¿Dre diandre mäkwe jai niena gare mäi?
Opital kwati kä jökräbiti tibien ñaka däri kärere ni operakrä. Aune, ¿dre dre nuaindre ne kwe ñaka däri mikadre ni kwatate, ye niena gare kwin mäi? Rabadre gare kwin mäi ne kwe mäkwe töbikadre kwin, operasion bätä ja kräkäimika yebätä. Video La negativa a la sangre. La medicina acepta el reto ye mäkwe tua käne. Yebitikäre, mäkwe ñäkä kukwe ngwantarita jatäri yebätä aune mäkwe nuain orasion yebiti ne kwe rükadre gare kwin mäi. Kukwe nieta: Ni operata ño ye mikata tuare jötrö ngwarbe video yete, ye medenbätä nunta ribere nitre rüne o meyere ie rabadre mokrere monso kwe yebe tädre video tuin ben ye ngwane.
1) ¿Kukwe meden bäri ütiäte bätä nitre testiko Jehovakwe ñaka däri kain ngäbiti mikadre ja kwatate? 2) ¿Nitre testiko Jehovakwe kätä dre ribere ja kräkäi mikata yebätä? 3) ¿Ñobätä ni bren ye kräkäimika raba töi ye ererebätä? 4) ¿Ñobätä töbikadre kwin kräkä diandre jai aune ñaka däri mikadre ja kwatate yebätä? 5) Ni därieta nimiente krubäte ye ngwane, ¿kukwe meden ketebu bäri ütiäte tä nuaindre jötrö ngwarbe dotore yei? 6) ¿Kukwe meden ketabäkä dotore raba nuainne, aune ñaka däri mikadre ni kwatate? 7) ¿Ñokänti dotore ye raba a) ni därie ötö ne kwe ñaka riandrete krubäte, b) glóbulo rojo ye ngübarebiti, c) däri ye miketa nirien, bätä d) däri nianinte ye miketa nüke ja täte? 8) Ne nuainta ño ye mä raba niere, ñodre a) hemodilución, bätä b) däri nianinte mikakäre nüke ja täte. 9) ¿Kräkä mada mika törbadre mä kwatate ye ngwane dre dre rabadre gare käne mäi? 10) ¿Operasion kri krubäte bätä ñaka nuäre nuaindre ye nuain raba aune ñaka däri mika raba ni kwatate? 11) ¿Dre dre kwin nuain nibira dotorekwe ni kräkäi mikabätä?
Ja kräkäimikata ño mikata tuare ruäre video yete, ye kan ngäbiti raba o ñakare yebätä ni kristiano itire itire rabadre töbike kukwe Bibliabätä niena gare ie ye ererebätä. ¿Kräkä meden kain ngäbiti bätä dre nuaindi mäkwe jakrä aune monso mäkwe yekrä ye niena gare kwin mäi? ¿Mä töi ño ye mäkwe tikanina täräkwata DPA yebätä? Mäkwe nuaindre ye känenkri, mäkwe ñäkä kwin “Preguntas de los lectores” mikani täräkwata La Atalaya 15 junio kä 2004 bätä 15 octubre kä 2000 yebätä. Yebikäre, täräkwata jatani Nuestro Ministerio del Reino sö noviembre kä 2006, känti kukwe ngwantarita “¿Qué opino de las fracciones sanguíneas y de los procedimientos médicos que impliquen el uso de mi sangre?” yebätä mäkwe ja tötika kwin. Ne kwe mäkwe töbikadre kwin dre kadre ngäbiti aune dre ñaka kadre ngäbiti yebätä. Mäkwe töbika angwane, ye erere mäkwe tika täräkwata DPA yebätä. Nitre mikai blitaka jakrä mäkwe bätä mä mräkätre ñaka Testiko ie kukwe ye rabadre gare arato.
[Rekwadro de página 3]
• ¿Kräkä meden kain ngäbiti bätä dre nuaindi mäkwe jakrä aune monso mäkwe yekrä ye niena gare kwin mäi?
• ¿Täräkwata DPA ye sribebarera mäkwe aune mätä ngwen jabe?