Ngöbö Kukwei ye dite
1. ¿Gätä kri köböiti nuaindi kä 2014 yete ye kädekata ño?
1 Ni kä tibienbätä ja mikaka ngite tä jondron sribere ye di ñaka Biblia erere. ¿Ñobätä? Ñobätä ñan aune tärä ne aibe raba ni töi kwite aune ni töi mike ja ngwen Ngöbö töi ye erere. Akwa ¿Ngöbö Kukwei ye die nuäi? ¿Nikwe dre nuaindre ja tötikakäre bäri kwinbätä? ¿Ni raba nitre mada dimike ñobiti? Gätä kri nuaindi köböiti kä 2014 yete kukwe ngwantarita ne mikai gare. Hebreos 4:12 yebätä kukwe dianinkä gätä ye kräke abokän kädekata: “Ngöbö Kukwei ye dite”.
2. ¿Kukwe meden meden ngwantarita abokän mikai gare kukwe kädriei yete?
2 Kukwe ütiäte ngwantarita. Kukwe kädriei ye mä täi kukwe nuin ye ngwane, kukwe ngwantarita jatäri mikai gare ye mäkwe tika täräbätä jai.
• ¿Ñobätä ni rabadre tö ngwen Kukwe Jehovakwe yei? (Sal. 29:4.)
• ¿Nikwe dre nuaindre ne kwe Ngöbö Kukwei dite yekwe ni dimikadre nünankäre? (Sal. 34:8.)
• ¿Ngöbö Kukwei dite yebiti ni raba ño sribire bäri nita kukwe driere ye ngwane? (2 Tim. 3:16, 17.)
• ¿Nikwe dre nuaindre ne kwe kö okwä keta kabrebiti Satana tä ni ngökö yei ni ñaka rakadre? (1 Juan 5:19.)
• Monso, ¿dre käkwe mä dimikai sribi Ngöbökwe ye nuainne kwin? (Jer. 17:7.)
• ¿Ja nemen ruin di nekä nie ye ngwane kukwe meden käkwe ni mikai dite? (2 Cor. 12:10.)
• Nita ja di ngwen kukwe ruäre tuanmetrekäre aune ja ngwankäre bäri kwin, ¿akwa kukwe meden raba ni dimike ja töi ükete jankunu? (Efes. 4:23.)
3. Kukwe kädriei ye nikwe kukwe nuai, ¿akwa gätä kri köböiti yete nikwe dre nuaindre mada ne kwe kukwe kwin rabadre nikwe?
3 Erametre, kukwe kädriei ye nikwe kukwe nuai ye köböire kukwe kwin keta kabre rabai nikwe. Ne madakäre, gätä kri köböiti, gätä kri köböbu aune gätä kri köbömä yete ja mräkätre konkrekasion jene jene te rabai gare nie aune nikwe kä ngwain juto jabätä bentre (Sal. 133:1-3; 2 Cor. 6:11-13). Yebätä nikwe kä diandrekä jai blitakäre nitre tä ja kete mekera nibe yebe aune nikwe ja ketamuko mada känändre. Ni gätä kri köböbu tuabitikä o ni sribikä betelte ye juandre kukwe kädriere gätä kri nuaindi ni kräke yete angwane, ni rikadre niara aune muko kwe yekänti blitakäre ben. Kukwe keta kabrebätä ni tö nibira gätä kri köböiti nuaindi ye tuai nemen bare.