Nita ja tötike Bibliabätä ye ngwane nikwe dre nuaindre ne kwe ni dimikadre kwe

SRIBI kri mikani Josué kisete: ye abokän niarakwe nitre israelita jie ngwandre nemen Kä käbämikani ietre yekänti. Akwa rabadre bare ie yekäre ja tuadre kwe kukwe kri ben. Jehovakwe niebare ie, ñaka kä jürä ngwandre kwe jabätä, rabadre ja ngwen dite aune kukwe kwin rabai bare kräke. Niebare kwe ie, rabadre ñäke Kukwe biani kwe yebätä dibire aune rare ne kwe kukwe ye mikadre täte jökrä kwe. Aune niebare kwe ie arato, niarakwe ye erere nuaindi ngwane, kukwe kwin rabai kwe aune ja ngwain töbätä kwe (Jos. 1:7, 8).

“Kukwe tare krubäte jatai nakainkä, ye ñaka rabai nuäre ükatekäre” ye näire, nikwe ja tuai kukwe tare krubäte ben arato (2 Tim. 3:1, TNM). Jehovakwe kukwe niebare Josué ie ye erere nikwe nuaindi ngwane, kukwe kwin rabai nikwe arato. Nikwe ñäkäi mantre jetebe Bibliabätä yekwe ni dimikai kukwe nieta Bibliabätä ja jie ngwankäre ye erere nuainne, kukwe kri rabai ni kisete ye ngwane.

Ni raba niere metre, ni jökrä bäsi ie ja tötikadre ño ye ñaka gare aune ni ruäre ñaka töta nemen ja tötikai. Akwa, ja tötikadre Bibliabätä ye ütiäte krubäte, yebätä ni rabadre ñäke recuadro “Mä raba kukwe ne nuainne” nieta yebätä. Yete kukwe ütiäte nieta abokän käkwe ni dimikai kukwe ruäre nuainne nita ja tötike Bibliabätä ye ngwane.

Salmista käkwe kantabare: “Mäkwe ti jie ngwan kukwe mäkwe yebiti, ñobätä ñan aune kukwe ye käi juto tibätä” (Sal. 119:35). Mäkwe ja tötikai Kukwe Ngöbökwe yebätä ngwane, kukwe kwin rabai mäkwe arato. Mäkwe kukwe mikai gare jankunu jai ngwane, kukwe ütiäte keta kabre rabai gare mäi.

Mäkwe ñaka nitre kwati jie ngwain Josué nuainbare ye erere, akwa kukwe ruäre tä mä kisete yebe mäkwe ja tuai. Aisete Josué erere, kukwe tikani mä dimikakäre yebätä mäkwe ja tötika aune mäkwe mika täte. Mäkwe ye erere nuaindi ngwane, kukwe kwin rabai mäkwe aune mäkwe ja ngwain töbätä.