Kukwe kwin ja känenkäre tä ni käne
“Kä nebera braibe aune nitre käme ye ñaka rabaira [...]. Akwa nitre töi jäme yekwe kä tibien rabai aune kä jäme krubäte ye kä ngwain juto kwetre jabätä” (SALMO 37:10, 11).
¿PROFECÍA ye rabadre bare ie mä tö? Jän, ye erere Kukwe keta kabre tä mike gare profecía ye köböra nemen bare.
Kukwe känekäne yebätä miri gare, profecía Bibliabätä ruäre tä mike gare nita nüne kä krüte yete (2 Timoteo 3:1-5). Nitre Biblia tikaka ye Ngöbökwe jie ngwani üai deme kwe yebiti profecía ye mikakäre gare ne kwe ni rabadre tö ngwen (Romanos 15:4). Profecía tä nemen bare kä nengwane ye tä mike gare kukwe ben nita ja tuin ye köböra niken ta.
¿Kä krüte ye bitikäre dre rabai bare? Gobran Ngöbökwe rabaira nitre kä tibienbiti gobraine (Mateo 6:9, 10). Kä ye ngwane nüna rabai ño nieta Bibliakwe ye mike gare jai:
● Mrö nika ñaka rabaira. “Nura ngwä rabai krubäte käbiti tibien; ngutuäbiti kwin ngwä rabai bäri ere krubäte” (Salmo 72:16).
● Bren ñaka rabaira. “Ni iti jire käkwe ñaka niedi: ‘Tita bren’” (Isaías 33:24).
● Kä tibien ükaiteta kwin. “Kä ngwarbe nötare aune dobo nötare ye rabai kä ngwen juto jabätä, kä kiare nötare yebätä kä rabai juto aune blü rabaikä azafrán ye kwrere” (Isaías 35:1).
Profecía tärä keta kabre abokän rabai bare, akwa ruäre aibe mikata gare nete. Mä törba kukwe mikai gare bäri jai ngwane, mäkwe ja di kärä ni testiko Jehovakwe iti ie aune ñobätä niaratre tä tö ngwen kukwe kwin rabai bare ja känenkäre ye mäkwe ngwantari ie.