¿Ñobätä ja tötikadre Bibliabätä?, ¿Gätä nuainta ño nunkwe?
3. ¿Täräkwata Sribi Nikwe Ngöbökrä mada sribedi ja känenkäre yebätä dre rabai gare nie?
3 Tärä o täräkwata sribeta nitre tötikakäre yebiti ni raba dirire ño bäri kwin ye mikai gare täräkwata Sribi Nikwe Ngöbökrä mada sribedi ja känenkäre yebätä. Nikwe ja di ngwain dirire kwin tärä aune täräkwata sribeta yebiti angwane, kukwe nieta Bibliakwe ne erere ni täi nuainne: “Ye erere makwe ja ngibia au ne ngwane, ni kwati ma kukwei nuaka abko Ngöbökwe dianditari siba mabe gwaire” (1 Tim. 4:16, Kukwe Kuin Ngöbökwe).