Nikwe ñaka juandre ja bäre Jesús Ja Nire
Biani Ngwanta Törö jai: yebätä nita debe bien ye bämikadre
1. ¿Jesús Ja Nire Biani Ngwainta Törö jai ye rabai kwin dre nuainkäre?
1 Jesús Ja Nire Biani Ngwainta Törö jai köbö 14 abril yete, ye rabai kwin nita debe bien Jehovai töi kwin ni kräke yebätä ye bämikakäre. Debe biandre yebätä Jehová aune Jesús töita ño ye mikata gare Lucas 17:11-18 yekänti. Kukwe ñaka kwin namani bare, ¡nitre ni jätä nämene bren lepra kisete mikaninta kwin ye itibe käkwe debe biani! Ni kökataribare ye köböire ja känenkäre kukwe käme jökrä ye mikai krüte aune ni rabai nüne kärekäre. Ye medenbätä, mantre jetebe nikwe debe biain Jehovai kukwe kwin yebätä. Akwa ¿nita debe bien ye nikwe bämikai ño bämän kite ja känenkäre yebätä?
2. ¿Ni kökataribare yebätä nikwe debe biandre ño?
2 Nikwe ja töi mikadre debe bien. Nita töbike drebätä ye tä ni töi mike debe bien ni madai. Ni kökataribare yebätä ni rabadre debe bien bäri yekäre, Jesús Ja Nire Biani Ngwainta Törö jai ye bämäin kräke kukwe ükatebare ñäkäkäre Bibliabätä abokän tä täräkwata jene jenebätä, ñodre, tä mikani calendario aune tärä Examinando las Escrituras diariamente yebätä. Ni rabadre ñäke gwairebebätä ni mräkätre ben. Nikwe nuaindi ye erere angwane, ni kökataribare ye rabai tuin bäri ütiäte nie, aune yekwe ni töi mikai ja ngwen kwin (2 Cor. 5:14, 15; 1 Juan 4:11).
3. ¿Nita debe bien ye ni raba bämike ño kukwe jene jenebiti Jesús Ja Nire Biani Ngwainta Törö jai ye käi näire?
3 Nita debe bien ye bämikadre. Debe bianta ye bämikata jondron nuainta yebiti (Col. 3:15). Jesús ni bren lepra kisete mikaninta kwin ye nikani känti debe biankäre ie. Aune mikaninta kwin ye kä jutobiti niebare kwe ni jökrä ie (Luc. 6:45). ¿Nita debe bien yebätä nikwe ja töi mikai bäri nitre nübaire Jesús Ja Nire Biani Ngwainta Törö jai ye kräke? Nita debe bien ye bämikakäre ni raba prekursor ausiliar nuainne o kä denkä bäri jai kukwe driekäre Jesús Ja Nire Biani Ngwainta Törö jai ye ngwane. Nita debe bien yekwe ni töi mikai köbö yete deu, nitre rükai ye kain ngäbiti kwin aune ni täi juto biare kukwe ngwandretari kwetre ye mikakäre gare ietre.
4. ¿Jesús Ja Nire Biani Ngwainta Törö jai ye näire nikwe dre nuaindre ne kwe ni ñaka rabadre ulire?
4 ¿Jesús Ja Nire Biani Ngwainta Törö jai ye nuaindi mrä? (1 Cor. 11:26.) Ñaka gare nie. Akwa gare kwin nie köbö näin ta ye abokän kwin krubäte debe biankäre. Nikwe ñaka juandre ja bäre. Nikwe debe biain ja kadabiti aune töbikaitari ja brukwäte ye rabadre kwin Jehová, ni ni kökatarikä Bianka ye kräke (Sal. 19:14).