Kukwe ükaninte mrä gätä kri köböbu kräke

¿Nitre kätä ja mike kukwe metre Ngöbökwe mikata täte ye rüere, ye ngwane ño ni raba ja ngwen dite? ¿Kukwe kätä ni töimike jankunu näinta kä käme yekwäre ye ni raba denkä ño ja töibätä? Kukwe ngwantarita ne mikai gare kukwe ükaninte gätä kri köböbu kä 2009 kräke yete. Ne kädekata “Nikwe kukwe käme ye ganaindre jankunu kukwe kwin yebiti” (Rom. 12:21). Kukwe kädriei ye ani kädriere jötrö ngwarbe.

Ni gätä kri köböbu tuabitikä ye käkwe kukwe ne kädriei “Ni tädre dite kukwe käme ye ganainkrä kukwe kwin yebiti”, “¡Nikwe ñaka tö ngwandre krubäte jai!”, “¡Kukwe jökrä käme ye köböira krüte!” bätä “Tödeka nikwe ye mikadre dite kä käme ye ganainkrä”. Ni ni tuabitikä konkrekasionte käkwe blitai kukwe nebätä nibe: “Kä nengwane nikwe ja ngwandre mokre”, dianinkä Romanos 13:11-​13 yebätä, bätä “Nikwe ñaka ja di ngwandre nekä kukwe tare ye ngwane”, dianinkä Proverbios 24:10 yebätä. Arato ni ni tuabitikä konkrekasionte käkwe kukwe kädriei ye ni tö kukwe nuai kädekata “Dreta nuaindre sirkwito nete nie, yebätä nikwe töbikadre”. Kukwe mada kädriei käkwe ni dimikai kädekata “¿Ni raba ja mike prekursor ‘sribi ne nuainkäre’?” Kukwe kädriei jatäri ye kena kädekata “Nikwe ja ngwandre dite kö okwä Diablukwe ye rüere”. Kukwe ne käkwe ni dimikai kö okwä Diablukwe ye mike gare jai bätä ñaka ja mikadre ngökadre ie jondron mrä keta kabre nuainta, kukwe ja näkwitara bätä ja tötika kwelate yebiti. Kukwe kädriei jatäri ketebukäre “Nikwe ja mikadre dite kä ngwankäre nüke jai kä käme nete” ye käkwe mikai gare nie kukwe nieta Efesios 6:​10-​18 känti ye ño ni raba nuainne bäri kwin.

Kukwe käme ye ganainkäre Gobran Ngöbökwe kukwei ye driedre (Rev. 12:17). Yebätä, Satana di ñaka nekä ni testiko Jehovakwe ye rüe mike jankunu (Isaías 43:10). Akwa Diablu ñaka ganain jire chi ne ñan ñobätä ni töita kwatibe “kukwe käme ye ganainne kukwe kwin yebiti”. Mäkwe kukwe ükate biare jai ne kwe kukwe kwin kädriei gätä kri köböbu yete, ye rabadre gare jökrä mäi.