¡Mä raba kukwe driere kä jökrä ngwane!
1. a)¿Kukwe driedre kä jökrä ngwane ye nuainta ño? b) ¿Kukwe driebätä kä jökrä ngwane ye köböire mun nibe ie kukwe metre namani gare?
1 ¿Konkrekasion mäkwe yete nitre nibe ie kukwe driebare kä jökrä ngwane köböire kukwe metre namani gare ietre? Niedre mäi aune mä töi ñan rabadre krütare. ¿Kukwe driedre kä jökrä ngwane ye nuainta ño? Nita blite kukwe kwin yebätä kwelate, sribi känti, nita niken jondron kökö, nita niken ni mräkätre o nitre nünanka ni bäre yei basare, nita niken kä madakänti o nita jondron mada mada nuainne ye ngwane. Nitre dosciento biti bäri testigo Jehovakwe, ye ngätäite 40% abokän ie kukwe driebare kä jökrä ngwane ye köböire kukwe metre namani gare ietre, ne kätä mike gare kukwe driedre kä jökrä ngwane ye kwin krubäte.
2. ¿Biblia tä niere nire nire käkwe kukwe driebare kä jökrä ngwane?
2 Siklo kena yete nitre kristiano nämene kukwe driere kä jökrä ngwane. Ñodre, Jesús nikani kä Samaria yekänti ta, angwane meri iti nämene ñö den ñö okwä Jacokwe yekänti ie kukwe driebare kwe (Juan 4:6-26). Ni etíope ütiäte kri nämene ñäke tärä Isaías yebätä ie Felipe käkwe kukwe ne ngwantaribare: ¿Tärä btä mata ñäke, ye tä nüke gare mae ya? (Hech. 8:26-38, KKN). Kä Filipo yekänti Pablo nämene ngite, ye ngwane kukwe driebare kwe ni iti nitre ngite ngübabitikä yei (Hech. 16:23-34). Arato, Pablo nämene ngite ye ngwane, “nire nire nämane nüke basare ie, ye niara nämane kaen ngäbiti” bätä “Ngöbö nämane gobrane ño [...] yebtä Pablo namani dirire [...]. Erere arato, [...] namani blite ni Dänkien Jesukristobtä” (Hech. 28:30, 31, KKN). Kä jürä mäbätä, akwa niaratre käkwe nuainbare ye erere mä raba nuainne. ¿Nuaindre ño?
3. ¿Dre nuaindre ne kwe kä jürä ñaka rabadre nibätä?
3 Dre nuaindre kena. Blitadre kena ni ñaka gare nie yebe, ye ñaka nuäre nuaindre nikrä. Nitre gare nie akwa jürä raba nemen nibätä blitakäre ben kukwe metre yebätä. Jehová abokän töi kwin, niara tä kukwe ja üaire ye bien nie aune nitre tä ja tuin kukwe tare ben yebätä nita töbike angwane ye käkwe ni töimikai blite (Jon. 4:11; Sal. 40:5; Mat. 13:52). Arato, ni raba ja di kärere Jehovai (1 Tes. 2:2). Ni iti ja tötikani Galaad käkwe niebare: “Ja ñaka tä nemen törö tie blitakäre ni madabe ye ngwane orasion nuainta tikwe ye tä ti dimike”. Ye erere, ja rabadre ruin mäi angwane mäkwe orasion nuain ja töite (Neh. 2:4).
4. ¿Kena mä raba ja töimike dre nuainne aune ñobätä?
4 Kukwe driedre kä jökrä ngwane, yekäre ni ñan rabadre blite krubäte o ñäke textobätä blita kömikakäre. Ni rabadre blite nitre madabe kukwe keta kabrebätä, akwa ni ñaka rabadre nütüre ni juanta kukwe driere bengwairebe ietre. Ja mräkätre kwati tätre nuainne ye erere, aune ye bitikäre jata nemen ruin kwin ie blitakäre kukwe kwin yebätä. Nitre ñaka törba blitai angwane mäkwe ñaka blita jankunu ben. Mäkwe ja tuaita nie ie töi kwinbiti aune mä rika ta.
5. ¿Ja ngwai iti tä dre nuainne kukwe driekäre kä jökrä ngwane?
5 Meri iti testiko Jehovakwe abokän kä jürätä nemenbätä tä nuainne krörö: tä niken jondron kökö ye ngwane tä ni iti mike ñärärä ngwärebätä aune tä kä mike kötare ja ngwärebätä. Ni ye tä kä mike kötare jabätä angwane tä blite ben. Ni ye tä blite jäme ben angwane niara tä blite jankunu ben. Niara tä ni ye kukwe nuin kwin aune kukwe meden raba töimike kukwe kwin ye kukwe nuin yebätä tä töbike. Tä nuainne kore ye köböire ja tötika kömikani kwe aune tä täräkwata mikete krubäte nitre madai.
6. ¿Ni raba dre niere blita kömikakäre?
6 Blita kömikakäre. ¿Nikwe dre niedre blita kömikakäre? Mäkwe ngwan törö jai, ñö okwä känti Jesukwe ñö käräbare meri iti ie blita kömikakäre (Juan 4:7). Aisete, ni raba köbö kwin bien o kukwe nuäre ngwentari blita kömikakäre. Ñongwane mä raba blite Bibliabätä angwane mäkwe nuain, ne kwe mä rabadre kukwe metre ye nökö (Ecl. 11:6). Ja mräkätre ruäre tä kukwe niere nitre madai töimikakäre kukwe kwin yebätä, ne kwe rabadre kukwe ngwentari ie. Ñodre, mä tädre dotore ngübare ye ngwane mä raba niere: “¡Bren ñaka rabaira ye ngwane kä rabai juto tibätä!”.
7. ¿Jondron mikadre ñärärä ye raba ni dimike ño kukwe driere kä jökrä ngwane?
7 Arato jondron mikadre ñärärä. Ñodre, monso ni madakwe tä ja ngwen kwin rabadre tuin nie, angwane ni raba kukwe kwin niere nitre rüne yei aune ngwentari ie: “¿Mätä dre nuainne tötikakäre kwin?”. Meri iti testiko Jehovakwe tä nitre sribi muko kwe tätre blite drebätä ye niara tä kukwe nuin, aune ye ererebätä tä täräkwata bien ietre. Ñodre, sribi muko iti kwe käkwe ja mikai gure namani gare ie, ye ngwane täräkwata ¡Despertad! känti blita nämene kukwe ükadrete ño ja mikadre gure metre yekrä, ye nikani ngwena meri yei. Ye köböire blitabare kwe Bibliabätä ben.
8. ¿Täräkwata yebiti kukwe drie raba ño kä jökrä ngwane?
8 Arato, täräkwata sribeta yebätä ni raba ñäke nitre mada okwäbiti blita kömikakäre. Kukwe meden abokän raba nitre töimike kukwe nieta La Atalaya o ¡Despertad! yebätä, ye ja mräkä iti kätä ñäkebätä ja töite nitre mada okwäbiti. Nire okwätä nemen täräkwata yebätä tä nemen tuin ie, angwane tä kukwe ngwentari o tä blite kukwe yebätä ben. Nuainta kore kwe köböire tä blita kömike aune kukwe driere. Ne madakäre, täräkwata mikadre kä känti nitre kwelate o sribi muko okwä rabadrebätä ye käkwe töimikai kukwe ngwentari.
9, 10. a)¿Ni raba dre nuainne kukwe driekäre kä jökrä ngwane? b)¿Mätä nuainne ño?
9 Dre dre nuain raba. Sribi Ngöbökwe nuainta nikwe ye nuaindre bäri jötrö kä nengwane, yebätä ni ñaka raba nütüre kukwe driedre kä jökrä ngwane ye nuaindre nane nane. Ñakare aune, ni raba kukwe keta kabre nuainne kukwe driekäre ni madai. Nire nire ben mä raba ngätäi aune mä raba dre niere ietre blita kömikakäre yebätä mäkwe töbika. Käre mä tädre Biblia ngwen jai, arato mä rikadre täräkwata ruäre ngwena biankäre nitre tö kukwe mikai gare jai yei (1 Ped. 3:15).
10 Nitre kwati kukwe driekä kätä kukwe keta kabre nuainne kukwe driekäre kä jökrä ngwane. Ñodre, meri iti testiko Jehovakwe tä nüne ju mente kwin ketaninkä yete, ju yete kä tärä känti nitre tä niken ja näkwite, yete niara tä niken siba aune kä üai nuäre bämikani ye tä ükete jatäri. Nitre tä kä üai ye mike ñärärä aune tätre niere ie kä ye bä nuäre, ye ngwane “kä kwin mrä aune kä tibien mrä” käbämikata Bibliakwe yebätä niarata blite ben (Rev. 21:1-4, Ngöbö Täräe (tärä okwä ükaninte mrä)). ¿Mä raba kukwe meden nuainne mada kukwe driekäre kä jökrä ngwane?
11. Nitre tä kwen nie kukwe driebätä kä jökrä ngwane, ¿ye ni raba dimike ño?
11 Nitre dimikadre. Nitre tä mä kukwe nuin angwane mäkwe ja töimika dimike. Raba angwane mä raba niere krörö: “Tikwe blitani mäbe ye käi nibi juto tibätä. ¿Ñongwane nikwe blitai bobukäreta?”. Ja mräkätre ruäre tä numero teléfono kwe ye bien aune nüne medente ye tä niere ni blitaka ben yei aune tä niere ie: “Nikwe blitani ye nibi tuin kwin krubäte tie. Mä törba kukwe mikai gare bäri jai angwane mä raba blite tibe”. Mä ñan raba nemen nitre ye tuinbiti angwane formulario Sírvase visitar (S-43) yebätä kukwe tika aune mäkwe bian ni kukwe tikaka konkrekasionte yei jötrö ngwarbe, ne kwe ni mada juandre ni ye tuinbiti.
12. a)¿Ora nuainta kukwe driebätä kä jökrä ngwane ye ñobätä täin raba arato? b)¿Kukwe meden namanina bare? (Rekwadro “Kukwe kwin tä nemen bare kukwe driebätä kä jökrä ngwane” mikadre ñärärä.)
12 ¿Ora nuainta kukwe driebätä kä jökrä ngwane ye täin raba? Minuto kräbe te nita blite ye jökrä tikadre täräbätä jai. Nitre kukwe driekä itire itire käkwe kukwe driedre minuto krärike köbö kwatire kwatire te, akrä ora nuaindre diecisiete millones bäri sö kratire kratire.
13. ¿Dre käkwe ni töimikadre kukwe driere kä jökrä ngwane?
13 Nita Ngöbö aune ni mada tarere yebätä nita kukwe driere kä jökrä ngwane (Mat. 22:37-39). Jehová töi kwin aune töita dre dre nuainbätä ye nita mike tuin ütiäte jai, ye käkwe ni töimikai “gobran kri kwe ye käikitekä” (Sal. 145:7, 10-12). Nita ni mada tarere metre, yebätä nita käre kukwe driere, ne kwe kukwe kwin ye mikadre gare ietre kä täte ye ngwane (Rom. 10:13, 14). Ja ngwandre mokre aune ja tötikadre kwin angwane ni jökrä raba kukwe driere kä jökrä ngwane. Ni iti brukwä kwin ie kukwe metre raba nemen gare mä köböire ye raba kä mike juto mäbätä.
[Blurb on page 4]
Mäkwe ja töimika ja kä niere käne aune blita kömikakäre
[Blurb on page 5]
Nitre kukwe driekä kwati tä kukwe keta kabre nuainne kukwe driekäre kä jökrä ngwane
[Box on page 5]
Kukwe ne nuain raba blita kömikakäre
◼ Ja di kärädre Jehovai
◼ Nitre tuin jäme aune kä tärä ie blitakäre, yebe mäkwe blita
◼ Nitre mika ñärärä, kä mika kötare ja ngwärebätä aune mäkwe kukwe nie ie
◼ Nitre kukwe nuadre kwin
[Box on page 6]
Kukwe kwin tä nemen bare kukwe driebätä kä jökrä ngwane
[Box on page 6]
• Carro ükateta yekänti ja mräkä iti nämene carro kwe ükate nämene ye ngübare; nitre nämene yete yei niarakwe kukwe driebare aune täräkwata nitre nübaikäre kukwe kädriedre ni jökrä kräke, ye biani kwe ietre. Kä nikani kwati ta angwane, gätä kri nuainbare yete ja mräkä iti abokän ñaka gare ie nikani käkwe kise ngökani ie. ¡Ye abokän ni iti ara ie niarakwe täräkwata biani carro ükate nämene yekänti kä nikani ta yete! Ni ye nikani kukwe kädriedre ni jökrä kräke ye kukwe nuin aune ja tötika Bibliabätä käräbare kwe. Kä nengwane ni ye bätä muko kwe ja ngökanina ñöte.
• Kukwe driebätä kä jökrä ngwane ye köböire meri iti ie kukwe metre namani gare. Nitre gare monso nimä kwe yei, ye ie niara tä kukwe driere: nitre nünanka niara bäre, nitre kwelate, bätä nitre tä niken gätä nuainta kwelate yebätä abokän gare niarai yei tä kukwe driere. Tä ja kädeke ni madai, ye ngwane Biblia tä niara dimike ño monso kwe ngubakäre ye tä mike gare; biti tä blite kukwe madabätä. Niara tä blita kömike ye tä dimike blitakäre Bibliabätä nitre madabe aune ye köböire nitre ni jätä biti nibu käkwe ja ngökanina ñöte.
• Vendedor de seguro iti, nikani meri testiko Jehovakwe ye gwirete aune ja ngwai ye kukwe driebare ie. Nünandre kä jutobiti, bren ñaka rabaira aune nünain kärekäre yei niara törba jakrä ja ngwai käkwe ngwanintari ie. Ni ye käkwe jän niebare, aune póliza de seguro medenbätä ja ngwai nämene blite ye tönamani gai. Ngöböta kukwe ye käbämike Bibliabätä ja ngwai käkwe mikani gare ie. Ni ye käkwe täräkwata kani ngäbiti aune ñäkäbare jökräbätä kwe. Ye bitikäre, kukwe ükaninte kwetre ja tötikakäre Bibliabätä, aune ni ye jatani ja ükökrö gätäbätä, biti ja ngökani ñöte kwe.
• Meri iti testiko Jehovakwe nikani kä mada känti avionte aune meri nämene täkäni niara ken yebe blita kömikani kwe aune kukwe driebare kwe ie. Ye bitikäre, ja ngwai ye nämene nüne medente bätä numero teléfono kwe ye biani ie, aune niebare kwe ie nitre testiko Jehovakwe rikadre känti angwane niara raba ja tötika Bibliabätä kärere. Köbö nikani köböiti ta angwane, nitre testiko Jehovakwe nibu käkwe jukwe metani ie. Meri ye jatani ja tötike Bibliabätä, ririabare kukwe ja üairebiti, ja ngökani ñöte kwe aune kä braibe te namanina ni nimä tötike Bibliabätä.
• Ja mräkä itibiti kä niena gre ketarike (100) aune kä ñaka tuin ie, tä nüne ju nitre umbre ngübabitita yekänti, niara tä käre niere: “Nita gobran Ngöbökwe ye ribere jai”. Meri kräkä bianka bätä nitre nünanka yete kätä kukwe ngwentari ie aune niara tä blite Gobran Ngöbökwe yebätä. Meri iti sribikä yete käkwe ngwanintari ie niarakwe dre nuaindi kä bä nuäre yete. Ja mräkä ye käkwe niebare: “Kä rabaita tuin tie bätä ti rabaita näin ye ngwane tikwe silla rueda ne kukwai”. Kä ñaka tuin ie yebätä tä ñäkämana täräkwatabätä meri yei jakrä. Bati, ngängän kwe nikani känti, aune meri sribikä yete tönamani täräkwata ye ngwain jakrä niebare kwe ie. Meri mada kräkä bianka käkwe niebare arato ie: “ ‘Nita Gobran Ngöbökwe ye ribere jai’ kukwe ye aibe nieta nete”.
• Meri iti testiko Jehovakwe nämene mrö rürübäinta yekänti aune ruatre nämene blite kukwe gobrankwe yebätä. Rua iti käkwe niebare gobran kä nebätä ye ñaka raba kukwe nikwe ye ükete, ye ngwane ja ngwai käkwe nütübare: “Ne ngwane tibike blite”. Orasion nuainbare kwe biti nikani nitre ye kokwäre. Käne ja kädekani kwe, biti gobran tärä abokän raba kukwe nikwe ye ükete, ye abokän Gobran Ngöbökwe niebare kwe, aune täräkwata driebare kwe ietre. Ye ngwane, ni iti nämene kädekani kä ye ngübabitikä ye jatani kokwäre. Ja ngwai namani nütüre ni ye käkwe niara juain mento, akwa ni ye käkwe niebare ie niara kukwei juruabare ie aune täräkwata käräbare kwe ie arato. Meri iti sribikä yete käkwe ja tötikani Bibliabätä nämene niara kukwe nuin arato, muare kwärä nikani kokwäre aune niebare kwe ie tönämani ja tötikaita Bibliabätä.