Ni testiko Jehovakwe kä jökrä ngwane
1. ¿Jesukwe kukwe driebare meri iti nükani ñö den jai ie, ye kätä dre driere nie?
1 Jesús nikani kukwe driere kä Galilea känti, ye ngwane nänbare mente kwe, namani nainte aune tomana namani ie. Ye medenbätä nitre ja tötikaka nikani mrö kökö ye ngwane niara namani täkäni ñö okwä juta samaria ye ken ja dükakäre. Akwa yete meri iti nükani ñö den jai ye ngwane Jesukwe ñaka kä mikani niken ta jabiti, ñakare aune kukwe driebare kwe meri yei (Juan 4:5-14). ¿Ñobätä nuainbare kwe? Ñobätä ñan angwane, niara nämene käre “ja kukwei mike täte metre amne niara abko [nämene] kukwe era erere nie[re]” Jehovabätä (Rev. 3:14). Ni törba nuain Jesús erere angwane, nikwe ja ngwandre testiko Jehovakwe kä jökrä ngwane (1 Ped. 2:21).
2. ¿Nikwe ja ükadrete ño kukwe driekäre kä jökrä ngwane?
2 Mäkwe ja ükadrete. Kukwe driekäre kä jökrä ngwane yekrä ni rikadre täräkwata ngwena jai. Ja mräkätre kwati tä niken täräkwata kia ngwena jai mikatekäre nitre gasolina rürübäinkä bätä nitre jondron rürübäinkä o nitre mada yei (Ecl. 11:6). Ja ngwai merire iti tä niken käre kä mada känti ye ngwane tä niken Biblia chi bätä tärä Enseña ye ngwena jai bätä tä ja töimike kukwe driere nitre tä nemen täkäni niara ken yei.
3. ¿Nikwe blita ye kömikadre ño?
3 Blita kömikakäre. Kukwe driekäre kä jökrä ngwane yekrä ñaka blitadre Bibliabätä bengwairebe blita kömikakäre. Ñodre, Jesukwe blitabare meri iti nükani ñö den jai yebe, ye ngwane ñaka niebare bengwaire kwe ie, ti abokän dianinkä Ngöbökwe, ñakare aune ñö ngwen chi tie ñadre niebare kwe, ye käkwe meri ye töimikani niara kukwe nuin (Juan 4:7-9). Ye erere ja ngwai iti ie namani gare raba blita kömike kukwe ngwantarita ie ye ngwane. Ñobätä ñaka bieta ruäre nuainne ngwantarita ie angwane ñaka niere bengwairebe ti abokän testiko Jehovakwe yebätä, ñakare aune, blita kömikakäre tä niere: “Tikwe ja töimikani ñaka bieta ruäre ye nuainne”. Kukwe nieta kwe ye kätä nitre töimike kukwe mada ngwentari ie, ye ngwane tä kukwe driere ietre.
4. ¿Ñobätä kukwe nieta Mateo 28:18-20 ye raba mä dimike?
4 Jesukwe kukwe driebare ünän kä tibien nebätä, akwa nikwe kukwe driedre sribi ye mikani ni kisete aune niara töitabätä arato (Mat. 28:18-20). Jesús erere, ni Testiko Jehovakwe rabadre juto biarebe kukwe driekäre kä jökrä ngwane (Heb. 10:23).