Kukwe ja tötikara 15
Nikwe ni mada dimikadre Ngöbö kukwei ye nuainne
¿Ñobätä mäkwe blitadre kukwe drieta mäi yebätä? (1)
¿Nire nire ie mä raba kukwe kwin mrä ye mike gare? (2)
¿Kukwe nuainta nikwe ye raba mate ño ni madabätä? (2)
¿Dre nuaindre mäkwe ne kwe mä rabadre kukwe driere konkrekasion yebe? (3)
1. Jondron kwin kwati nükanina gare mäi Biblia yebätä. Kukwe niena gare mäi ye käkwe mä dimikadre ja ngwen ni kristiano erere. (Efesios 4:22-24.) Ne madakäre, ja tötikata mäkwe ye bäri ütiäte ne kwe ja nire käre ye rabadre mäkwe. (Juan 17:3.) Akwa nikwe kukwe kwin mrä ye mikadre gare ni madai ne kwe ja nire ye rabadre kwetre arato. Nitre kristiano erametre jökrä käkwe kukwe driedre. Ngöböta ne nuainmana nie. (Romanos 10:10, Kukwe Kuin Ngöbökwe; 1 Corintios 9:16; 1 Timoteo 4:16, Kukwe Kuin Ngöbökwe.)
2. Jondron kwinbätä mätä ja tötike ye mä raba kädriere nitre nünanka mä bäre tibien yebe. Kukwe ye mäkwe kädrie mä mräkätrebe, ni ja ketamuko mäkwe yebe, ni nänkä kwelate mäbe bätä sribi muko mäkwe yebe. Mäkwe nuain bätärekä bätä töi kwin jämebiti. (2 Timoteo 2:24, 25.) Mäkwe ngwan törö jai, ni mada ñaka ni kukwei ye miketari ñärärä, akwa nita ja ngwen ño, ye meden mikata ñärärä kwetre. Ye medenbätä, mäkwe ja ngwandre kwin ye köböire kukwe drieta mäkwe ye kukwe nua raba ni madakwe. (Mateo 5:16, Kukwe Kuin Ngöbökwe; 1 Pedro 3:1, 2, 16.)
3. Ye bitikäre mada, Ngöböta dre nuainmana mäi ye erere mäkwe nuaindi ye angwane mä raba kukwe driere konkrekasion nitre testiko Jehovakwe känti mätä ja ükökrö yebe. Kukwe ne nuaindre ye ütiäte krubäte nänkäre ja känenkäre kukwebätä. (Mateo 24:14.) ¡Mäkwe ni mada dimikadre Jehová mike täte ne kwe ja nire käre ye rabadre kwe ye käi raba nemen juto krubäte! (1 Tesalonicenses 2:19, 20.)