¿Ni tädre juto biare kukwe driekäre kä jökrä ngwane?
1. Kristiano kena käkwe kukwe driebare kä jökrä ngwane ye mäkwe kädekate.
1 Kukwe driedre kä jökrä ngwane ye köböire kukwe kwin raba nemen bare. Biblia tä mike gare nitre kristiano kena käkwe kukwe driebare kä jökrä ngwane aune kukwe kwin namani bare ( Juan 4:7-15). ¿Nikwe ja ükadrete ño kukwe driekäre ne kwrere?
2. ¿Nikwe dän kwin kitadre jabätä aune ja ükadrete kwin ngrabare ye raba ni dimike ño kukwe driere?
2 Dän bätä ja ükadrete. Nikwe ja ükadrete kwin käre angwane ye raba ni dimike kukwe driekäre (1 Tim. 2:9, 10). Nita ja ükete ño yebätä ja ñaka rabadre ruin kwin nie angwane ni raba nemen jakaire kukwe driekäre, akwa nikwe ja ükadrete kwin ngrabare ye raba nitre mada töimike kukwe ngwentari nie. Ye erere namani bare ja mräkä iti bätä muko kwe yebätä, niaratre nikani basare ye ngwane namani täkäni ni iti musulmán ken. Niaratre nämene ja ükaninte kwin yebätä ni ye käkwe niebare ietre: ¿mun abokän kristiano? aune ye köböire blitabare kwetre jabe ora krämä.
3. ¿Dre raba ni dimike blita kömikakäre?
3 Blita kömikakäre. Ñö okwä Jacokwe yekänti Jesukwe blitabare meri samaritana ben. Blita kömikakäre, ñö ngwen chi tie niebare kwe ie. Ye erere arato, ni raba kukwe ngwentari o kukwe niere jötrö ngwarbe blita kömikakäre. Ruäre kä jürätä nemen nibätä, akwa nikwe tö ngwandre Jehovai, aune ‘ja di kwain nie’ blita kömikakäre (1 Tes. 2:2).
4. ¿Ni raba ja ükete ño kukwe driekäre kä jökrä ngwane?
4 Ja töi mikadre nuainne. Kukwe driekäre kä jökrä ngwane yekrä nitre kukwe driekä kätä kukwe keta kabre nuainne. Mä raba nuainne arato. Mätä dre nuainne bätä nirebe mä raba blite yebätä mäkwe töbika käne. Mä rika Biblia bätä täräkwata keta kabre ngwena jai. Nitre kätä dre nuainne o nitre tä mä bäre yebätä mäkwe ja töimika arato. Nire nire ie mäkwe kukwe driedre yebätä mäkwe töbikadre käne angwane, mä raba kukwe driere kwin ietre (Fili. 1:12-14; 1 Ped. 3:15).
5. ¿Kukwe driedre kä jökrä ngwane ye ñobätä nikwe ñaka nuaindre nane nane?
5 Kukwe ketebu yebätä ni tö kukwe driei kä jökrä ngwane: Ngöbö bätä ni mada tare nikwe yebätä (Mat. 22:37-39). Kukwe driedre ni jökrä ie ye sribi ütiäte tä nuaindre nie kä nengwane, ye medenbätä ni ñaka rabadre sribi ye nuainne nane nane. Kä bianta nie kukwe kwin Gobran Ngöbökwe ye mikakäre gare nitre madai, yebätä ni tädre juto biarebe kukwe kwin driekäre (Rom. 10:13, 14; 2 Tim. 4:2).