KUKWE JA TÖTIKARA 07

¿Dre gare Jehovabätä nie?

Täräkwatare

Mätä töbike Jehovabätä ngwane, ¿mätä bämike ño ja töite? ¿Muke kri tä mente kwin ye erere niara tä mente nibätä ruin mäi? ¿Niara dite krubäte aune ñaka ni töibikaire ruin mäi? ¿Metrere Jehová ye ño? ¿Aune ja ngwen ño? Jehovata ja ngwen ño aune töita mäbätä ye mikata gare kwe Bibliabätä.

1. ¿Ñobätä Ngöbö ñaka tuin nie?

“Ngöbö ye abokän üaire” (Juan 4:24, TNM). Jehová krä aune ngätä ñaka. Niara ye üaire, tä nüne kä kwinbiti aune tä nüne ye käi ñaka raba tuin nie.

2. ¿Jehová töi ño ni kräke?

Jehová ñaka tuin nie, akwa tä nemen gare nie ngwane, ni töita nemen tarebätä, ñobätä ñan aune niara töi kwin krubäte. Biblia tä niere: “Kukwe metre nuainta ye Jehovata tarere aune ni ja ngwanka metre ie ye niarakwe ñaka tuainmetre kaibe” (Salmo 37:28). Niarata “ni tarere krubäte aune ni mike tuin bobre jai”, metrere ni ja tare nikaka kräke niara töi kore (Santiago 5:11, TNM). “Jehová tä nitre brukwä nötaninte ye ken; nitre tä di nianinkä krubäte ye mikata kwäre kwe” (Salmo 34:18). ¿Nita kukwe nuainne yebiti ni raba kä mike jutobätä o mike ulire ye gare mäi? Nita kukwe käme nuainne ye tä Jehová mike ulire (Salmo 78:40, 41). Akwa nita kukwe kwin nuainne ye tä kä mike jutobätä (mäkwe ñäkä Proverbios 27:11 yebätä).

3. ¿Jehovata ni tarere ye tä bämike ño nie?

Ja tare ye abokän Jehová töi bäri ütiäte. “Ngöbö abokän ja tare” (1 Juan 4:8, TNM). Biblia aune jondron sribebare kwe yebiti tä ni tarere tä bämike nie (mäkwe ñäkä Hechos 14:17 yebätä). Ñodre, niarakwe ni sribebare ne kwe jondron bä tuärebe jene jene rabadre tuin nie, ni rabadre musika käi ngwen juto jabätä, mrö bänänte kwete aune kä tädre juto nibätä.

JA TÖTIKE BÄRI NGUSETA

Drebiti Jehovata jondron nuainne aune niara töi kwin keta kabre ye tä bämike ño nie ye nikwe mikai gare jai.

4. Üai deme ye Ngöbö die

Üai jatäri: Jondron sribebare Ngöbökwe üai deme yebiti. 1. Planeta aune kä kwinta. 2. Ngöböta kukwe tikamana ni Biblia tikaka ie ye niarata tike rollobätä.

Nita sribire kisebiti, Jehová abokän tä üai deme yebiti jondron nuainne. Üai deme ye ñaka Ngöbö nieta Bibliakwe, ñakare aune Ngöbö die, yebiti niarata jondron jökrä nuainne. Ñäkädre Lucas 11:13 aune Hechos 2:17 yebätä aune kukwe ne kädriedre jabe:

Nirekwe üai deme käräi Ngöböi ye ie biain kwe. ¿Üai deme ye Ngöbö o Ngöbö die? ¿Ñobätä mätä kukwe ye niere?

Üai deme yebiti Jehovata jondron ñan tuabare nuainne. Ñäkädre Salmo 33:6 aune 2 Pedro 1:20, 21 yebätä aune kukwe ne kädriedre jabe:

¿Jehovakwe dre dre nuainbarera üai deme yebiti?

5. Jehová töi kwin ye tä ni mike nökrö kokwäre

Moisés nämäne Ngöbö mike metre täte, akwa tö nämäne Ngöbö mikai gare bäri jai. Aisete niebare kwe ie: “Ji mäkwe ye driere tie ne kwe mä rabadre gare tie” (Éxodo 33:13). Aune Jehová töi ño ye mikani gare kwe Moisés ie. Ñäkädre Éxodo 34:4-6 yebätä aune kukwe ne kädriedre jabe:

¿Jehová töi kwin meden meden mikani gare kwe Moisés ie?
¿Jehová töi kwin keta kabre ye meden tuin bäri kwin mäi?

6. Jehová töita krubäte nibätä

Nitre hebreo, juta kirabe Jehovakwe, ye nämäne klabore Egipto. Nämänentre ja tare nike namani tuin Jehovai ngwane, ¿ja namani ruin ño ie? KUKWE BIBLIABÄTÄ GRABABARE ye kukwe nuadre o ñäkädre Éxodo 3:1-10 yebätä. Biti kukwe ne kädriedre jabe:

KUKWE BIBLIABÄTÄ GRABABARE: Juta Jehovakwe nämäne ja tare nike ye namani tare ie (2:45)

Nitre tä ja tare nike ngwane, ¿jata nemen ruin ño Ngöböi? (Bersikulo 7 aune 8 mikadre ñärärä).
¿Jehová tö nitre dimikai raba ruin mäi? ¿Die tärä nuainkäre raba ruin mäi? ¿Ñobätä mätä ye niere?

7. Jondron sribebare Jehovakwe ye raba niara töi mike gare nie

Jehovakwe jondron sribebare yebiti niara töi ño ye tä mike gare nie. VIDEO mikadre ñärärä. Biti, ñäkädre Romanos 1:20 yebätä aune kukwe ne kädriedre jabe: