Gätä nuainta kukwe driekäre kätä ni dimike

1. ¿Gätä nuainta kukwe driekäre ye ükaninte ñokäre?

¹ Bati, Jesús ja ükaninkrö nitre 70 ja tötikaka kwe yebe jämi juen kukwe driere ye känenkri (Luc. 10:1-11, Kukwe Kuin Ngöbökwe, [WBT]). Niaratre ñaka nämenentre kaibe niebare kwe ietre dimikakäre aune “sribi Bkänkä” Jehová ye nämene jie ngwen niebare kwe ietre. Ne madakäre, tötikabare kwe ye käkwe niaratre dimikani sribi ye nuainne kwin aune juani kwe “nibu nibu” jabe. Kä nengwane, gätä nuainta kukwe driekäre ye ükaninte kukwe ye erere kräke arato: ni dimikakäre, ni tötikakäre aune ni ükatekäre.

2. Abril yebätä ja känenkäre, ¿gätä nuainta kukwe driekäre ye nuadi minuto kräbe?

² Nengwane, gätä nuainta kukwe driekäre ye nuainta minuto 10 o 15 näre. Minuto yete nitre ñäkäbiti nämene, kä medenkänti kukwe driedre ye nie nämene aune orasion nuain nämene. Akwa abril yebätä ja känenkäre, gätä ye nuaindi minuto 5 o 7 näre. Gätä mada nuainta konkrekasionte ye bitikäre gätä ye nuaindre angwane, nuaindre bäri jötrö ngwarbe, ñobätä ñan aune nitre kwandre gätä yebätä yekwe ja tötikanina krubäte kukwe ja üaire yebätä. Gätä nuainta kukwe driekäre ye nuaindre bäri jötrö angwane, kä rabaite bäri kukwe driekäre nitre kukwe driekä yei. Ne madakäre, nitre prekursor aune nitre kukwe driekä rabadrera kukwe driere gätä ye känenkri yekän kä ñaka diainkä krubäte.

3. ¿Gätä nuainta kukwe driekäre ye ükadrete ño?

³ Gätä nuainta kukwe driekäre ye ükadrete kwin ne kwe rabadre nitre kukwe driekä ye dimike. Konkrekasion keta kabre te nitre braibe dianinkä kukwe driekäre ye jene jene tätre ja ükökrö kä jene jene känti ye kwin krubäte nieta, ñobätä ñan aune gätä nuainta kukwe driekäre aune kä medenkänti kukwe driei ye tä nemenkä känime ja mräkätre jökrä ie. Ye köböire tä nemen bäri nuäre ja mräkätre ñäkäbitikäre aune nitre umbre tä nitre braibe kukwe driekä jie ngwen ye tätre nitre kukwe driekä ben ye dimike bäri kwin. Nitre umbre käkwe kukwe meden bäri kwin konkrekasion kräke ye ükaite. Orasion nuain jämi gätä ye mikakäre krüte ye känenkri, ja mräkätre kukwe driei nirebe aune kä medenkänti ye rabadrera gare ietre.

4. ¿Gätä nuainta kukwe driekäre ye ñobätä ütiäte krubäte gätä mada mada ye erere?

⁴ Ütiäte krubäte gätä mada nuainta konkrekasionte ye erere arato. Nire nire tä niken kukwe driere ye aibe tä nemen gätä yete, nitre konkrekasionte jökrä ñan tä nemen yete. Akwa, ñaka mikadre tuin jai gätä ngwarbe ye erere o ñaka ütiäte gätä mada mada ye erere ye ni ñaka raba nütüre. Gätä mada mada ye erere, Jehová tä gätä ye ükete ni kräke ne kwe ni töi rabadre ja tarebätä aune jondron kwin nuainbätä ja kräke kwärikwäri (Heb. 10:24, 25). Yebätä nire käkwe gätä ye jie ngwandre yekwe ja tötikadre kwin nuainkäre ne kwe gätä yebiti Jehová käikitadrekä aune nire nire tädre yete ye dimikadre kwe. Raba angwane, nitre kukwe driekä meden meden rikadre kukwe driere ye rabadre ja di ngwen nemen gätä yebätä.

Gätä nuainta kukwe driekäre ye ñaka mikadre tuin jai gätä ngwarbe ye erere o ñaka ütiäte gätä mada mada ye erere ye ni ñaka raba nütüre

5. a) ¿Ni umbre kukwe drieta jie ngwanka käkwe kukwe ükadrete kukwe driekäre angwane dre dre nuaindre kwe? b) ¿Gätä nuainta kukwe driekäre ye ja ngwaitre rabadre jie ngwen ño?

⁵ Ja ükadrete ño jie ngwankäre. Nire ie kukwe biandre kädriedre ye käkwe ja ükadrete kwin yekäre, kä tädre mente ye känenkri mikadrera kisete. Ye erere nuaindre gätä nuainta kukwe driekäre ye nuainkäre arato. Nitre braibe jene jene kukwe driekä ye käkwe ja ükadrekrö kä jene jene känti angwane, nitre umbre nitre braibe kukwe driekä jie ngwanka o ja mräkätre niaratre dimikaka ye käkwe gätä ye nuaindre. Akwa ja mräkätre konkrekasionte jökrä käkwe ja ükadrekrö kä keteitibe känti kukwe driekäre angwane, ni umbre kukwe drieta jie ngwanka käkwe ja mräkä iti mikai jie ngwen. Ni umbre kukwe drieta jie ngwanka ye ruäre tätre täräkwata bien ja mräkätre diankata ji ngwankäre ye jökrä ie aune tätre täräkwata ye mike tablero yebätä arato. Ja mräkätre ye ni tötike ño aune kukwe ükete ño ye ererebätä gätä ye rabai bare, yebätä ni umbre kukwe drieta jie ngwanka ye käkwe töbikai kwin ja mräkätre mikakäre gätä ye jie ngwen. Ni umbre, ni sribikä konkrekasionte o ja mräkä ja ngökanina ñöte ñaka täi gätä ye jie ngwankäre köbö ruäre te angwane, ni umbre kukwe drieta jie ngwanka käkwe ja ngwai ie kukwe gare ye mikadre nuainne. (Mäkwe sección “Ja ngwai käkwe gätä ye jie ngwandre ngwane” ye mika ñärärä.)

6. ¿Ñobätä ni gätä jie ngwanka ye käkwe ja ükadrete kwin?

⁶ Kukwe bianta kädriedre nie Kwela Sribi Ngöbökwe Kräke o Gätä Sribi Ngöbökwe Nuainkäre yete angwane, nita mike tuin ütiäte jai aune nita ja tötike kwin nuainkäre. Ni tärä niken jibiti ye ñan ai ngwane nita töbike dre niedi nikwe yebätä. Gätä nuainta kukwe driekäre ye mikadre ni kisete angwane, nikwe mikadre tuin ütiäte ye erere jai arato. Gätä nuainta kukwe driekäre ye nuaindi bäri jötrö, yebätä ütiäte krubäte nikwe ja ükadrete kwin ne kwe nikwe ja mräkätre tötikadre kwin aune nuaindre minuto kitani ye näre te. Nita ja ükete kwin ye ngwane nikwe kukwe driedi kä medenkänti ye rabadrera gare gätä ye känenkri nie.

7. ¿Gätä nuainta kukwe driekäre yete kukwe meden meden kädrie raba?

⁷ Drebätä blitadre. Kukwe ñaka tä nemen bare ja erebe kä jene jene känti, yebätä ni klabore ie tö ngwan raba ñaka kukwe ükete ja erebe täräbätä gätä ye nuainkäre. Recuadro “Kukwe meden meden kädrie raba gätä nuainta kukwe driekäre yete” yekänti kukwe keta kabre mikata gare. Gätä yete kukwe ngwaintari ne kwe nitre rabadre blite. Nane nane kukwe bämika raba o video ruäre kwin kukwe driekäre tä jw.org yete ye mika raba tuare arato. Ja mräkä meden käkwe gätä ye jie ngwandre ye tädre ja ükete ye ngwane kukwe meden raba ja mräkätre dimike aune tötike kwin yebätä töbikadre kwe.

Ja mräkä meden käkwe gätä ye jie ngwandre ye tädre ja ükete ye ngwane kukwe meden raba ja mräkätre dimike aune tötike kwin yebätä töbikadre kwe

8. ¿Gätä nuainta kukwe driekäre ye nuaindre bämän krüte yebätä angwane, kukwe medenbätä blita raba?

⁸ Sábado yete, nitre kukwe driekä jökrä bäsi tä täräkwata Ni Mikaka Mokre ye driere. Ja mräkätre tä niken kukwe driere sabadote ye kwati ñaka kukwe driere Lunes nemen viernes, yebätä Ngöbö Mikadre Täte Ni Mräkäbe ye tätre nuainne ye ngwane tätre ja kite kukwe driekäre ye tä käi nikwitekä bititre. Yebätä, ja mräkä meden tädre gätä ye jie ngwen ye käkwe kukwe tä página mrä Sribi Nikwe Ngöbökrä yebätä ye kädriedre ruäre. Kukwe mikata gare noticia yete, o bieta meden nuainta nita nüne yekänti ye bä kwrere kädrieta täräkwata Ni Mikaka Mokre yebätä angwane, blita rababätä arato. Nitre käkwe täräkwata Ni Mikaka Mokre kadre ngäbiti ye tuabitikäreta dre nie raba ye kädrie raba arato. Ne madakäre, ja mräkätre meden käkwe täräkwata sö ye kräke driebarera ye nübai raba blite ne kwe dre nie raba o kukwe meden kwin namanina bare kräke ye niedre kwe. Bämänte ye erere nuain raba arato tärä aune täräkwata driedre sö yebätä yebiti. Gätä nuainta kukwe driekäre yete blita raba tärä aune täräkwata ruäre driedre ño yebätä. Ñodre, täräkwata Kukwe kwin bätä Mäkwe Ngöbö mika täte o tärä Dre drieta abokän nita driere köbö jene jene te aune nita nitre tötikebiti yebätä blita raba.

9. Täräkwata döräi tädre ye ngwane, ¿gätä nuainta kukwe driekäre yete kukwe medenbätä blita raba bämän krüte yete?

⁹ Täräkwata döräi tädre ye ngwane, täräkwata Ni Mikaka Mokre o täräkwata kia yebe gwaire täräkwata döräita ye drie raba ño ye kädriedre bämän krüte yebätä, o ni iti törbadre kukwe mikai gare bäri jai ye ngwane dre nuaindre ye kädriedre. Nita täräkwata döräire ye köböire dre kwin namanina bare ye kädrie raba arato.

10, 11. ¿Ñobätä ütiäte krubäte nitre kukwe driekä käkwe ja ükadrete kwin gätä nuainta kukwe driekäre ye kräke?

¹⁰ Nitre kukwe driekä raba ja ükete ño. Nitre kukwe driekä rikadre kukwe driere ye käkwe ja ükadrete ño ye ererebätä gätä ye rabai bare kwin arato. Ja ükadrete kwin kwetre kukwe drie känenkri angwane, gätä nuaindi kukwe driekäre yete blitai kwin kwetre. Ja ükatekäre kwin, tärä aune täräkwata medenbiti nikwe kukwe driei ye tädrera nikwe gätä ye känenkri. Ye köböire ni ñaka ngrötaite nänkäre kukwe driedi medente yekänti.

¹¹ Nikwe ja di ngwandre nemen gätä ye känenkri ye ütiäte krubäte, nita nuainne gätä mada mada nuainta konkrekasion kräke ye erere. Ni rabai kä rairebiti angwane, nikwe nitre töi mikai mentokwäre aune kukwe ükaninante ye erere ñaka rabai bare kwin. ¿Ñobätä? Ñobätä ñan aune ja mräkä ji ngwanka ye tä kukwe keta kabre ükete jämi ni ñäkebiti ye känenkri. Ñodre, ja mräkätre braibe tädre gätä yete angwane, kä medenkänti kukwe drie jämi täte yekänti nitre jökrä juandre kwe. Kä medenkänti kukwe driedre ye nemenkä mente angwane, nitre kwe karo ñaka ye tä juen nire kwe karo tärä yebe. Ja mräkä o ja ngwai iti tä bren angwane, tä juen kä kiare o escalera ñaka yekänti. O tä nitre kukwe driekä ie kukwe gare ye juen nitre kukwe driekä mrä mrä yebe. Akwa ni rabai kä rairebiti angwane, ja mräkä ji ngwanka ye käkwe ni ñäkäibitita bobukäre o kukwe ükaite bä jene kwe. Ruäre ngwane ni rabai kä rairebiti akwa kukwe mada ütiäte tä nuaindre nie yebätä. Akwa, käre nita nemen kä rairebiti angwane, gätä nuainta kukwe driekäre ye ñaka tuin ütiäte nie o ni ñaka kukwe ükete kwin jai kukwe driekäre o ñakare yebätä nikwe töbikadre kwin.

12. Nita kukwe driere ja mräkä arabe ben käre angwane, ¿nikwe ja töi mikadre dre nuainne?

¹² Nitre kukwe driekä käkwe kukwe driei nirebe ye raba ükete biare jai gätä ye känenkri o ja mräkä ji ngwanka ye käkwe juain nirebe ye ngübadre kwe. Akwa nita kukwe driere jä mräkä arabe ben käre angwane, ni raba ja di ngwen kukwe driere ja mräkätre madabe arato (2 Cor. 6:11-13.) ¿Ni raba kukwe driere ni kukwe driekä mrä yebe dimikakäre dirire bäri kwin? (1 Cor. 10:24; 1 Tim. 4:13, 15.) Dre dre niedre nie gätä yete ye nikwe kukwe nuadre kwin, ñodre, kä medenkänti kukwe drie ye kömikadre ye erere nuaindre. Gätä ye mikadre krüte angwane, ni ñaka kukwe ükadrete bä jene jai aune ni rikadre bengwaire kukwe driedi yekänti.

13. Ni jökrä käkwe ja di ngwain angwane, ¿gätä nuainta kukwe driekäre ye käkwe ni dimikai ño?

¹³ Jesukwe nitre ja tötikaka kwe 70 juani kukwe driere ye “jatani nüketa mda angwane, kä namani nuäre krübäte btätre” (Luc. 10:17, WBT). Erametre, niaratre jämi niken sribi ye nuainne känenkri Jesukwe ja ükaninkrö bentre ye köböire kukwe kwin namani bare kräketre. Gätä nuainta kukwe driekäre ye köböire kukwe ye erere tä nemen bare arato. Ni jökrä käkwe ja di ngwain angwane, gätä yekwe ni dimikai, ni tötikai aune ni ükaite kukwe driekäre “kä jökräbti temen” (Mat. 24:14, WBT).

Ja ngwai käkwe gätä ye jie ngwandre ngwane

Ja ngwai ye käkwe gätä jie ngwandi angwane ja dokwä juemikadre kwe aune tädre täkäni tibien. Ja mräkä käkwe blitadre kukwe medenbätä ye erere kädriedre kwe arato. Tädre dirire ye erere ñaka ja bä mikadre kwe, akwa raba kukwe ruäre kädriere ja mräkätre mada yebe. Ja ngwai mada ja ngökanina ñöte mikadre kwe orasion nuainne angwane, ye käkwe ja dokwä juemikadre arato. Ja ngwai tädre gätä ye nuainne ye ngwane ja mräkä ja ngökanina ñöte rükadre angwane, ja mräkä ye käkwe gätä ye nuaindre niedre kwe ie. Kukwe bä jene ñaka rabadre bare aune dre nuain raba ne kwe kukwe ye erere ñaka rabadre bare yekäre ni umbre kukwe drieta jie ngwanka käkwe kukwe ükadrete kwin. Ñodre, ja ngwai tädre gätä ye jie ngwen ye ngwane monso brare ja ngökanina ñöte rabadre gätä yebätä. Monso ye ie gätä ye jie ngwan jämi gare akwa raba orasion nuainne rabadre ruin nitre umbre yei angwane, ni umbre kukwe drieta jie ngwanka ye käkwe blitadre ja ngwai bätä monso yebe ne kwe niara rabadre gätä ye jie ngwen aune monso ye käkwe orasion nuaindre. O ja mräkä ja ngökanina ñöte rükadre gätä yebätä akwa ñaka raba gätä ye jie ngwen o ñaka raba orasion nuainne kukwe ruärebätä abokän gare nitre umbre yei yebätä. Nitre umbre ñaka kukwe ye mikadre gare aune ja mräkä ye tädre yete akwa ja ngwai ye käkwe gätä ye jie ngwandre aune orasion nuaindre kwe niedre kwe ie. Aune köbö medente ja ngwaitre käkwe gätä nuainta kukwe driekäre ye jie ngwandi ye nitre umbre mikadre gare ja mräkä yei.

Kukwe meden meden kädrie raba gätä nuainta kukwe driekäre yete:

Kukwe nieta Sribi Nikwe Ngöbökrä yebätä kukwe driekäre ye kädriedre ruäre.
Video ruäre kwin kukwe driekäre tä jw.org yete ye mika raba tuare.
Dre niedre blita kömikakäre kwin, dre niedre nitre tuabitikäreta o nita tärä aune täräkwata mikete ye ütiä bianta ño yebätä blita raba.
Texto meden raba ni dimike o ni tötike kukwe driekäre ye kädrie raba.
Nita nüne yekänti kukwe meden kwin namanina bare o kädrieta täräbätä ye kädrie raba.
Kukwe meden kwin nieta Sribi Nikwe Ngöbökrä yebätä ye kädrie raba.
Kukwe ruäre kädriebare bitinkä Gätä Sribi Ngöbökwe Nuainkäre yete yebätä blita raba.
Kukwe ruäre kädrieta täräkwata Ni Mikaka Mokre yebätä tädre blite kukwe drie yebätä ye kädrie raba.
Kukwe ruäre kädrieta tärä Benefíciese aune “Ven, sé mi seguidor” yebätä tädre blite kukwe drie yebätä ye kädrie raba.
Kukwe driedre ño jw.org yebiti yebätä blita raba.
Biblia Traducción del Nuevo Mundo yebätä kukwe ütiäte mikata gare abokän kwin kukwe driekäre yebätä blita raba. Tärä ni kukweibiti angwane blitadrebätä.
Ni ñaka Ngöbö mike era jai, ni jatani nikwite jatäri mikaka era jai, ni hindú, ni budista aune nitre mada yebe blita kömika raba ño ye kädrie raba.
Ñäkädre kukwe drieta nikwe ye rüere ye ngwane blitadre ño ye kädrie raba.
Ni kukwe driekä nibe ye ni raba dimike ño kukwe driere bäri kwin ye kädrie raba.
Nitre ñaka blite ni kukweibiti kwandre nie ye ngwane dre nuaindre ye kädrie raba.
Nitre blite kukwe madabiti känändre ño, kukwe driedre teléfono yebiti, kukwe driedre nitre kwati tä näin ta yekänti, nitre tuadrebiti o nitre tötikadre Bibliabätä ye kädrie raba.
Ja ngübadrebiti, kukwe meden ütiäte nitre kräke yebätä blitadre bentre, töbikadre kwin, ja töi mikadre kwin ni mada kräke aune kukwe mada ye ngwandreta törö jai.