¿“Kä tibien rabadre mäkwe” yekäre mäta juto biare?

KUKWE käbämikani Jesukwe ne rabadre bare ye ie ni jökrä tö: “Nire nire ñan tä bike kri ni mda mda okwäbti abko Ngöbökwe die mikadi amne kä rabadi nuäre btä, ñobtä ñan angwane Ngöbökwe kä temen ne biandi ie” (Mat. 5:5). Nitre dianinkä nänkäre kä kwinbiti ye rabai reire kristobe kä kwinbiti ngwane, kä tibien rabai kwetre meden gärätä (Apoc. 5:10; 20:6). Nitre kristiano kwati abokän tö kä tibien ie aune nünain kärekäre te. Töi rabai metre, kä rabai juto bätätre aune rabai jäme. Tödekara ye rabadre bare metre yekäre sribi ütiäte rabai nuaindre ietre. Ketamä ye rabai gare nie kukwe ja tötikara nekänti: kä tibien kwitei bä nuäre, nitre gaikröta ye dimike aune dirire ietre. Mä tö sribi ye nuainbätä kä bä nuäre yete bämikakäre mä raba dre nuainne gwä ngwane ye rabai gare nie arato.

JUTO BIARE KÄ TIBIEN KWITAKÄRE BÄ NUÄRE

“Nirien kwati jatäri nünankäre kä jökräbiti tibien aune munkwe sribi kä tibien yete” niebare Jehová ngwane, kä tibien rabai bä nuäre gärä nämäne kwe (Gén. 1:28). Nirekwe nünain kärekäre kä tibienbätä ye käkwe Kukwe niebare ye mikai täte. Rü Armagedón ye bitikäre kä ñaka täi bä nuäre ñobätä ñan aune kä bä nuäre Edén ye nianinanka mekera. Kä juanina ngwarbe ni kä tibienbätäkwe ye ükaite. ¡Sribi rabai nuaindre ere!

Nitre israelita nämäne Babilonia nükaninta ja käite ngwane, ye erere nuainbare kwetre ñobätä ñan aune juta kwe yete kä 70 te ni ñan nünanbare. Akwa Jehová diebiti juta ye ükaninte kwetre Isaiakwe mikani gare erere: “kä nötare ye mikaita kä Eden erere kwe aune kä kiare nötare ye rabaita kä bä nuäre Jehovakwe ye erere” (Is. 51:3). Nitre israelita kä tibien kwitaninta bä nuäre. Ye erere arato, nirekwe kä tibien rabai yekwe kä tibien kwitai bä nuäre Jehová diebiti. Mä tö sribi ye nuaindi siba ye mä raba bämike biarebe.

Kukwe mada nuain raba arato, ñodre, ni raba ju jakwe ye mike mrebe aune ükete kwin. Nitre nünanka ni bäre ñan tä nuainne akwa nikwe nuaindre. Nikwe ja töi mikadre Ju Ja Ükarakrö aune ju gätä kri nuainkäre ye mike mrebe aune ngübare kwin, yebiti nikwe kukwe nuaindi bäri. Aune ni raba ngwane sribi nuainta nitre dimikakäre kukwe tare näire yebätä nikwe ja töi mikadre sribire siba. Ye köböire nitre dimikadre tä ribere jai ye nita dimike nikwe bämikai. Ngwentari jai: “¿Ti raba ja kite kukwe ruärebätä ne kwe Jehovakwe ti tuainmetre nüne kä tibienbätä ngwane, tikwe sribidrebiti?”.

Ja mräkätre ja ta sribire Ju Ja Ükarakrö yebätä.

JUTO BIARE NITRE GAIKRÖTA DIMIKAKÄRE

Jairo ngängän ganinkröta ye bätäräbe Jesukwe bukamana mröte (Mar. 5:42, 43). Monso merire kä 12 biti dimikadre ye ñan namani tare krubäte. Akwa Jesukwe kukwe käbämikani ne rabai bare ngwane sribi rabai nuäi nuaindre ye bämike ja okwäte: “Nitre jökrä tä dobote yei niara kukwei juruai aune jataita kä merebiti” (Juan 5:28, 29 TNM). Kukwe kiakia ye Biblia ñan mike gare, akwa mrö, ju, dän ye nitre gaikröta käkwe ribei jai ye gare metre nie. Kukwe ngwantarita nebätä töbike ¿Ni tö ja tuai yete nitre dimike siba ye ni raba bämike gwä ngwane?

Kä tibien rabadre mäkwe yekäre mä niena juto biare, ¿bämikakäre mä raba dre nuainne gwä ngwane?

Gätä kri internacional París yekänti jä mräkätre ruäre tä delegado kain ngäbiti kä jutobiti

Ni circuito tuabitikä jatai mikata gare konkrekasion mäkwe yete ngwane, ¿mätä nübaire mröre ja gwirete? Ni sribikä Betelte juandreta sribire jubäre o ni circuito tuabitikä sribidre ünä ngwane, ¿mä raba dimike ne kwe ju kwandre nünankäre ie? Gätä kri regional o especial sribedre mä käite ngwane, ¿mä raba ja töi mike sribire gätä ye känenkri aune ye bitikäre o ja mräkätre delegado ye ka ngäbitikäre?

JUTO BIARE NITRE GAIKRÖTA YE TÖTIKAKÄRE

Nitre kwati krubäte gaikröta ye nemen gare nie kukwe nieta Hechos 24:15 yebiti. Nitre kwati ye ie Jehová ñan namani gare krütadre känenkri akwa kä bä nuäre yete kä rabai ietre Jehová mikakäre gare jai.a Nirekwe Jehová mikanina täte kä kwati krubäte te yekwe sribidi siba nitre tötikai yebätä (Is. 11:9). Charlotte meri testiko ye käkwe kukwe driebarera Europa, Sudamérica aune África tö köbö ye tuai krubäte. Kötare kwärä nieta kwe: “Nitre gaikröta ye ti tö tötikai. Nitre kira yebätä tita ñäke ngwane, bä kabre tita nemen töbike ne kwrere: ‘Jehová rabadre gare ni ye ie akräke nünandre jene kwe’. Ti tö Jehová mikai gare nitre gaikröta ie aune Jehová mikadre täte kwe ye köböire nünain kwin kwe ye ti tö mikai gare ietre”.

Nitre Jehová mikaka täte nünanbare Kristo rükadre kä tibienbätä känenkri ye ie kukwe rabai krubäte ja kitakäre. Daniel kukwe tikabare akwa ñan nükani gare ie, ye namani bare ño ye nikwe mikai gare ie ye rabai kwin aune ütiäte ni kräke (Dan. 12:8). O Rut aune Noemí ye bükün iti namani Mesías ye nikwe dimikadre mike gare jai ye rabai kwin krubäte ye bämike ja okwäte. Sribidi nitre tötikakäre kä jökräbiti tibien yebätä sribidre nikwe ye käkwe kä mikai nuäre nibätä aune kä käme köböite nita ja tuen kukwe tare ben aune tä ni näkwite ye ñan rabaira kä ye ngwane.

Dän bätäteta ni jökrä kräke yekänti meri testiko tä täräkwata chi bien meri iti ie.

Kukwe ükaite nitre tötikakäre kä jökräbiti tibien yebätä, ¿mä tö sribidi mä raba bämike ño? Kukwe keteitibiti bämikadre ye abokän nikwe ja di ngwandre rabakäre ni dirikä kwin aune nikwe käre kukwe driedre (Mat. 24:14). Kä nuäi nibiti o kukwe tä ni kisete köböite ni ñan raba nuainne, akwa nikwe ja di ngwain sribi nuainkäre kwin ngwane, nita juto biare nitre gaikröta ye tötikakäre nita bämike.

Kukwe ütiäte ngwantarita nebätä töbikadre ye kwin: ¿Erametre kä tibien rabadre mäkwe ie mä tö? Kä tibien kwitai bä nuäre ye käi juto mäbätä, nitre gaikröta ye mä tö dimikai aune nitre gaikröta ye ie, ¿mä tö kukwe metre mikei gare? Sribi nuainta nengwane ye kwrere bäsi nuaindi ja känenkäre yebätä mäta ja töi mike sribire gwä ngwane ngwane, mäta juto biare sribikäre ja känenkäre mäkwe bämikai.

a Kukwe ja tötikara kädekata “Nitre kwati ngwain kukwe metre kokwäre” tä täräkwata Ni Mikaka Mokre septiembre 2022 yebätä ye mikadre ñärärä.