Ñaka tädre näin jerekäbe ni mukore
1. ¿Ni rikadre kukwe driere ja mräkätre ben ye ngwane ni raba ja ngwen ño apóstol Pablo erere?
1 Nitre kukwe driekä mada nämene niken batire batire apóstol Pablo ben ye ngwane, nämene blite bentre “ja die mika[käre] kwärikwäri” (Rom. 1:12, Kukwe Kuin Ngöbökwe). Nita niken kukwe driere ja mräkätre ben ye ngwane, ¿nita kä denkä jai arato blitakäre jabe ja die mikakäre kwärikwäri? Ñaka tädre näin jerekäbe ni mukore, ñakare aune kukwe meden ni dimikanina kukwe driere bäri kwin ye nikwe kädriedre bentre.
2. ¿Nikwe dre nuaindre ja mräkätre nänkä nibe ye töi mikakäre jäme, aune ñobätä ye ütiäte ni raba niere?
2 Dimikadre töi mikakäre jäme. Nitre kukwe driekä ruärebätä kä jürä nemen, ye nüke gare ngwärebätä o nemen blite ño yebätä. Kukwe kwin niedre bökän ietre ye raba töi mike jäme. ¿Kä jürä ñaka rabadre bätätre yekäre kukwe meden mada raba dimike? Ni ni tuabitikä iti yebätä kä jürä nemen arato aune käre tä orare ne kwe Jehovakwe töi mikadre jäme ye tä niere ja mräkätre kukwe driekä ben yei. Dre tä ni brare Testiko mada töi mike jäme ye tä niere krörö: “Kä mikadre kötare ja ngwärebätä ye kwin. Akwa ruäre ngwane kä jürä nemen krubäte tibätä aune ti ñaka orare ye ngwane, kä ñaka nemen kötare ti ngwärebätä”. ¿Kukwe meden ni töi mikanina jäme kukwe driekäre? Ni raba kädriere ja mräkätre nänkä nibe yebe.
3. ¿Nita kukwe driere ye ngwane nikwe kukwe meden meden kwin dirikäre kädriedre ja mräkätre nänkä nibe yebe?
3 Kukwe kwin dirikäre ye nikwe kädriedre jabe. ¿Kukwe namani bare abokän gare nitre ie ye kädriekäre bentre nikwe kukwe meden niebarera o kukwe meden ngwaninantari blita kömikakäre kwin? ¿Kukwe nieta dirikäre ye nikwe ükaninante jai blitakäre köböire kukwe kwin namanina bare? Nikwe kukwe ye kädriedre ja mräkätre ben (Prov. 27:17). Ni rikadre nitre tuinbitita ye ngwane, ñokäre nita näin aune nikwe nuaindre ño ye ni raba niere ji ngrabare ja mräkä tädre näin nibe yei. Aune ni mada tötikadre Bibliabätä ye bitikäre, ñobätä nikwe kukwe o bersikulo keteiti kädriebare bäri o ñobätä nita ni ja tötikaka ye tötike ye erere ye nikwe mikadre gare ja mräkä nänkä nibe yei.
4. ¿Ñobätä ni rabadre ja töi mike ja mräkätre kukwe driekä nibe ye dimikabätä?
4 Nitre kristiano siklo kena ye ñaka töi nämene nitre ie kukwe drie nämene kwetre ye aibe dimikabätä; ñakare aune töi nämenentre ja dimikabätä kwärikwäri arato (Hech. 11:23; 15:32). Yebätä, apóstol Pablo Timoteo tötikani aune Timoteo ie kukwe namani gare ye mikadre gare kwe ni madai niebare kwe ie (2 Tim. 2:2). Kukwe meden gare nie ye nikwe mikai gare ja mräkätre ie angwane, kukwe driei kwetre kä jutobiti aune bäri kwin. Akwa metrere, nikwe kä mikai juto ni Rün kä kwinbiti yebätä (Heb. 13:15, 16).