“Mrö tärä nemen biare ni bukara”
1. ¿Gätä kri köböiti nuainbare mrä ye käkwe mä dimikani ño? ¿Aune ni mada dimikani ño?
1 Nita niken gätä kri köböiti yebätä, ye bitikäre nita niere: “¡Kukwe ye ara ni täni ribere ja!”. Ni iti ni tuabitikä käkwe mikani gare, ja mräkätre käkwe gätä kri kukwe nuabare ye bitikäre ruäre käkwe bämikani tönamani kukwe driere bäri. Ni ni tuabitikä mada käkwe niebare: “Kukwe ye mikaba gare nuen nunta nüne kä krüte te aune nunkwe dre mikani nuaindre jai yebätä nunta ja töimiketa”. Mada käkwe niebare: “Nitre kukwe driekä kwati ie nükani gare gätä ye käkwe niaratre töimikani kukwe driere bäri.” Aune mä, ¿gätä kri köböiti nuainbare mrä ye käkwe mä dimikani ño?
2. ¿Gätä kri köböiti nuaindi yete kukwe meden meden kädriei?
2 Kukwe ükaninte kädriekäre gätä kri nuaindi yete, ye abokän mrö kwin bianta nie ye kwrere. Gätä ye tä dianinkä Salmo 118:8, 9 yebätä; kukwe tare tä nakainkä ye ngwane Jehová tä ni dimike ño, nikwe nitre mada dimikadre ño ja kriemike Jehová kise ye täni, nikwe ja ngwandre ño Jehová erere nitre mada kriemikakäre, monsotre bati tä tö ngwen Jehovai ye tätre bämike ño, arato kä bä nuäre ja üairebiti ye tä ni kriemike ño, ye kädriei gätä yete.
3. ¿Nikwe gätä kri köböiti ye kukwe nuadre ño?
3 Kukwe nuadre kwin. Gätä ye nuaindi ñongwane ye mikadre gare angwane, mäkwe kukwe ükate jai bätä nitre ja tötikaka mäbe ye mäkwe nübai. Nikwe ngwandre törö jai nire kätä “nura ngwä [...] kuin öt[ö] kabre” ye kätä kukwe Ngöbökwe ye ketete ja töibätä (Luc. 8:15, Kukwe Kuin Ngöbokwe [KKN]). Kukwe kädriei ye mäkwe kukwe nua kwin, meden ütiäte aune meden mä törba nuain aune meden raba mä dimike kukwe driekäre ye mäkwe tika täräbätä jai. Gätä kri ye bitikäre, mäkwe kä dianka jai blitakäre kukwe kädriebare yebätä aune kukwe meden mun ja mräkäre itire itire raba nuainne yebätä mäkwe blita bentre.
4. ¿Gätä kri köböiti ye ñobätä nita ngübare kä jutobiti?
4 Kukwe kädriei gätä kri köböiti yete, ye abokän ükaninte ja tare yebiti aune ni dimikakäre, mrö kwin bänänte sribeta, ne kwe ni rabadre dite ye kwrere. “Mrö tärä nebe biare ni [...] bukakrä” ye kwrere gätä kri tä ni kristiano ye dimike, aune munkwe ja di ngwain kwen gätä yebätä ye köböire Jehovakwe kukwe kwin mikai neme bare munkrä (Mat. 24:45, KKN).