Kukwe kwin nitre kukwe driekä kräke
1. ¿Kukwe meden nuain jatani kä 1938 yete, aune ñobätä nuainbare?
1 Kä 1938 ye ngwane juta Jehovakwe jatani “asamblea de zona” nuainne, gätä ye kädekata kä nengwane gätä kri köböbu, gätä yebätä konkrekasion ruäre nübai nämene. ¿Ñobätä gätä ye nuain nämene? Täräkwata Informador (kä nengwane, Sribi Nikwe Ngöbökrä) enero kä 1939 (tikani inglere) käkwe niebare: “Juta Ngöbökwe tä gätä ne ükete aune Jehová kätä nitre jie ngwen sribi kwe nuainkäre juta yebiti. Nire nire törba sribi Ngöbökwe nuain kwin, ye kräke kukwe kädrieta yete ye ütiäte krubäte”. Kä 1938 ye ngwane nitre 58,000 aibe nämene kukwe driere, akwa kä 2009 nitre niena siete millon bäri, ne kätä mike gare, gätä ye kätä nitre kukwe driekä dimike “sribi mikani kisete ye nuainne”.
2. ¿Gätä kri köböbu nuaindi yete kukwe meden meden kädriei?
2 Kukwe ne kädriei. Septiembre ja känenkäre gätä kri ye kömikai, yete ni kristiano käkwe ja dimikai kwärikwäri ye abokän nita ngübare kä jutobiti. Gätä ye tä dianinkä Juan 15:19 yebätä, känti nieta: “Mun ñaka kä nebätä”. ¿Kukwe medenbätä blitai? Sribi nuainta köbö täte Ngöbökrä ye tä ni kriemike ño ye kädriei sabadote. Arato, kukwe ketamä kädriei jatäri: “meribiti kä ngwarbe”, “jondron kri krubäte”,“nitre jondron rürübäinkä”, ñobätä ni ñaka rabadre ja mrite ben ye mikai gare. Kukwe kädriei jatäri bämänte, känti ni nübaidi Jehová tarere aune ñaka jondron kä nebätä tarere. Nikwe ja ngübadrebiti ni menteni kwrere aune kä jürä ñaka rabadre nibätä ja mikakäre kukwe kä nebätä ye rüere ye kädriei arato.
3. ¿Ni kwandre gätä kri köböbu yebätä ye köböire kukwe meden kwin raba nemen nikwe?
3 Meri iti testiko Jehovakwe ñan namanina kukwe driere krubäte nikani gätä kri köböbu nuainbare yebätä. Ye bitikäre, tärä tikani kwe, känti niebare kwe kukwe kädriebare ye käkwe mikani töbike dre nuain nämene kwe yebätä aune töimikani “kukwe driereta aune ñaka kukwe mike jabiti”. Nita Jehová tarere aune ñaka kukwe kä nebätä tarere ye bämikakäre, kukwe kädriei gätä kri köböbu yete ye käkwe ni jökrä dimikai (1 Juan 2:15-17). Mäkwe ja mika juto biare ne kwe mä rabadre gätä kri yebätä aune kukwe kwin kädriei nitre Gobran Ngöbökwe kukwei driekä kräke ye kukwe nuakäre täte.