Nitre ie ñäkä ñaka gare kwin täräbätä ye dimikadre ño

1. ¿Nitre ie ñäkä ñaka gare kwin täräbätä ie kukwe metre Bibliabätä driedre ye ñobätä ñaka nuäre?

¹ Nitre ie nita kukwe driere ye ruäre töta nemen kukwe ja üaire mikai gare jai, akwa ñäkä ñaka gare kwin täräbätä ietre yebätä ja tötikadre kwetre Biblia o tärä madabätä ye jürä nemen bätätre. Yebätä, bäri kwin nikwe ñaka tärä Dre drieta ye driedre kenanbe ietre. ¿Nikwe nitre ye dimikadre ño kukwe ja üairebiti? Nitre kukwe driekä ie kukwe drie gare nünanka juta 20 biti bäri yekänti ie kukwe ngwanintari abokän käkwe dre niebare ye mikata gare ja käne.

2. ¿Täräkwata meden meden kwin tä nikwe nitre ie ñäkä ñaka gare kwin täräbätä ye dimikakäre?

² Ni ja tötikaka ie ñäkä ñaka gare kwin täräbätä, o ñäkä ñaka gare jire täräbätä ie ye ngwane, ni raba tötike täräkwata Mäkwe Ngöbö mika täte o Mäkwe Ngöbö mika täte aune mäkwe nünain kärekäre yebätä. Prekursor nünanka Estados Unidos tä täräkwata ketebu ye mike tuare ni gwi ie biti tö meden ie ye tä ngwentari ie. Täräkwata ye kwin krubäte nitre tötikakäre mikani gare sukursal juta Kenia yekänti, ñobätä ñan aune kukwe ngwantarita aune kukwe ye mikata gare ye ñan ai köböire kukwe nemen gare nitre nünanka África yei, ñakare aune kukwe namani bare nieta ietre ye köböire kukwe nemen gare ietre. Ni ja tötikabare ye kräke nemen nuäre ñäkädre täräbätä aune kukwe ngwantarita ie ye mikakäre gare, akwa ni ñaka ja tötikabare kwelate abokän kräke ñaka nemen nuäre. Ni ja tötikaka ie ñäkä gare kwati kwati täräbätä angwane, nitre kukwe driekä kwati tätre tötike täräkwata Ngöböta kukwe kwin mike gare nie, Ni raba nemen ja ketamuko Ngöbökwe, o Tärä tikwe tä blite Bibliabätä yebätä.

3. ¿Nitre ie ñäkä ñaka gare täräbätä ye tötikakäre kwin nikwe dre ngwandre törö jai?

³ Mäkwe dimika. Nitre ie ñäkä ñaka gare täräbätä ye nemen jakaire aune ja nemen ruin ngwarbe ietre. Nikwe dimikadre ne kwe tädre ja tötike ye ngwane ja rabadre ruin kwin ietre ye köböire kukwe metre driei ietre. Nitre kwati ie ñäkä ñaka gare täräbätä ye töbätä aune kukwe nüke gare drekebe ietre. Ye medenbätä, mäkwe ja töi mika kwin kräketre aune mäkwe mika ütiäte jai (1 Ped. 3:15). Tä ja di ngwen köböire kukwe nüke gare ie aune tä nirien kukwe ja üairebiti yekwe töi mikai ja tötike jankunu. Yebätä käre mäkwe kukwe kwin nie ie.

4. ¿Nitre ie ñäkä ñaka gare kwin täräbätä ye ni raba dimike ño ne kwe rabadre ja ükete ja tötika känenkri?

⁴ Ñaka nemen nuäre ñäkädre täräbätä ni ja tötikaka yei, akwa rabadre ja ükete ja tötikakäre mäkwe nie ie. Nitre kukwe driekä Sudáfrica ruäre tä niere nitre ja tötikaka bentre yei, rabadre ja di kärere mräkä o ja ketamuko kwetre ie ñäkä gare täräbätä yei. Nitre ja tötikaka töi mikakäre ja ükete ja tötikadre kwetre känenkri, ni kukwe driekä Gran Bretaña tä tärä jakwe bien nitre ja tötikaka kwe yei tätre ja tötike párrafo ruärebätä ye ngwane, ne kwe kukwe täräi mikakata jai ye ngwane nemen bäri nuäre blitakäre ye mikakäre gare ietre. Ni brare Testiko nünanka India tä niere ni ja tötikaka ben yei, kukwebätä ja tötikai bämän madabätä yekänti jondron üai tä mikani ye rabadre mike ñärärä aune rabadre töbikebätä ja tötikadreta kwetre ye känenkri.

5. ¿Nita ni tötike ye ngwane ño ni raba ngübarebätä bätärekä?

⁵ Mäkwe ngübabätä bätärekä. Täräbätä mätä ni tötike yebätä kukwe meden bäri ütiäte nieta yebätä mäkwe ja töi mika aune mäkwe ni ja tötikaka mäbe ye dimika mike nüke gare kwin jai. Kenanbe, blitadre 10 o 15 minuto ni gwi ben ye bäri kwin. Ñaka kukwe kädrie krubäte ben, ñakare aune mäkwe tötika batire batire ye ngwane mäkwe blita párrafo braibebätä ben. Ni ja tötikaka ye ñäke bätäre täräbätä angwane, mä ñaka raba rubun kräke. Jehová jatai tare bäri kwe angwane, törbai ñäkäi bäri kwin täräbätä. Ni ja tötikaka rabadre Jehová tarere bäri yekäre, kename nikwe nübaidre näin gätäbätä.

6. ¿Ño mä raba ni mada kite ñäke täräbätä?

⁶ Ni ja tötikaka yei ñäkä rabai gare kwin täräbätä angwane, ririai drekebe kukwe ja üairebiti (Sal. 1:1-3). Tätre ja tötike ünä ye ngwane, nitre kukwe driekä kwati tätre tötike täräkwata Mäkwe ja kita ñäke täräbätä bätä tärä tikabätä yebätä minuto ruäre te. Ni ja tötikaka di riadrekä ye ngwane, kukwe meden meden nuain namanina gare ie ye mäkwe nie ie töi mikakäre jäme. Tä ja di ngwen yebätä Jehovakwe dimikai aune rabadre orare ja di käräkäre ie mäkwe nie ie (Prov. 16:3; 1 Juan 5:14, 15). Nitre kukwe driekä nünanka Gran Bretaña ruäre tätre niere ni ja tötikaka ben yei, kukwe meden raba nemen nuainbare ie aune kukwe meden raba dimike nirien ja käne yebätä rabadre ja töi mike, ñodre, rabadre tärä okwä mike gare jai, ja kite bersikulo Bibliabätä känene bätä ñäkebätä aune rabadre ñäke tärä o täräkwata tä tikani kukwe nuärebiti yebätä. Ni mada kitadre ñäke täräbätä ye abokän töi mikadre nuainne akwle arato.

7. ¿Ñobätä ni rabadre kukwe metre ye mike gare nitre ie ñäkä ñaka gare kwin täräbätä yei?

⁷ Nitre ñaka ja tötikabare kwelate ye Jehová ñaka mike tuin ngwarbe jai (Job 34:19). Dreta brukwäte ye Jehovata mike ñärärä (1 Crón. 28:9). Yebätä nitre ie ñäkä ñaka gare kwin täräbätä yei nikwe kukwe metre driedre. Tärä keta kabre kwin tärä abokänbiti ni raba kömike. Ye bitikäre, ni raba ni ja tötikaka ye tötike tärä Dre drieta yebätä ne kwe kukwe Bibliabätä nguse ye raba nüke gare ie.