Gätä kri köböiti kä 2010 kräke
1. a) ¿Kukwe meden kädriebare gätä kri köböiti nikani ta yebätä? b) ¿Gätä kri köböiti ruäre nikani ta, ye käkwe mä dimikani ño kukwe driekäre?
1 “Jondron meden bäri ütiäte ye mikadre gare jai”, “Ni tädre dite aune keteitebe obeja kwrere”, “Kukwe metre ye mikadre gare jankunu”, “Nun ne abokän dobro,[...] [Jehová] nun jökrä mäkwe sribebare mä kisebiti” (Fili. 1:9, 10, 27; Juan 18:37; Isa. 64:8). Gätä kri köböiti ruäre nikani ta yete kukwe ne kädriebare. Gätä kri köböiti kä 2010 kräke, ye tä dianinkä 1 Corintios 7:29 abokän nieta “Kä kitera neme braibe ni käne”. Ni tö niena kwain gätä yebätä, ¿ñan ererea?
2. ¿Ni raba dre nuainne ne kwe nitre töi rabadre niken gätä kri köböiti yebätä?
2 Gätä kri köböiti rabai bare ñongwane ye mikadre gare konkrekasionte angwane, mäkwe mä mräkätre töimika kwen gätä yebätä. Ñodre, nitre rüne ruäre tä köbö gätä kri yekrä ye tike kalendario yebätä, dre ribedi kwetre gätä yekrä ye tätre tike täräbätä aune köbö gätä köböiti yekrä tätre täine monsotre kwe yebe. Ne madakäre, munkwe Ja tötikadre mun Mräkätrebe ye ngwane kukwe kädriebare gätä kri köböiti nikani ta yete abokän munkwe tikani täräbätä jai ye kädrie raba. Bätä ñäkädre tärä Benefíciese página 13-16 yebätä ye käkwe mun dimikai “olo ketete kwin [...] Ngöbö Kukwei” yei (Luc. 8:18 Kukwe Kuin Ngöbökwe, KKN).
3. ¿Nikwe dre nuaindre ne kwe kukwe kädriedre ye käkwe ni dimikadre?
3 Dre namani gare nie, erere nuaindre. Gätä kri nuainta ye bitikäre ja mräkätre jökrä bäsi tätre kukwe ne niere: “¡Kukwe kwin krubäte kädrieni!”. Jehová kätä jondron kwin keta kabre bien nie aune gätä kri ye abokän jondron keteiti ütiäte tä bien (Pro. 10:22). Ne madakäre, ütiäte krubäte nikwe töbikadre kukwe kädriebare yebätä aune ketadrete ja töibätä ne kwe kukwe kwin rabadre nikwe (Luc. 8:15). Ye medenbätä, ni rikadreta ja gwirete ye ngwane kukwe kädriebare ye kädrie raba ni mräkätre yebe o nitre nänkä karote nibe yebe. Kukwe meden mikani nuaindre nikwe jai o kukwe meden abokän raba ni dimike kukwe driere, yebätä blitadre ne kwe kukwe kädriebare ye ñaka käi kwitadrekä jabiti (Sant. 1:25).
4. Gätä kri köböiti nuaindi kä 2010, ¿ye ñobätä rabai ütiäte krubäte nikrä?
4 Jondron ribeta jai ye erere ni madakwe biandre nie, ye ngwane kätä nemen juto nibätä, ¿ñan ererea? Ye erere gätä kri köböiti kä 2010 yete jondron kwin biandi Jehovakwe nie ye abokän nita ngübare kä jutobiti. Jondron ribeta nikwe jai ye Jehová ni Rün kä kwinbiti käkwe biain nie gätä kri yete. Ni dimikai kwe aune ni tötikai kwe sribi mikani ni kisete ye nuainkäre (2 Tim. 4:2; Sant. 1:17).