Nitre braibe dianinkä kukwe driekäre jabe ye köböire kukwe kwin raba nemen nikwe
1. ¿Kukwe meden kwin nämene nemen nikwe Ja Tötika nämene Täräbätä Konkrekasionte ye ngwane, abokän raba nemen nikwe arato nitre braibe dianinkä kukwe driekä jabe ye köböire?
1 ¿Ja Tötika nämene Täräbätä Konkrekasionte yete kukwe ruäre nuain nämene abokän ñaka käi nikwitekä mäbiti? Nitre braibe nämene ja ükökrö ye näire ja nämene nemen ruin kwin nie, aune kä ye nämene nemen kwin ja ketakäre (Prov. 18:24). Ni ja tötika täräbätä jie ngwanka nämene juto biare ni dimikakäre aune drebätä ni nämene ja di ribere yebätä nämene ni dimike (Prov. 27:23; 1 Ped. 5:2, 3). Nitre braibe dianinkä kukwe driekä jabe ye köböire kukwe kwin raba nemen nikwe arato.
2. ¿Mäkwe ja ketadre kwin ja mräkätre braibe dianinkä kukwe driekäre ben yekäre mäkwe dre nuaindre?
2 Mäkwe ja töi mika nuainne käne. Ja tötika nämene täräbätä konkrekasionte ye ngwane nitre nämene ja ükökrö ye näre nitre tä nitre braibe dianinkä kukwe driekä jabe yete arato. Sribi nuainta “gwairebe” ja mräkätre ben kukwe driekänti, ye tä ni mike ja mäke bäri kwin (Filip. 1:27, Ngöbö Täräe, tärä okwä ükaninte). ¿Ja mräkätre dianinkä braibe kukwe driekäre ye nibe ben mäkwe kukwe driebarera? ¿Mä raba ja töi mike kukwe driere ja mräkätre ye jökrä ben? (2 Cor. 6:13.) Mä raba ja mräkätre dianinkä braibe kukwe driekäre ye ruäre nübaire mröre jabe o mätä Ja Tötike mä Mräkäbe ye ngwane. Konkrekasion ruäre känti nitre braibe dianinkä kukwe driekäre jabe ye tä ja mräkä tä nüke kukwe kädriere ni jökrä kräke ye nübaire mröre jabe. Nitre braibe dianinkä kukwe driekäre jabe yei köböta nüke kukwe ye nuainkäre angwane, tätre kä denkä jai rabakäre keteitibe jakänti, ja mräkä kukwe kädriekä ni jökrä kräke ye ñaka tä nemen niaratre mukore akwa tätre nuainne.
3. ¿Ja mräkätre braibe dianinkä kukwe driekäre jabe yekänti ni dimika raba ño kukwe ja üaire yebiti?
3 Kä nengwane konkrekasion tä ja ükökrö bobu aibe bämän kratire kratire, akwa nitre umbre rabadre ja mräkätre kukwe driekä ye dimike jankunu kukwe ja üaire yebiti. Nitre umbre kätä ja mräkätre braibe dianinkä kukwe driekäre jabe jie ngwen ye rabadre metrere ja mräkätre itire itire ye dimike aune tötike kukwe driekäre. Ni umbre kätä ja mräkätre braibe dianinkä kukwe driekäre jabe jie ngwen ye jämi kukwe driere mäbe angwane, niarakwe kukwe driedre mäbe ye mäkwe ribe ie. Ne madakäre, ni umbre kukwe drieta jie ngwanka rabadre bämän krüte yebätä ja mräkätre braibe dianinkä kukwe driekäre jabe ye jene jene tuenbiti. Konkrekasion kia yete rabadre ja mräkätre braibe dianinkä kukwe driekäre jabe ye jene jene tuenbiti bobu kä kwatire kwatire. Ni umbre kukwe drieta jie ngwanka kätä ja mräkätre braibe dianinkä kukwe driekäre jabe tuinbiti ye ngwane, ¿mätä kukwe ükete jai kukwe driekäre?
4. a) ¿Ja ükakröta kukwe driekäre ye ükate raba ño? b) ¿Ñobätä ni rabadre ja töi mike ju nikwe bien ja ükakröta kukwe driekäre ye nuainkäre?
4 Ja mräkätre braibe dianinkä kukwe driekäre jabe kätä ja ükökrö jene jene kukwe driekäre bämän krüte yebätä ye köböire kukwe kwin keta kabre tä nemen nikwe. Kena, kä nemen keta kabre ja ükarakrö kukwe driekäre ora arabe te, ye köböire ja mräkätre raba nüke ja ükakröta yebätä aune nänkäre kukwe drieta yekänti. Nitre kukwe driekä driandrekä kukwe driekäre aune rikadre biarebe kä kukwe driekäre yekänti ye nuäre nuaindre arato. Mrä mada, ni umbre ie ja mräkätre braibe dianinkä kukwe driekäre jabe tä gare ye tädre mokre ja mräkätre dimikakäre. Raba nemen nuainbare angwane, bäri kwin ja mräkätre kukwe driekä ye diandrekä ketebu o bäri kukwe driekäre. Sabado kena o Ja Tötikata Ni Mikaka Mokre yebätä tä krüte ye bitikäre konkrekasion jökrä tä ja ükökrö kukwe driekäre angwane, nitre kukwe driekä rabadre täke ja mräkätre braibe dianinkä kukwe driekäre jabe tä kukwe driere ben yebe aune ni umbre kätä ja mräkätre braibe dianinkä kukwe driekäre jabe jie ngwen ye rabadre niaratre denkä kukwe driekäre orasion nuaindre kukwe driekäre ye känenkri. (Recuadro “¿Mä raba ju mäkwe ye bien?” ye mikadre ñärära.)
5. Ja Tötika nämene Täräbätä Konkrekasionte ye nuain ñaka niena, ¿akwa dre ie ni raba tö ngwen?
5 Ja Tötika nämene Täräbätä Konkrekasionte ye nuain ñaka niena, akwa Jehová täbe kukwe jökrä ribeta nikwe jai ye bien nie sribi kwe ye nuainkäre (Heb. 13:20, 21). Jondron jökrä ribeta nikwe jai ye niarakwe biandi nie (Sal. 23:1). Ja mräkätre braibe dianinkä kukwe driekäre jabe ye köböire kukwe kwin keta kabre raba nemen nikwe. Ye medenbätä nikwe ja töi mikadre nuainne käne, aune nikwe ngwandre törö jai “nire nire tä nura nökö kabre abko käta nura gwä ötö kabre arato” (2 Cor. 9:6, Kukwe Kuin Ngöbökwe).
[Rekwadro página 6]
¿Mä raba ju mäkwe ye bien?
Bämän krüte yebätä konkrekasion ruäre ye tä nitre denkä braibe kukwe driekäre ñobätä ñan aune kä ñaka krubäte ietre ja ükarakrö kukwe driekäre. Ja ükakröta kukwe driekäre yebiti konkrekasion tötikata arato, ye medenbätä gätä ye nuaindre ni gwirete ye ütiäte krubäte. ¿Mä raba ju mäkwe ye bien? Ju mäkwe ye ñaka kwin krubäte akwa mäkwe ja töi mika bien gätä ye nuainkäre. Nitre umbre ye käkwe ju nemenkä medente aune kukwe medenbätä kä dianka nämene ja tötikara täräbätä ye ererebätä töbikai kwetre gätä ye nuainkäre. Mä tö ju mäkwe ye biain gätä kukwe driekäre ye nuainkäre angwane, mäkwe nie ni umbre kätä ja mräkätre braibe dianinkä kukwe driekäre jie ngwen yei.