Kukwe ükaninte mrä gätä konkrekasionte kräke
1, 2. ¿Gätä nuainta nikwe ye kwitai ño sö enero kä 2009 yete ja känenkäre?
1 Bämän 21 nemen 27 abril kä 2008 yebätä ja mräkätre kä jökräbiti tibien ie kukwe ütiäte krubäte mikani gare: “Köbö 1 enero kä 2009 yete ja känenkäre, Ja Tötika täräbätä Konkrekasionte ye nuaindi keteitebe Kwela Sribi Ngöbökwe kräke bätä Gätä Sribi Ngöbökwe nuainkäre yebe. Ja tötika täräbätä konkrekasionte ye kä kwitai aune kädekai Ja tötika Bibliabätä konkrekasionte”.
2 Kukwe ükaninte mrä gätä nekrä. Gätä ne nuadi ora krati biti 45 minuto täte, kantiko bätä orasion ye arato. Gätä ye kömikai kantiko bätä orasionbiti (5 min.). Ye bitikäre Ja Tötika Bibliabätä Konkrekasionte ye nuaindi (25 min.). Ye bitikäre ben gwairebe Kwela Sribi Ngöbökwe kräke ye nuaindi (30 min.). Yebiti kantiko kantai (5 min.), ye käkwe Gätä Sribi Ngöbökwe nuainkäre ye kömikai (35 min.). Aune ye bitikäre mikai krüte kantiko bätä orasionbiti (5 min.). Sö kratire kratire te kukwe ükaite täräkwata Sribi Nikwe Ngöbökrä yebätä ni dimikakäre ja tötike gätä Ja Tötika Bibliabätä Konkrekasionte, Kwela Sribi Ngöbökwe kräke bätä Gätä Sribi Ngöbökwe nuainkäre yekrä.
3. ¿Ja Tötika Bibliabätä Konkrekasionte ye nuaindi ño?
3 Ja Tötika Bibliabätä Konkrekasionte. Gätä ne nuaindi ja tötikata täräkwata La Atalaya yebätä ye erere. Kukwe medenbätä ja tötikabare bämän käne yebätä ye ñaka kädriedre jökrä. Ne erere, blita raba kwati kubu kena. Ye käkwe kä mikaite nitre jökrä ja ükaninkrö ie blitakäre jötrö ngwarbe. Ni ni gätä nitre umbrekwe jie ngwanka käkwe kukwe ükaite ne kwe ni umbre itire itire käkwe gätä ye jie ngwandre bämän kratire kratire te.
4. ¿Gätä Sribi Ngöbökwe nuainkäre ye ükaite ño?
4 Gätä Sribi Ngöbökwe nuainkäre. Gätä ne nuaindi nuainta ye erere, akwa kukwe kädrieta ye nuaindi kä bäri braibe te. Kukwe mikata gare ye nuaindi 5 minuto näre. Kä yete kukwe ütiäte erere mikadre gare bätä sukursal kätä tärä ruäre juen yebätä ñäkädre. Kukwe mada konkrekasionte; ñodre, köbö ükateta kukwe driekäre, kä ükatekäre, ngwian biani nuäi aune kitaninkä nuäi mikadre gare bätä tärä mada sukursal kätä juen käre, yebätä ñaka ñäkädre plataforma yekänti. Ñakare aune, mikadre tablero yebätä ne kwe ja mräkätre käkwe ñäkädrebätä. Nitre diandrekä kukwe kädriekäre ye käkwe ja tötikadre kwin bätä kä dianinkä kräke ye näre nuaindre kwe, bätä kukwe mada nieta ye erere nuaindre kwe.
5. ¿Ni ni tuabitikä käkwe ni tuabitidre ye ngwane gätä nuaindi ño?
5 Ni ni tuabitikä käkwe ni tuabitidre. Ni ni tuabitikä käkwe ni tuabitidre ye ngwane gätä nuainta ye ñaka kwitai. Martete Kwela Ngöbökwe bätä gätä Sribi Ngöbökwe nuainkäre ye nuaindi. Ye bitikäre kantai aune ni ni tuabitikä käkwe kukwe kädriei 30 minuto te. Nuainta kä nengwane ye erere kä diainkä köböiti Ja Tötika Bibliabätä Konkrekasionte ye nuainkäre, ye bitikäre kantai aune ni ni tuabitikä käkwe kukwe kädriei. Gätä ye mikai krüte kantiko bätä orasionbiti.
6. ¿Sribi meden täi ni umbre nitre braibe kukwe driekä jie ngwanka ye kisete?
6 Gätä kukwe driekäre. Nitre nämene Ja Tötika Tärä Konkrekasionte jie ngwen ye kädekai “ni umbre nitre braibe kukwe driekä jie ngwanka”. Nitre umbre käkwe ja mräkätre ne mikai nitre kukwe driekä ye jie ngwen aune ni itire itire ye ngübabitikäre. Ni sribikä konkrekasionte ye ribedre sribi ne nuainkäre angwane, kädekai “ni nitre braibe kukwe driekä jie ngwanka”.
7. ¿Gätä nuaindi bämän kratire kratire te ye käkwe ni dimikai ño?
7 Kukwe nieta jatäri ne erere, kä tädi köböiti nie ja tötikakäre krubäte kukwe ja üaire yebätä. Ne käkwe ni dimikai ja mäke kwin Jehovabe. Ni dimikai kwe kukwe driere bätä ni mada tötike kwin krubäte, bätä ni dimikai bäri kwin ni mada töi mikakäre kukwe Ngöbökwe yebätä (Efesios 4:13, 14; 2 Tim. 3:17).
8. ¿Ni itire itire käkwe ja tötikadre ye käkwe ni aune ni mada dimikai ño?
8 Gätä ne känenkri nikwe ja tötikadre, ye käkwe ni dimikai ja töimike kukwe bäri ütiäte kädriei gätä jene jene nete ye erere jiebiti. Ni jökrä rabai kukwe niere, ne kwrere nikwe ja dimikai kwärikwäri (Rom. 1:11, 12; Heb. 10:24). Nikwe ja töi mikadre “kukwe metre Ngöbökwe driedre erametre” yebiti ‘nikwe mikai gare nitre mada ie’, nita nirien kukwe ja üaire yebiti (1 Tim. 4:15; 2 Tim. 2:15).
9. ¿Nikwe ja töi mikai dre nuainne, aune ñobätä?
9 Gätä kwitai ne ütiäte krubäte ye käi juto nibätä. “Nitre sribikä täte metre aune töbätä” kätä kukwe niere ni käne ye erere ni jökrä käkwe ja töi mikadre nuainne. Ne käkwe ni dimikai ne kwe ni tädre ni oveja Ngübaka bäri Kri ye ken, abokän kätä ni ükete “kukwe tare krubäte” nebera ja ken yekrä (Mat. 24:21, 45; Rev. 7:14).