¿Mätä tuenmetre nuainkäre köbö madate?
Dre diandre ja käne tikadre täräkwata Durable Power of Attorney (DPA) sribebare nitre Testiko Jehovakwe kräke, yebätä blitata. Kukwe tare rakadrekä ye känenkri, kräkä meden ni raba kain ngäbiti bätä dre nuaindre nikwe yebätä töbikadre kwin käne bätä nikwe tikadre täräkwata yebätä, ñobätä ñan angwane “dre rakaikä [ni]btä jetbe, ye abko gare ñakare jire chi jabtä” nie; (Sant. 4:14, KKN; Hech. 15:28, 29).Kukwe kwin diandre ja käne yekäre video Asistencia médica sin transfusiones sribebare ni dimikakäre. Mäkwe video ye tuadre käne, ye bitikäre kukwe ngwantarita jatäri yebätä mäkwe töbika aune mäkwe nuain orasion yebiti. Ni operata ño ye mikata tuare jötrö ngwarbe video yete, ye medenbätä monsotre kia käkwe video ye tuadre o ñakare, ye tä gare nitre rüne o meyere yei.
1) ¿Ñobätä doctor ruäre tä ja töimike ñaka däri mike ni kwatate? 2) Operasion ketamä ñaka nuäre nuainbare abokän känti ñaka däri mikani ni mada kwatate, ye mäkwe kädekate. 3) ¿Doctor bätä nitre ni operaka nibe abokän raba nitre operare aune ñaka nuainne däri yebiti? ¿Ñobätä tätre ja töimike nuainne ye erere? 4) ¿Nitre ja tötikaka däri yebätä hospital kwati te ye kätä dre niere däri yebätä? 5) ¿Däri mikadre ni kwatate ye ngwane kukwe meden tare raba nemen bare? 6) ¿Ñobätä doctor kwati kätä niere ja kräkäi mikadre kräkä madabiti ye köböire kukwe kwin raba nemen bare? 7) ¿Ñobätä ni därie tä nimiente krubäte? ¿Kukwe tare rabadre bare nibätä angwane ni därie raba nimiente nuäi ne kwe ni tädre nire? ¿Dre nuaindre däri mikakäreta nirien ni ngrabare? 8) ¿Dre nuaindre ne kwe glóbulos rojos ye ririadre nitre bren ye ngrabare? 9) ¿Jondron medenbiti ni operata abokän köböire ni därie ñaka nimiente krubäte? 10) ¿Monso kia bätä nitre bren dikaro ye kräkäi mika raba kräkä madabiti? 11) ¿Doctor törbadre ni kräkäi mikai kwin ye ngwane kukwe meden ütiäte mikadre gare käne kwe nie? 12) ¿Ñobätä ütiäte krubäte ni kristiano käkwe dre diandre ja käne ja kräkäi mikakäre ye mikadre gare käne doctor yei? ¿Aune nuaindre ño?
Ja kräkäimikata ño mikata tuare ruäre video yete, ye kan ngäbiti raba o ñakare, yebätä ni kristiano itire itire rabadre töbike kukwe Bibliabätä niena gare ie ye ererebätä. ¿Mäkwe dre diain ja käne bätä dre nuaindi jakrä aune monso mäkwe yekrä ja kräkäi mikakäre ye niena gare mäi? ¿Täräkwata DPA yebätä mäkwe kukwe ye tikanina? Kukwe ne mikata gare bäri tärä “Amor de Dios”, capítulo 7 yebätä aune täräkwata mada känändre kädrieta capítulo ye arabe känti, ye medenbätä nunta mä nübaire kukwe ye mike gare jai. Täräkwata jatani Nuestro Ministerio del Reino sö noviembre kä 2006 yebätä, “¿Qué opino de las fracciones sanguíneas y de los procedimientos médicos que impliquen el uso de mi sangre?” ye mäkwe mikadre ñärärä arato. Mäkwe dre diani ja käne ja kräkäi mikakäre ye erere tä tikani metre DPA yebätä, ye mäkwe mika gare kwin jai. Ne madakäre, nire mikani mäkwe ja dimikakäre bätä mä mräkätre ñaka Testiko yei mäkwe dre diani ja käne mäkwe mika gare.
[Rekwadro de página 3]
• ¿Ni kräkäi mikadre ño abokän ni raba kain ngäbiti bätä dre nuaindi mäkwe jakrä aune monso mäkwe yekrä ye niena gare kwin mäi?
• Nane kukwe tare rakadrekä mäbätä ye ngwane ¿mätä DPA ye ngwen käre jabätä?