¿Tita ni kukwe driekä tibe dimike?

1. ¿Ñobätä ütiäte kukwe driedre ni madabe?

¹ Bati, nitre gre ketamä biti ni jätä Jesukwe juani kukwe driere “nibu nibu” (Luc. 10:1 KKN). Kukwe ükaninte ye köböire niaratre käkwe ja dimikani kwärikwäri kukwe driere. Nita kukwe driere ni madabe ye ngwane, ¿dimikadre ño?

2. Ni kukwe driekä nibe tädre blite ye ngwane, ¿ñobätä nikwe kukwe nuadre kwin aune bämikadre ño?

² Kukwe nuadre kwin. Ni Kukwe driekä mäbe tädre blite ye ngwane mäkwe kukwe nua kwin (Sant 1:19). Niara ñäkädre textobätä angwane mäkwe texto ye känä Biblia mäkwe yebätä. Ni kukwe driekä mäbe o ni gwi, tädre blite aune mäkwe nikrabätä. Nire tädre blite ye mäkwe kukwe nuadre kwin angwane ni gwi ye törba nuain erere arato.

3. ¿Ñongwane ni raba ni mada dimike?

³ Ñongwane blitadre. Mätä ni kukwe driekä mäbe tuenmetre blite yekänti mätä niara kukwei mike ütiäte jai (Rom. 12:10). Ne abokän ñaka blitadre kukweite ta meden gärätä. Ni kukwe driekä mäbe yei kukwe ngwantaridre aune niara ja di kärädre mäi kukwe mikakäre gare ye ngwane mäkwe dimika, akwa mäkwe ñaka blitadre kukwe madabätä. Drebätä ni kukwe driekä ye tädre blite ye ererebätä mäkwe blita (Pro. 16:23; Ecl. 3:​1, 7). Ye köböire mäkwe ni kukwe driekä mäbe dimikadre kukwe ye arabebätä (1 Cor. 14:⁠8).

4. ¿Nikwe dre nuaindre kukwe driekäre kwin bätä kä jutobiti?

⁴ Nitre gre ketamä biti ni jätä käkwe kukwe driebare ünän aune “jatani nüketa mada angwane kä namani nuäre krubäte btätre” (Luc. 10:17 KKN). Ni kukwe driekä nibe ye nita kukwe nuin kwin bätä ni ñaka tä blite kukweite ta, ye ngwane kukwe driedre ye bitikäre ni jataita kä jutobiti.