¿Nitre ie ñäkä ñaka gare kwin täräbätä tötikadre ño?
1. ¿Ñobätä ñaka nuäre nikrä nitre ruäre dimikadre kukwe drieta yekänti?
1 Nita kukwe driere yekänti, nitre ruäre tä kwen nie abokän ñäkä ñaka gare kwin täräbätä ietre akwa tö kukwe metre Ngöbökwe ye mikai gare jai. ¿Ni raba niaratre dimike? Jän, ni raba nuainne.
2. Nitre ie ñäkä ñaka gare kwin täräbätä, ¿ye ñobätä mikadre tuin ütiäte jai aune nikwe nuaindre ño?
2 Mikadre tuin ütiäte jai. Nikwe ja tötikani nuäi kwela krite ye ñan ai ütiäte Jehovakrä, ñakare aune dreta ni brukwäte ye bäri ütiäte kräke (1 Sam. 16:7; Pro. 21:2). Nitre ie ñäkä ñaka gare kwin täräbätä akwa nita dimike, ye kwrere nita nuainne Jehová erere. Nikwe nitre ye mikadre tuin ütiäte jai bätä tötikadre bätärekä, ye kwrere raba ja tuenmetre dimikadre nie (1 Ped. 3:15). Ye medenbätä, kena nikwe ñaka töi mikadre ñäke texto o párrafo yebätä. Kukwe ütiäte Bibliabätä ye jatai nüke gare ietre angwane, tö rabai ja töbiti ñäkäi kwin täräbätä, ne kwe “rare dibire [...] tiebe tiebe” rabadre ñäke Kukwe Ngöbökwe yebätä (Sal. 1:2, 3).
3. ¿Nitre ie ñäkä ñaka gare kwin täräbätä tötika raba ño?
3 Tötikadre ño. Jondron bämikani ye kwin krubäte ni mada tötikakäre, ne kwe kukwe ye ñaka käi rikwitadrekäbiti. Käne, jondron bämikani ye mäkwe mika tuare ni ja tötikaka ie biti dre tuin ie ye mäkwe niemana ie. Ye bitikäre, mäkwe kukwe ngwantari ie ne kwe kukwe drieta ye rükadre gare kwin ie. Mrä mada, kukwe drieta ye kädrieta texto medenbätä yebätä ñäkädre. Jondron bämikani ye kwin arato kukwe ngwankäre törö jai. Kukwe ne ngwandre törö jai: mäkwe ñaka kukwe dianka krubäte tötikakäre. Kukwe medenbätä ja tötikadre aune kukwe meden bäri ütiäte ye mäkwe mika gare kwin, kukwe kädrieta täräbätä ye aibebätä mäkwe blita. Texto Bibliabätä yebätä mäkwe ñäkä bätä mäkwe kukwe ngwantari ie ne kwe rabadre gare mäi kukwe drieta ie ye nüke gare kwin ie. Nuaindre ne erere angwane, ni ja tötikaka ye raba ja töimike ñäke bäri kwin täräbätä aune kukwe mada metre Bibliabätä ye mike gare kaibe jai.
4. ¿Ni raba nitre ja tötikaka ye dimike ño ñäke bäri kwin täräbätä?
4 Ñäkä raba ño kwin täräbätä. Nitre ie ñäkä ñaka gare kwin täräbätä o ñaka janamane kwelate, akwa kukwe ye raba nüke gare ietre aune raba ketete ja töibätä. Ye medenbätä, nire ie ñäkä gare kwin täräbätä ye niara rabadre kukwe nuin. Bätä ñäkädre täräbätä ye ngwane, ni ja tötikaka raba kukwe ye mike ñärärä tärä kwe yebätä o raba kädekete gwaire, ye käkwe dimikai ñäke kwin täräbätä. Tärä Aplícate a la lectura y a la escritura yebätä ja tötika raba arato. Kä ruäre känti, nitre umbre kätä kukwe ükete nitre mada kitakäre ñäke täräbätä konkrekasionte. ¿Kukwe jökrä kädrieni ne raba ni dimike raba ruin mäi? Nitre ie ñäkä ñaka gare täräbätä ye ni raba dimike kukwe nebiti ne kwe “Ngöbö kukwei deme tikani” ye rükadre gare ietre bätä ye käkwe mikadre töbätä aune rabadrete nire (2 Tim. 3:15).